[1] “Yî-set-lie̍t-ngìn nâ, oi chu-yi thâng! Ngì-têu kîm-pû-ngit oi ko Yok-tan-hò, ngi̍p-hi cham-liâng pí ngì-têu kha khiòng-thai ke kok mìn-chhu̍k ke thú-thi. Kì-têu ke sàng yu-fat yu-thai, sàng-chhiòng kô-to tù-thiên.
[2] Ke thi-fông he̍t ke ngìn yu kô yu-thai, he Â-na̍p-chhu̍k ngìn ke chṳ́-sûn; ngì-têu yí-kîn thâng ngìn kóng-ko, mò ngìn nèn lâu Â-na̍p-chhu̍k ngìn tui-khong.
[3] Chúng-he kîm-pû-ngit, ngì-têu voi chhîn-muk khon-tó Song-chú — ngì-têu ke Song-ti, chhiong lie̍t-fó án-ngiòng chhai ngì-têu thèu-chhièn hàng ko-hi. Ngì-têu chhièn-chin ke sṳ̀, Kì voi tá-phai kì-têu, sṳ́ ngì-têu cheu Kì ke yin-hí chin-ngi̍p, kiuk-chhut thi̍t-ngìn, chiông kì-têu sêu-me̍t.
[4] “Song-chú — ngì-têu ke Song-ti vi ngì-têu kiuk-chéu thi̍t-ngìn heu, ngì-têu m̀-hó ngin-vì Song-chú tai-liâng ngì-têu cham-liâng ke thú-thi he yîn-vi ngì-têu ke kûng-tet, he yin-kôi ke. M̀-he án-ngiòng! Liá he yîn-vi ke-thi ke chhu-mìn sià-ok, Song-chú chang chiông kì-têu kiuk-chéu;
[5] m̀-he yîn-vi ngì-têu sîm-kôn hó, hàng-vì chṳn-chhṳ̍t, ngì-têu chang nèn ngi̍p-hi cham-liâng kì-têu ke thú-thi. Song-chú — ngì-têu ke Song-ti chiông kì-têu kiuk-chéu, he yîn-vi liá-têu ngìn sià-ok, yu yîn-vi Kì oi sṳ̍t-hàng Kì tui ngì-têu chú-siên — Â-pak-lâ-hón, Yî-sat, Ngâ-kok só yin-hí ke.
[6] Só-yî, ngì-têu oi tî, Song-chú — ngì-têu ke Song-ti chiông liá chhin-chiâng ke thú-thi su-pûn ngì-têu cho sán-ngia̍p, chhie̍t-tui m̀-he yîn-vi ngì-têu yû má-ke kûng-tet, khì-sṳ̍t, ngì-têu he ngang-kiáng ke chṳ́-mìn.”
[7] “M̀-hó m̀ ki-tet ngì-têu sṳt chhai khóng-yâ ngiâ Song-chú — ngì-têu ke Song-ti fat-khién. Tui ngì-têu lì-khôi Âi-khi̍p ke-ngit to liá-ha, ngì-têu yit-chhṳ̍t phoi-ngia̍k Kì.
[8] Sṳm-chṳ chhai Hò-lie̍t-sân, ngì-têu me ngiâ Song-chú fat-khién, Kì hiám-hiám chiông ngì-têu sêu-me̍t.
[9] Ke-sṳ̀ ngài sông-sân hi chiap-su lióng-te sa̍k-pán — ke mien-táng siá-tén Song-chú lâu ngì-têu só-li̍p ke yok. Ngài chhai sân-táng thìn-liù si-sṳ̍p ngit-ya, mò-sṳ̍t, mò-lîm.
[10] Heu-lòi, Song-chú chiông liá lióng-te sa̍k-pán kâu-pûn ngài. Liá lióng-te sa̍k-pán yû Song-ti chhîn-chhṳ yung sú-chṳ́ siá ke fa, he ngì-têu chhi-si̍p ke-ngit, Kì chhai sân-táng ke fó-yam chûng kóng-ko ke fa.
[11] Ko si-sṳ̍p ngit-ya, Song-chú chiông siá-tén yok ke lióng-te sa̍k-pán kâu-pûn ngài.
[12] “Chiap-tén, Song-chú lâu ngài kóng: ‘Ngì kiak-kiak hâ-sân, yîn-vi ngì tui Âi-khi̍p tai chhut-lòi ke thùng-pâu yí-kîn phai-fái, cho sià-ok ke sṳ. Kì-têu chhin-kiak phiên-lì Ngài min-lin kì-têu ke tho-lu, vi chhṳ-kâ chu-chho ngiéu-siong!’
[13] “Song-chú yu lâu ngài kóng: ‘Ngài tî liá-têu ngìn-mìn fî-sòng ngang-kiáng.
[14] Ngài oi sêu-me̍t kì-têu, vàn-chhiòn chhù-thet kì-têu ke miàng; ngì m̀-hó chú-tóng Ngài. Ngài oi pûn ngì sàng-cho yit-ke pí kì-têu kha khiòng-thai ke koet-kâ.’
[15] “Yèn-heu ngài chón-sṳ̂n, nâ-tén siá-hó yok ke lióng-te sa̍k-pán hâ-sân; sân-táng yit-chhṳ̍t chho̍k-tén fó.
[16] Ngài khon-tó ngì-têu yí-kîn tet-chhui Song-chú — ngì-têu ke Song-ti, vi chhṳ-kâ chu-chho yit-chak se-ngiù-è ke ngiéu-siong, chhin-kiak chhiu phiên-lì Song-chú só fûn-fu ngì-têu ke tho-lu.
[17] Só-yî ngài chhai ngì-têu mien-chhièn chiông ke lióng-te sa̍k-pán piâng chhai thi-song, piâng sui-thet.
[18] Ngài yu yit-pái phu̍k chhai Song-chú mien-chhièn, si-sṳ̍p ngit-ya mò-sṳ̍t, mò-lîm. Liá chhiòn-phu he yîn-vi ngì-têu hàng chhin sià-ok ke sṳ lòi tet-chhui Song-chú, ngiâ Kì fat-khién.
[19] Song-chú thai fat-khién, khién-to oi sêu-me̍t ngì-têu, ngài fî-sòng chho̍k-kiâng. Chúng-he Song-chú yu yit-pái thâng ngài ke khì-tó.
[20] Song-chú chhai thai fat-khién chûng ya tông sióng-oi chhṳ̀-thet Â-lùn; tông-sṳ̀ ngài ya thoi Â-lùn khì-tó.
[21] Ngài chiông ngì-têu só chu-chho ke hoi ngì-têu fam-chhui ke kîm-ngiù te̍p chhai fó tî-poi sêu, yu tá-to sui-sui, nò-to chhiong chhṳ̀n-fôi án-yu, ve chhai tui sân-táng liù hâ-lòi ke hâi-súi tú.
[22] “Chhai Thâ-phi-lâ, Mâ-sat, Kî-pok-lò-Ha̍p-thâ-ngá ke sṳ̀, ngì-têu ya ngiâ Song-chú fat-khién.
[23] Song-chú ham ngì-têu lì-khôi Kâ-tâi-sṳ̂-Pâ-nì-â, kóng: ‘Ngì-têu hi cham-liâng Ngài su-pûn ngì-têu ke thú-thi.’ Chúng-he, ngì-têu phoi-ngia̍k Song-chú — ngì-têu ke Song-ti, m̀ sin-kho Kì, m̀ thâng-chhiùng Kì.
[24] Tui ngài ngin-sṳt ngì-têu yî-lòi, ngì-têu sòng-sòng phoi-ngia̍k Song-chú.
[25] “Ngài phu̍k chhai Song-chú mien-chhièn si-sṳ̍p ngit-ya, yîn-vi ngài tî Kì kiet-thin oi sêu-me̍t ngì-têu.
[26] Ngài khì-tó kóng: ‘Chṳ-kô ke Song-chú â, khiù Ngì m̀-hó sêu-me̍t Ngì chhṳ-kâ ke chṳ́-mìn. Kì-têu he Ngì yung thai-nèn thai-li̍t tui Âi-khi̍p kiu chhut-lòi ke, kì-têu he Ngì ke sán-ngia̍p.
[27] Khiù Ngì ki-ngiam Ngì ke phu̍k-ngìn — Â-pak-lâ-hón, Yî-sat, Ngâ-kok, mo̍k khon Ngì chṳ́-mìn ke ngang-kiáng, sià-ok, lâu chhui-ko.
[28] Na-m̀-he án-ngiòng, Âi-khi̍p-ngìn voi kóng, Ngì mò fap-thu tai-liâng kì-têu to Ngì yin-hí pûn kì-têu ke thú-thi. Kì-têu voi kóng, Ngì tông-nâu Ngì chhṳ-kâ ke chṳ́-mìn, Ngì tai-liâng kì-têu hi khóng-yâ, he-oi chhṳ̀-thet kì-têu.
[29] Chúng-he liá ngìn-mìn he Ngì ke sán-ngia̍p, he Ngì kién-sién cho chhṳ-kâ chṳ́-mìn ke, he Ngì yung thai-nèn thai-li̍t tui Âi-khi̍p tai-liâng chhut-lòi ke.’ ”