[1] Yî-ha he Song-chú chhai Mô-ap min-lin Mô-sî lâu Yî-set-lie̍t-ngìn li̍p-yok ke nui-yùng. Liá he Kì thèu-pái chhai Hò-lie̍t-sân lâu kì-têu li̍p-yok yî-ngoi ke.
[2] Mô-sî seu-si̍p só-yû ke Yî-set-lie̍t-ngìn, tui kì-têu kóng: “Ngì-têu chhîn-muk khon-tó Song-chú tui Âi-khi̍p-vòng, kì ke kôn-yèn lâu chhiòn-koet só-cho ke yit-chhiet.
[3] Ngì-têu chhîn-muk khon-tó Song-chú kong-hâ ke-têu tet-ngìn-kiâng ke châi-fo lâu Kì só-hàng ví-thai ke sṳ̀n-chiak khì-sṳ.
[4] Chúng-he to kîm-pû-ngit, Song-chú hàn-mò pûn ngì-têu khok-sṳ̍t mìn-pha̍k ngì-têu só kîn-ngiam ke yû má-ke yi-ngi.
[5] Si-sṳ̍p ngièn-kiú, Song-chú thu ngì-têu kîn-ko khóng-yâ, ngì-têu ke sâm-fu lâu hài chhiòn-phu mò chok-lan.
[6] Ngì-têu mò sṳ̍t-piáng, mò lîm ngiàm-chiú ya-he thâm-chiú, chúng-he Song-chú kiûng-kip ngì-têu só sî-yeu ke yit-chhiet, vi-tó oi sṳ́ ngì-têu ngin-sṳt Kì he Song-chú — ngì-têu ke Song-ti.
[7] Ngì-têu to liá thi-fông ke sṳ̀, Hî-sṳ̍t-pún-vòng Sî-fèn lâu Pâ-sân-vòng Ngo̍k chhut-lòi kûng-tá ngài-têu; ngài-têu chhiu tá-yàng kì-têu,
[8] cham-liâng kì-têu ke thú-thi, chiông thú-thi pûn-pûn Lî-phien, Kâ-tet lióng kî-chhu̍k lâu Mâ-nâ-sî ke pan kî-chhu̍k.
[9] Ngì-têu oi khok-sṳ̍t chûn-hàng liá-yok só-yû ke kûi-thin, sṳ́ ngì-têu só-cho ke chhiòn-phu sun-li.
[10] “Kîm-pû-ngit, ngì-têu kok kî-chhu̍k ke chhu̍k-chóng, chóng-ló, kôn-yèn, lâu Yî-set-lie̍t só-yû ke nàm-ńg ló-yu, lièn he̍t chhai ngì-têu tông-chûng, thoi ngì-têu pho-chhèu khâi-súi ke ngoi-chhu̍k ngìn, chhiòn-phu khî chhai Song-chú — ngì-têu ke Song-ti mien-chhièn;
[12] ngì-têu oi chûn-sú Kì kîm-pû-ngit lâu ngì-têu só li̍p ke yok, hiong ngì-têu só fat ke sṳ.
[13] Án-ngiòng, Song-chú voi cheu chhṳ-kâ hiong ngì-têu só yin-hí ke fa, yu hiong ngì-têu ke chú-siên Â-pak-lâ-hón, Yî-sat, Ngâ-kok só fat ke sṳ, chhiu chhai kîm-pû-ngit li̍p ngì-têu cho Kì ke chṳ́-mìn, Kì cho ngì-têu ke Song-ti.
[14] Song-chú m̀ tân-chhiang lâu ngì-têu li̍p liá-yok, fat liá-sṳ,
[15] Song-chú — ngài-têu ke Song-ti ya lâu ngài-têu kîm-pû-ngit khî chhai Kì mien-chhièn ke ngìn pin mî-yit ke hàn-màng chhut-se ke chṳ́-chṳ́ sûn-sûn li̍p-yok.
[16] “Ngì-têu ki-tet chhai Âi-khi̍p ko ngióng-pân ke sên-fa̍t, kîn-ko khì-thâ ngoi-chhu̍k ke koet-kâ yu he ngióng-pân ke chhìn-khóng.
[17] Ngì-têu khon-tó kì-têu yung su-thèu, sa̍k-thèu, kîm-ngiùn chṳ-chho sià-ok ke ngiéu-siong.
[18] Ngì-têu kîm-pû-ngit khî chhai liá-vi ke ngìn, mò-lun nàm-ńg, kâ-chhu̍k lâu kî-chhu̍k, cho-m̀-tet yû yit-sà sîm-kôn lì-khôi Song-chú — ngài-têu ke Song-ti, hi pai phe̍t-koet ke sṳ̀n-mìn; na-he yû, chhiu voi chhiong su-kîn sâng-chhut yu-fú yu-thu̍k ke su-é.
[19] Ngì-têu kîm-pû-ngit khî chhai liá-vi, thâng-tó liá-têu chu-chú ke ngìn, mò yit-sà kám kóng, ‘Chhiu-son ngài ngang-kiáng m̀-su yok-suk, yit-chhiet hàn voi sun-li’. Na-he yû án-ngiòng ke ngìn, kì voi lièn-lui ngì-têu, sṳ́ hó-ngìn fái-ngìn khiung-ha me̍t-mòng.
[20] Song-chú chhie̍t-tui m̀-voi sa-miên liá-chúng ngìn; Kì voi tui kì thai fat-khién. Fap-li̍t-sû song só-siá ke chu-chú chhiòn-phu voi lìm-to kì ke sṳ̂n-song, yit-chhṳ̍t to Song-ti vàn-chhiòn chhù-thet kì ke miàng.
[21] Song-chú thin-chho̍k oi nâ kì cho li-é lòi kín-ko Yî-set-lie̍t kok kî-chhu̍k, cheu liá Fap-li̍t-sû lâu li̍p-yok só ki-chai ke kok-chúng chu-chú, sṳ́ châi-nan lìm-to kì sṳ̂n-song.
[22] “Ngì-têu ke chṳ́-sûn lâu yén-fông ke ngoi-chhu̍k ngìn voi khon-tó Song-chú kong châi-fo lâu phiang-thung chhai ngì-têu ke thú-thi song.
[23] Thièn-yèn voi fông-fi, chhiòn-thi phiên-mân liù-vòng lâu yàm, mò fap-thu kâng-chung, lièn chha̍p-chhó ya m̀-voi sâng. Ngì-têu ke thú-thi voi chhiong Song-chú chhai thai fat-khién chṳ̂-ha fí-fái ke Só-tô-mâ, Ngò-mô-lâ, Ap-mâ, Sé-pién ke-têu sàng-sṳ.
[24] Ke-sṳ̀, thiên-ha ke ngìn voi mun: ‘Song-chú cho-má-ke án-ngiòng tui-thai liá-thi nè? Kì cho-má-ke án-ngiòng thai fat-khién nè?’
[25] Yû-ngìn voi en-kóng: ‘Yîn-vi Song-chú ke chṳ́-mìn vì-phoi Song-chú — kì-têu chú-siên ke Song-ti lâu kì-têu só li̍p ke yok; liá-yok he Song-chú tai-liâng kì-têu lì-khôi Âi-khi̍p heu lâu kì-têu só li̍p ke.
[26] Kì-têu lì-khôi Song-chú hi fu̍k-sṳ phe̍t ke sṳ̀n-mìn, hi pai ke-têu chhiùng-lòi m̀-sṳt pai-ko, Song-chú kim-chṳ́ kì-têu pai ke sṳ̀n-mìn.
[27] Só-yî, Song-chú tui kì-têu fat-khién, sṳ́ liá sû-song só ki-chai ke chu-chú kong chhai kì-têu ke thú-thi song.
[28] Song-chú chhai thai fat-fó chûng, thai fat-khién, tui kì-têu ke thú-thi song chiông kì-têu lièn-kîn pâng chhut-lòi, fit-to ngoi-koet hi. Kîm-pû-ngit kì-têu hàn chhai ke-vi.’
[29] “O-pi ke sṳ he su̍k Song-chú — ngài-têu ke Song-ti; chúng-he hién-mìn ke sṳ yún-yén su̍k ngài-têu lâu ngài-têu ke chṳ́-sûn, vi-tó oi ngài-têu chûn-hàng liá fap-li̍t yit-chhiet ke fa.”