[1] “Ke-sṳ̀, Song-chú tui ngài kóng: ‘Ngì oi chho̍k lióng-te sa̍k-pán, chhiong yî-chhièn ke lióng-te, yu oi yung piông-é cho yit-ke piong sa̍k-pán ke su khui-é. Ngì oi sông-sân, lòi-to Ngài liá-vi.
[2] Ngài oi chiông ngì piâng-sui ke lióng-te sa̍k-pán mien-táng só-siá ke yok chhùng-sîn siá chhai liá lióng-te sa̍k-pán mien-táng. Ngì oi chiông sa̍k-pán piong chhai khui-tú.’
[3] “Yèn-heu ngài yung kîm-ha̍p-fôn-muk cho yit-chak khui-é, yu chho̍k lióng-te sa̍k-pán, chhiong yî-chhièn ke lióng-te; ngài tai sa̍k-pán sông-sân.
[4] Yî-chhièn ngì-têu chhi-si̍p ke sṳ̀, Song-chú chhai sân-táng tui fó-yam chûng hiong ngì-têu siên-pu sṳ̍p-thiàu kie-min. Kì chiông liá-têu kie-min chhùng-sîn siá chhai liá lióng-te sa̍k-pán, yèn-heu kâu-pûn ngài.
[5] Ngài chón-sṳ̂n hâ-sân, chûn-cheu Song-chú ke min-lin chiông liá lióng-te sa̍k-pán piong chhai ngài chho ke khui-tú, to liá-ha hàn chhai ke-vi.”
[6] (Yî-set-lie̍t-ngìn tui Â-kôn-ngìn ke chiáng ke-vi chhut-fat, lòi-to Mô-sî-lâ. Â-lùn sí chhai ke-vi, mài chhai ke-vi. Kì ke lai-é Yî-li-â-sat sṳ̀n-chiap kì cho chi-sṳ̂.
[7] Yî-set-lie̍t-ngìn lì-khôi ke-vi, lòi-to Kuk-kô-thai, yèn-heu to Yok-pâ-thâ; liá-vi súi-ngièn chhûng-chiuk.
[8] Chhai Hò-lie̍t-sân ke sṳ̀, Song-chú chṳ́-phai Li-vi kî-chhu̍k ke ngìn kông Song-chú ke yok-khui, cho chi-sṳ̂ sṳ-fung Kì, fung Kì ke miàng chuk-fuk. To kîm-pû-ngit, Li-vi kî-chhu̍k ke chṳ́-sûn hàn-he tâm-ngim liá chṳt-fun.
[9] Só-yî, Li-vi kî-chhu̍k mò chhiong khì-thâ kî-chhu̍k pûn-tó thú-thi; kì-têu cheu Song-chú — ngì-têu Song-ti ke yin-hí, hióng-su Song-chú cho kì-têu ke sán-ngia̍p.)
[10] “Chhiong song-pái án-ngiòng, ngài chhai sân-táng thìn-liù si-sṳ̍p ngit-ya; Song-chú yu yit-pái thâng ngài ke khì-tó, tap-yin m̀ sêu-me̍t ngì-têu.
[11] Kì min-lin ngài, ham ngài thu ngì-têu chhut-fat, sṳ́ ngì-têu ngi̍p-hi cham-liâng Kì yin-hí oi su-pûn ngì-têu chú-siên ke thú-thi.”
[12] “Yî-set-lie̍t-ngìn nâ, oi chu-yi thâng Song-chú — ngì-têu ke Song-ti tui ngì-têu ke yêu-khiù. Ngì-têu oi kin-vi Song-chú — ngì-têu ke Song-ti, chûn-hàng Kì ke tho. Ngì-têu oi yit-sîm yit-yi kin-oi Kì, sṳ-fung Kì,
[13] chûn-sú Kì ke kie-min. Vi-tó ngì-têu ke hen-fuk, ngài kîm-pû-ngit hiong ngì-têu pân-pu Song-chú ke fap-li̍t.
[14] Thiên lâu chṳ-kô ke thiên he Song-chú — ngì-têu Song-ti ke; thai-thi lâu thi-song só-yû ke ya chhiòn-phu su̍k Kì.
[15] Song-chú siak ngì-têu ke chú-siên, só-yî tui van-mìn chûng chṳ́-yû kién-sién ngì-têu sàng-cho Kì chhṳ-kâ ke chṳ́-mìn. To kîm-pû-ngit, ngì-têu hàn-he Kì ke sién-mìn.
[16] Só-yî chhiùng-kîm yî-heu, ngì-têu oi chiông sîm-tú ke lá-sap chhù-thet, m̀-hó chai ngang-kiáng.
[17] Yîn-vi Song-chú — ngì-têu ke Song-ti he van-sṳ̀n ke sṳ̀n, van-chú ke Chú. Kì he chṳ-thai, chhiòn-nèn, yin-kôi su kin-vi ke Song-ti. Kì mò phiên-sîm, ya m̀ pûn-ngìn sû-mâi.
[18] Kì vi kû-yì lâu koá-fu sṳ̂n-yên, ya siak ngì-têu tông-chûng ke ngoi-chhu̍k ngìn, su-pûn kì-têu sṳ̍t ke lâu chok ke.
[19] Só-yî, ngì-têu yin-kôi siak ngoi-chhu̍k ngìn, yîn-vi ngì-têu chhai Âi-khi̍p ya cho-ko ngoi-chhu̍k ngìn.
[20] Ngì-têu oi kin-vi Song-chú — ngì-têu ke Song-ti, oi sṳ-fung Kì. Ngì-têu oi tui Kì chûng-sîm, fung Kì ke miàng chang cho-tet fat-sṳ.
[21] Ngì-têu oi chhṳ̂n-siung Kì, yîn-vi Kì he ngì-têu ke Song-ti; ngì-têu chhîn-muk khon-tó Kì vi ngì-têu cho khì-meu ví-thai ke sṳ.
[22] Ngì-têu ke chú-siên to Âi-khi̍p ke sṳ̀ chṳ́-yû chhit-sṳ̍p sà, liá-ha, Song-chú — ngì-têu ke Song-ti sṳ́ ngì-têu ke ngìn-su chen-kâ to chhiong thiên-táng ke sên-é án-tô.”