[1] “Ngì-têu chhut-hi lâu thi̍t-ngìn siông-chhṳ̀, khon-tó kì-têu ke chan-chhâ, chan-mâ lâu kiûn-chhui pí ngì-têu kha-tô ke sṳ̀, m̀-sṳ́ kiâng, yîn-vi kiu ngì-têu lì-khôi Âi-khi̍p ke Song-chú — ngì-têu ke Song-ti voi lâu ngì-têu thùng-chhai.
[2] Ngì-têu siông-chhṳ̀ yî-chhièn, chi-sṳ̂ oi hàng-chhièn hiong kiûn-chhui kóng:
[3] ‘Yî-set-lie̍t-ngìn â, ngì-têu oi thâng! Kîm-pû-ngit ngì-têu chhut-hi lâu thi̍t-ngìn siông-chhṳ̀, m̀-hó án mò-tám, m̀-sṳ́ kín-chông, m̀-sṳ́ kiâng, m̀-sṳ́ chûn;
[4] yîn-vi Song-chú — ngì-têu ke Song-ti voi lâu ngì-têu khiung-ha hi; Kì voi vi ngì-têu lâu thi̍t-ngìn siông-chhṳ̀, sṳ́ ngì-têu tá-yàng.’
[5] “Chiap-tén, chóng-kôn oi tui phu-ha siên-pu: ‘Ngì-têu tông-chûng yû má-ngìn vuk-è hí-hó hàn-màng hàng fung-hien lî? Án-ngiòng ke ngìn cho-tet chón-hi. Kiâng-pha kì chan-sí, phe̍t-ngìn thoi kì fung-hien vuk-è.
[6] Ngì-têu tông-chûng yû má-ngìn chung phù-thò-yèn hàn-màng sû-sṳ̀n? Án-ngiòng ke ngìn cho-tet chón-hi. Kiâng-pha kì chan-sí, phe̍t-ngìn hióng-su kì ke phù-thò.
[7] Ngì-têu tông-chûng yû má-ngìn ko-thin lé, hàn-màng kiet-fûn? Án-ngiòng ke ngìn cho-tet chón-hi. Kiâng-pha kì chan-sí, phe̍t-ngìn thó kì ke vi-fûn-chhî.’
[8] “Chóng-kôn yu oi tui phu-ha kóng: ‘Na-he ngì-têu tông-chûng yû-ngìn mò-tám, kiâng-sí, kì me cho-tet chón-hi. Kiâng-pha kì voi yáng-hióng chhiòn-kiûn ke sṳ-hi.’
[9] Chóng-kôn hiong phu-ha siên-pu yî-heu, oi chṳ́-phai kok tân-vi ke chṳ́-fî-kôn.
[10] “Ngì-têu kûng-tá yit-chho sàng ke sṳ̀, oi siên pûn sàng-tú ke ngìn yû kî-fi thèu-hòng.
[11] Na-he kì-têu tá-khôi sàng-mùn thèu-hòng, sàng-tú só-yû ke ngìn chhiòn-phu oi cho ngì-têu ke nù-chhòi, thoi ngì-têu cho khú-kûng.
[12] Na-he kì-têu m̀ thèu-hòng, oi lâu ngì-têu tui-khong, ngì-têu chhiu oi vì-khun ke-sàng.
[13] Song-chú — ngì-têu ke Song-ti sṳ́ ngì-têu cham-liâng ke-sàng yî-heu, ngì-têu chhiu oi chiông sàng-tú ke nàm-ngìn chhṳ̀ chhiang-chhiang.
[14] Na-he fu-ngìn-kâ, se-ngìn-è, thèu-sâng lâu sàng-tú khì-thâ ke tûng-sî, ngì-têu cho-tet khon-cho chan-li-phín nâ-hi yung, yîn-vi he Song-chú — ngì-têu ke Song-ti su-pûn ngì-têu ke.
[15] Liá thiàu-li chṳ́-yû sṳt-yung chhai ke-têu lì ngì-têu oi he̍t ke só-chhai tông-yén ke sàng-sṳ.
[16] “Chúng-he, chhai Song-chú — ngì-têu ke Song-ti oi su-pûn ngì-têu ke thú-thi song, chhai cham-liâng ke-têu sàng yî-heu, ngì-têu oi chiông só-yû ke ngìn chhṳ̀ chhiang-chhiang.
[17] Ngì-têu oi chûn-cheu Song-chú — ngì-têu Song-ti ke min-lin sêu-me̍t só-yû ke Het-ngìn, Â-mô-li-ngìn, Kâ-nàm-ngìn, Pí-li-sé-ngìn, Hî-vi-ngìn, Yâ-pu-sṳ̂-ngìn,
[18] miên-tet kì-têu koái-phien ngì-têu hi-ho̍k kì-têu pai ngiéu-siong ke chúng-chúng fái fûng-siu̍k, tet-chhui Song-chú — ngì-têu ke Song-ti.
[19] “Ngì-têu kûng-tá yit-chho sàng ke sṳ̀, chhiu-son vì-khun tông-kiú, ya cho-m̀-tet chám-thet kó-su. Ngì-têu cho-tet sṳ̍t su-táng ke kó-chṳ́, chúng-he cho-m̀-tet chiông su-é chám-thet, yîn-vi su-é m̀-he ngì-têu ke thi̍t-ngìn!
[20] Ngì-têu cho-tet chám mò-kiet kó-chṳ́ ke su-é cho chhòi-liau, lòi chho kûng-tá sàng ke sat-phi, chhṳ̍t-to chiông ke-sàng tá hâ-lòi.”