[1] Mô-sî seu-si̍p só-yû ke Yî-set-lie̍t-ngìn, tui kì-têu kóng: “Yî-set-lie̍t-ngìn nâ, oi chu-yi thâng ngài kîm-pû-ngit hiong ngì-têu pân-pu ke fap-li̍t lâu li-kûi. Ngì-têu oi ho̍k-si̍p, yu oi khok-sṳ̍t chûn-sú.
[2] Song-chú — ngài-têu ke Song-ti chhai Hò-lie̍t-sân lâu ngài-têu li̍p-yok.
[3] Song-chú m̀ tân-chhiang lâu ngài-têu ke chú-siên li̍p liá-yok, ya he lâu ngài-têu kîm-pû-ngit chhai liá-vi hàn sâng-tén ke ngìn li̍p-yok.
[4] Song-chú chhai ke sân-táng, tui fó-yam chûng mien-tui-mien lâu ngì-têu kóng-fa.
[5] Ke-sṳ̀, ngài khî chhai ngì-têu lâu Song-chú chûng-kiên, oi hiong ngì-têu chhòn Song-chú ke fa; yîn-vi ngì-têu kiâng ke-fó, m̀-kám sông-sân.
[6] “Song-chú kóng: ‘Ngài he Song-chú — ngì ke Song-ti; Ngài sṳt thu ngì tui cho nù-chhòi ke Âi-khi̍p-thi chhut-lòi.
[7] “ ‘Ngài yî-ngoi, ngì cho-m̀-tet kin-pai phe̍t ke sṳ̀n-mìn.
[8] “ ‘Cho-m̀-tet vi chhṳ-kâ tiâu-khiet ngiéu-siong; ya cho-m̀-tet chho thiên-táng, thi-song, ya-he thi tái-hâ, súi-chûng só-yû ke hìn-siong.
[9] Cho-m̀-tet hiong ke-têu ngiéu-siong khúi-pai, ya cho-m̀-tet fu̍k-sṳ kì-têu, yîn-vi Ngài — Song-chú — ngì ke Song-ti he chôn-chhìn ke Song-ti. Hen Ngài ke ngìn, Ngài yit-thin voi chit-fa̍t kì-têu lâu kì-têu ke chṳ́-ńg, chhṳ̍t-to sâm-si thoi.
[10] Chúng-he kin-oi Ngài, chûn-sú Ngài min-lin ke ngìn, Ngài oi yung chhṳ̀-oi khoán-thai kì-têu, chhṳ̍t-to chhiên-thoi.
[11] “ ‘Cho-m̀-tet lám-sám yung Song-chú — ngì Song-ti ke miàng; yîn-vi lám-sám yung Song-chú miàng ke ngìn, Song-chú yit-thin voi chit-fa̍t kì.
[12] “ ‘Oi chûn-cheu Song-chú — ngì Song-ti ke min-lin, chûn-sú ôn-sit-ngit cho sṳn-ngit.
[13] Ngì yû liuk-ngit hó lò-luk cho yit-chhiet ke kûng-chok;
[14] chúng-he thi-chhit ngit he su̍k Song-chú — ngì Song-ti ke ôn-sit-ngit. Liá-ngit, mò-lun he ngì, ngì ke chṳ́-ńg, nù-phu̍k, nù-pî, ngiù, lì, thèu-sâng ya-he sàng-nui chhiam-he̍t ke lî-hak, chhiòn-phu cho-m̀-tet kûng-chok. Ngì ke nù-phu̍k, nù-pî yit-thin oi lâu ngì khiung-yong hiet-khun.
[15] Ngì oi ki-tet, ngì sṳt chhai Âi-khi̍p cho-ko nù-chhòi; Song-chú — ngì ke Song-ti yung thai-nèn thai-li̍t chiông ngì tui ke-vi kiu chhut-lòi. Só-yî, Song-chú — ngì ke Song-ti min-lin ngì, yit-thin oi sú ôn-sit-ngit.
[16] “ ‘Oi cheu Song-chú — ngì Song-ti ke min-lin hau-kin yà-ôi, hó pûn ngì sṳ-sṳ sun-li, chhai Song-chú — ngì Song-ti oi su-pûn ngì ke thú-thi song hióng chhòng-su.
[17] “ ‘Cho-m̀-tet chhṳ̀-ngìn.
[18] “ ‘Cho-m̀-tet fam kiên-yìm.
[19] “ ‘Cho-m̀-tet thêu-nâ.
[20] “ ‘Cho-m̀-tet cho ká kien-chṳn hoi-ngìn.
[21] “ ‘Cho-m̀-tet thâm phe̍t-ngìn ke pû-ngiòng; ya cho-m̀-tet thâm phe̍t-ngìn ke vuk, thú-thi, nù-phu̍k, nù-pî, ngiù, lì, ya-he khì-thâ ke tûng-sî.’
[22] “Liá he ngì-têu chhiòn fi-chung chhai sân-táng chhi-si̍p ke sṳ̀, Song-chú hiong ngì-têu pân-pu ke kie-min. Ke-sṳ̀, Kì tui fó-yam chûng, vû-yùn chûng, lâu nùng-yên chûng hiong ngì-têu thai-sâng kóng-fa. Kì chṳ́-yû pân-pu liá-têu kie-min. Heu-lòi Kì chiông liá-têu kie-min siá chhai lióng-te sa̍k-pán mien-táng, kâu-pûn ngài.”
[23] “Tông-sṳ̀, kûi-chak sân chhiòn-phu chho̍k-fó; ngì-têu thâng-tó yû sâng tui vû-am chûng fat-chhut. Kok kî-chhu̍k ke liâng-chhiu lâu ke-têu chóng-ló chhiòn-phu lòi-kien ngài,
[24] kóng: ‘Ngài-têu thâng-tó Song-chú — ngài-têu ke Song-ti tui fó-yam chûng lâu ngài-têu kóng-fa, Kì hiong ngài-têu hién-mìn Kì ke yùng-kông lâu thai-nèn! Kîm-pû-ngit, ngài-têu thí-ngiam tó, chhiu-son Song-ti lâu ngìn kóng-fa, ngìn hàn-he sâng-tén.
[25] Chúng-he liá-ha, ngài-têu ngióng oi-sṳ́ mo sâng-miang ke ngùi-hiám nè? Ke tet-ngìn-kiâng ke fó-yam voi sêu-me̍t ngài-têu. Na-he ngài-têu chai thâng-tó Song-chú — ngài-têu Song-ti ke sâng, ngài-têu yit-thin voi sí.
[26] Ngìn-lui tông-chûng yû má-ngìn chhiong ngài-têu thâng-ko yún-sên Song-ti tui fó-yam chûng fat-chhut ke sâng hàn-yû miang nè?
[27] Mô-sî â, chhiáng ngì hàng-chhièn hi, chu-yi thâng Song-chú — ngài-têu Song-ti só-kóng ke fa, yèn-heu fûn-fu ngài-têu. Ngài-têu voi thâng, yu voi chûn-hàng.’
[28] “Song-chú thâng-tó liá-fa chhiu tui ngài kóng: ‘Ngài yí-kîn thâng-tó liá-têu ngìn só-kóng ke fa. Kì-têu só-kóng ke chhin-chho̍k,
[29] Ngài chhin hî-mong kì-têu sòng-sòng yû án-ngiòng ke sîm, chhiùng-thèu to-mî kin-vi Ngài, chûn-hàng Ngài só-yû ke kie-min, sṳ́ kì-têu lâu kì-têu ke chṳ́-sûn sṳ-sṳ sun-li.
[30] Ngì oi lâu kì-têu kóng, ham kì-têu chón chhṳ-kâ ke chong-phùng hi.
[31] Chúng-he ngì oi liù chhai Ngài liá-vi; Ngài oi chiông só-yû ke kie-min, fap-li̍t lâu li-kûi chhiòn-phu kâu-thok ngì. Ngì oi kâu kì-têu, pûn kì-têu chhai Ngài su-pûn kì-têu ke thú-thi song khok-sṳ̍t chûn-hàng.’
[32] “Yî-set-lie̍t-ngìn nâ, ngì-têu oi se-ngi, yit-thin oi chûn-hàng Song-chú — ngì-têu ke Song-ti só fûn-fu ngì-têu ke min-lin, mò-lun nai-thiàu tû cho-m̀-tet phiên-chhâ;
[33] oi chhiòn-phu chûn-hàng. Án-ngiòng, ngì-têu chhiu voi sên-chhùn hâ-hi, sṳ-sṳ sun-li, chhai ngì-têu oi hi cham-liâng ke thú-thi song he̍t kiú-kiú.”