[1] “Kîm-pû-ngit ngài pân-pu pûn ngì-têu só-yû ke fap-li̍t, ngì-têu yit-thin oi khok-sṳ̍t chûn-hàng, sṳ́ ngì-têu sên-chhùn hâ-hi, ngìn-khiéu chen-tô, yu ngi̍p-hi tet-tó Song-chú yin-hí pûn ngì-têu chú-siên ke-te thú-thi.
[2] Ngì-têu oi fì-sióng, chhai khóng-yâ liù-long liá si-sṳ̍p ngièn-kiên, Song-chú — ngì-têu ke Song-ti ngióng-pân tai-liâng ngì-têu ke lu-chhàng. Kì yung khun-nàn kháu-ngiam ngì-têu, sṳ́ ngì-têu khiâm-pî, sióng-oi tî ngì-têu ke sîm-chṳ, khon ngì-têu he m̀-he hén chûn-hàng Kì ke kie-min.
[3] Song-chú sṳ́ ngì-têu ngo tú-sṳ́, sṳ́ ngì-têu khiâm-pî, yèn-heu chiông mâ-nâ — he ngì-têu lâu ngì-têu ke chú-siên chhiòn-phu m̀-tî he má-ke sṳ̍t-vu̍t su-pûn ngì-têu, yung liá lòi kâu ngì-têu, ngìn ke sên-chhùn m̀-he tân-chhiang kho sṳ̍t-vu̍t, oi kho Song-chú só-kóng ke tak-ki fa.
[4] Liá si-sṳ̍p ngièn lòi, ngì-têu ke sâm-fu mò chok-lan, kiok ya-mò hàng-chúng.
[5] Ngì-têu oi mén-sióng, Song-chú — ngì-têu ke Song-ti kón-kau ngì-têu, chhiu-chhiong â-pâ kón-kau kì ke chṳ́-ńg.
[6] Só-yî, ngì-têu oi kiún-sú Song-chú — ngì-têu Song-ti ke kie-min, chûn-hàng Kì ke tho, kin-vi Kì.
[7] Song-chú — ngì-têu ke Song-ti oi tai-liâng ngì-têu to chhin-chiâng ke thú-thi hi; ke-vi yû hò-pa, chhièn-súi lâu thi-hâ súi hó chṳ̂-yun sân-lak lâu sân-phài;
[8] ke-thi chhut-sán thai-ma̍k, séu-ma̍k, phù-thò, vù-fâ-kó, sa̍k-liù, kám-lám lâu phûng-thòng.
[9] Chhai ke-thi, ngì-têu m̀-voi chai ngo tú-sṳ́, m̀-voi khiam má-ke. Ke-thi ke sa̍k-thèu yû fûng-fu ke thiet-chṳt, sân-tú yû thùng-khóng.
[10] Ngì-têu voi yû-hó sṳ̍t-to páu-páu, ya oi kám-chhia Song-chú — ngì-têu ke Song-ti, yîn-vi Kì chiông chhin-chiâng ke thú-thi su-pûn ngì-têu.”
[11] “Ngì-têu oi se-ngi, cho-m̀-tet m̀ ki-tet Song-chú — ngì-têu ke Song-ti; cho-m̀-tet m̀ chûn-sú Kì só-yû ke kie-min, fap-li̍t lâu li-kûi, chhiu-he ngài kîm-pû-ngit só fûn-fu ngì-têu ke.
[12] Tông ngì-têu sṳ̍t-to páu-chiuk, hí chiâng-chiâng ke vuk-è he̍t,
[13] ngì-têu ke ngiù-yòng, kîm-ngiùn lâu khì-thâ chhòi-sán chhiòn-phu chen-kâ ke sṳ̀,
[14] oi se-ngi! Cho-m̀-tet kiêu-ngau to m̀ ki-tet Song-chú — ngì-têu ke Song-ti. Kì sṳt kiu ngì-têu lì-khôi cho nù-chhòi ke Âi-khi̍p-thi,
[15] thu ngì-têu kîn-ko ke tông-fat, fông-liòng, thu̍k-sà lâu thu̍k-chhùng chhin-tô ke khóng-yâ. Chhai ke châu-châu mò-súi ke só-chhai, Kì sṳ́ tông-ngang ke phàn-sa̍k liù-chhut chhièn-súi, pûn ngì-têu m̀-voi choi-châu.
[16] Chhai khóng-yâ, Kì chiông mâ-nâ, he ngì-têu lâu chú-siên m̀-tî ke sṳ̍t-vu̍t su-pûn ngì-têu. Kì siên yung khun-nàn kháu-ngiam ngì-têu, sṳ́ ngì-têu khiâm-pî, yèn-heu su-pûn ngì-têu mî-hó ke tûng-sî.
[17] Só-yî, m̀-hó láu-tó ngì-têu he kho chhṳ-kâ ke sûng-sú lâu nèn-li̍t sàng-cho hó-ngiak.
[18] Ngì-têu oi ki-tet, he Song-chú — ngì-têu ke Song-ti su-pûn ngì-têu li̍t-liong, sṳ́ ngì-têu hó-ngiak ke. Kì án-ngiòng hó khoán-thai ngì-têu, yîn-vi to kîm-pû-ngit Kì hàn-he sú Kì lâu ngì-têu chú-siên só-li̍p ke yok.
[19] Ngì-têu cho-m̀-tet m̀ ki-tet Song-chú — ngì-têu ke Song-ti, cho-m̀-tet chón-hiong phe̍t ke sṳ̀n-mìn, khúi-pai, fu̍k-sṳ kì-têu. Ngài kîm-pû-ngit kín-ko ngì-têu, na-he ngì-têu lì-khôi Song-chú, yit-thin voi sêu-me̍t.
[20] Na-he ngì-têu m̀ sun-chhiùng Song-chú — ngì-têu ke Song-ti, yit-thin voi me̍t-mòng, chhiu-chhiong Kì oi chhai ngì-têu chhièn-chin ke sṳ̀ sêu-me̍t ke-têu mìn-chhu̍k khiung-yong.”