[1] “Ngì-têu ngi̍p-hi cham-liâng Song-chú — ngì-têu ke Song-ti oi su-pûn ngì-têu ke thú-thi, chhai ke-vi thin-kî heu,
[2] oi tui ke thú-thi chiông sîn-chhut ke kok-chúng thú-sán piong têu chhai làm-è tú, tai-to Song-chú — ngì-têu ke Song-ti só-sién oi sat-li̍p Kì ke miàng ke só-chhai.
[3] Ngì-têu oi hi-kien lùn-pân cho chi-sṳ̂ ke, tui kì kóng: ‘Ngài kîm-pû-ngit hiong Song-chú — ngì ke Song-ti péu-mìn, ngài yí-kîn ngi̍p-to Song-chú hiong ngài-têu chú-siên yin-hí oi su-pûn ngài-têu ke thú-thi.’
[4] “Chi-sṳ̂ oi chiông ngì-têu tai-hi ke làm-è sû hâ-lòi, piong chhai Song-chú — ngì-têu Song-ti ke chi-thàn chhièn.
[5] Ngì-têu chhai Song-chú — ngì-têu Song-ti mien-chhièn oi cheu án-ngiòng kóng: ‘Ngài ke chú-siên he yit-ke liù-long ke Â-làn-ngìn. Kì tai kâ-chhu̍k to Âi-khi̍p chhiam-sṳ̀ he̍t. Kì-têu hi ke sṳ̀ ngìn-su chhin séu, yî-heu chhiam-chhiam chen-tô, sàng-cho khiòng-thai ke mìn-chhu̍k.
[6] Âi-khi̍p-ngìn khî-fu ngài-têu, khiòng-pet ngài-têu cho nù-chhòi, cho khú-kûng.
[7] Ngài-têu chhiu khiù-ham Song-chú — ngài-têu chú-siên ke Song-ti; Kì khon-tó ngài-têu ke thung-khú, kiên-nàn, su pet-hoi, chhiu chhùi-thâng ngài-têu ke ôi-khiù.
[8] Song-chú yung chhṳ-kâ ke thai-nèn thai-li̍t hàng sṳ̀n-chiak khì-sṳ, yu sṳ́ tet-ngìn-kiâng ke sṳ fat-sên, lòi kiu ngài-têu lì-khôi Âi-khi̍p.
[9] Kì thu ngài-têu to liá-vi, chiông liá-te liù-nen-lâu-me̍t, chhin-phì ke thú-thi su-pûn ngài-têu.
[10] Só-yî, Song-chú â, ngài liá-ha chiông Ngì só-su pûn ngài thú-thi song sîn-chhut ke thú-sán tai-lòi hien-pûn Ngì.’ “Ngì-têu kóng liá-têu fa yî-heu, oi chiông làm-è piong chhai Song-chú — ngì-têu ke Song-ti mien-chhièn, chhai ke-vi kin-pai Kì.
[11] Ngì-têu oi vi Song-chú — ngì-têu ke Song-ti su-pûn ngì-têu ke fûng-sû fôn-hí khoai-lo̍k, ya oi yêu-chhiáng Li-vi-ngìn lâu he̍t chhai ngì-têu tông-chûng ke ngoi-chhu̍k ngìn khiung-ha fôn-hí khoai-lo̍k.
[12] “Ngì-têu mî thi sâm-ngièn, chhiu-he hien sṳ̍p-fûn chṳ̂-yit ke-ngièn, oi chiông ngì-têu thú-sán sû-sṳ̀n ke sṳ̍p-fûn chṳ̂-yit pûn-pûn Li-vi-ngìn, ngoi-chhu̍k ngìn, kû-yì lâu koá-fu, pûn kì-têu chhai ngì-têu ke sàng-chûng lûng-chúng yû-hó sṳ̍t-to páu.
[13] Yèn-heu, ngì-têu oi hiong Song-chú — ngì-têu ke Song-ti kóng: ‘Ngài mò chiông sṳ̀n-sṳn ke sṳ̍p-fûn chṳ̂-yit liù chhai vuk-hâ; ngài yí-kîn cheu Ngì ke min-lin, chiông kì pûn-pûn Li-vi-ngìn, ngoi-chhu̍k ngìn, kû-yì lâu koá-fu. Ngài mò vì-poi ya-he m̀ ki-tet hien sṳ̍p-fûn chṳ̂-yit ke thiàu-li.
[14] Vuk-hâ cho sông-sṳ ke sṳ̀, ngài mò sṳ̍t liá sṳn-vu̍t; chhai lî-ngì song mò chhiang-li ke sṳ̀, ngài ya-mò chiông kì nâ-chhut vuk-ngoi; ngài ya-mò nâ kì cho chi-vu̍t lòi hien-pûn sí-thet ke ngìn. Song-chú — ngài ke Song-ti â, ngài thâng-chhiùng Ngì, chûn-sú Ngì yû-koân hien sṳ̍p-fûn chṳ̂-yit ke yit-chhiet thiàu-li.
[15] Khiù Ngì tui thiên-táng — Ngì ke sṳn-só khon-ku ngài-têu, su-fuk pûn Ngì ke chṳ́-mìn Yî-set-lie̍t. Khiù Ngì cheu Ngì hiong ngài-têu chú-siên só yin-hí ke, kong-fuk pûn Ngì só-su ngài-têu liá-te liù-nen-lâu-me̍t, chhin-phì ke thú-thi.’ ”
[16] “Kîm-pû-ngit, Song-chú — ngì-têu ke Song-ti min-lin ngì-têu chûn-hàng Kì só-yû ke fap-li̍t kie-min; só-yî ngì-têu oi yit-sîm yit-yi khok-sṳ̍t chûn-hàng.
[17] Kîm-pû-ngit, ngì-têu sṳ̀n-ngin Song-chú cho ngì-têu ke Song-ti, ya tap-yin oi chûn-hàng Kì ke tho, chûn-sú Kì ke fap-li̍t, kie-min lâu li-kûi, thâng-chhiùng Kì ke fa.
[18] Kîm-pû-ngit, Song-chú ya cheu Kì ke yin-hí sṳ̀n-ngin ngì-têu cho Kì chhṳ-kâ pó-pi ke chṳ́-mìn, min-lin ngì-têu chûn-hàng Kì só-yû ke kie-min.
[19] Kì oi sṳ́ ngì-têu pí Kì só-chho ke ngim-hò koet-kâ kha khiòng-thai, sṳ́ ngì-têu ke miàng su siung-chan, su chûn-kin. Ngì-têu oi cheu Kì ke yin-hí sàng-cho Song-chú — ngì-têu Song-ti sṳn-kiet ke chṳ́-mìn.”