[1] “Ngì-têu na-he thâng-chhiùng Song-chú — ngì-têu ke Song-ti, khok-sṳ̍t chûn-hàng ngài kîm-pû-ngit pân-pu pûn ngì-têu só-yû ke kie-min, Kì chhiu voi sṳ́ ngì-têu pí thiên-ha só-yû ke koet-kâ kha khiòng-thai.
[2] Ngì-têu thâng-chhiùng Song-chú — ngì-têu ke Song-ti, chhiu voi tet-tó liá só-yû ke fuk-hi:
[3] “Song-chú voi su-fuk pûn ngì-têu ke sàng-chṳ́n lâu thièn-yèn.
[4] “Song-chú voi su-fuk pûn ngì-têu tô-chṳ́ tô-sûn, ńg-kuk fûng-tên, ngiù-yòng hîn-vong.
[5] “Song-chú voi su-fuk pûn ngì-têu ke mí-lò lâu kiâu-mien ke phùn-è.
[6] “Song-chú voi sṳ́ ngì-têu chhut-ngi̍p phìn-ôn, sṳ-sṳ mùng-fuk.
[7] “Song-chú voi sṳ́ chhièn-lòi kûng-tá ngì-têu ke thi̍t-ngìn tá-sû. Kì-têu tui yit-ke fông-hiong lòi kûng-tá ngì-têu, chúng-he voi hiong si-mien pat-fông thò-chéu.
[8] “Song-chú voi su-fuk pûn ngì-têu ke sṳ-ngia̍p, sṳ́ ngì-têu ke chhông-khu chông-mân liòng-sṳ̍t. Song-chú — ngì-têu ke Song-ti voi chhai Kì su-pûn ngì-têu ke thú-thi song su-fuk pûn ngì-têu.
[9] “Ngì-têu na-he chûn-sú Song-chú — ngì-têu Song-ti ke kie-min, chûn-hàng Kì ke tho, Kì voi cheu chhṳ-kâ ke yin-hí li̍p ngì-têu cho Kì sṳn-kiet ke chṳ́-mìn.
[10] Thiên-ha van-mìn khon-tó Song-chú kién-sién ngì-têu cho chhṳ-kâ ke chṳ́-mìn chhiu voi kiâng ngì-têu.
[11] Song-chú voi chhai Kì hiong ngì-têu chú-siên yin-hí oi su-pûn ngì-têu ke thú-thi song, su-fuk pûn ngì-têu tô-chṳ́ tô-sûn, ńg-kuk fûng-tên, ngiù-yòng hîn-vong.
[12] Song-chú voi tá-khôi thiên-táng fûng-fu ke chhông-khu, cheu-sṳ̀ lo̍k-yí chṳ̂-yun ngì-têu ke thièn-yèn, sṳ́ ngì-têu ke sṳ-ngia̍p mùng-fuk, sṳ́ ngì-têu fu-chiuk yû-chhûn; ngì-têu voi yû-hó chia-pûn chhin-tô koet, me m̀-sṳ́ hiong phe̍t-koet chia.
[13] Ngì-têu na khok-sṳ̍t chûn-hàng ngài kîm-pû-ngit hiong ngì-têu pân-pu, Song-chú — ngì-têu Song-ti só-yû ke kie-min, Kì chhiu voi sṳ́ ngì-têu chhai lie̍t-koet chûng cho thèu mò cho mî, m̀-voi pûn lie̍t-koet kón, koet-kâ ôn-thin, yún-yén m̀-voi sôi-phai.
[14] Chúng-he ngì-têu chhie̍t-tui cho-m̀-tet phiên-chó phiên-yu, vì-poi Kì ke kie-min, ya cho-m̀-tet pai phe̍t ke sṳ̀n-mìn.”
[15] “Na-he ngì-têu m̀ thâng-chhiùng Song-chú — ngì-têu ke Song-ti, m̀ khok-sṳ̍t chûn-hàng ngài kîm-pû-ngit pân-pu pûn ngì-têu só-yû ke fap-li̍t kie-min, ngì-têu chhiu voi su-tó yî-ha kok-chúng chu-chú:
[16] “Song-chú voi chu-chú ngì-têu ke sàng-chṳ́n lâu thièn-yèn.
[17] “Song-chú voi chu-chú ngì-têu ke mí-lò lâu kiâu-mien ke phùn-è.
[18] “Song-chú voi chu-chú ngì-têu ke chṳ́-sûn, ńg-kuk lâu ngiù-yòng.
[19] “Song-chú voi sṳ́ ngì-têu chhut-ngi̍p tù-tó châi-nan, fàm-sṳ su chu-chú.
[20] “Na-he ngì-têu chok-ok, lì-khôi Song-chú, Kì chhiu voi sṳ́ ngì-têu tù-tó châi-nan, fun-lon lâu khun-nàn; só-yû kûng-chok chhiòn-phu m̀-voi sun-li, tông-kiak chhiu voi me̍t-mòng.
[21] Song-chú voi sṳ́ ngì-têu lûng-chúng chhe-tó chhòn-ngiam-phiang, chhṳ̍t-to ngì-têu chhai oi ngi̍p-hi cham-liâng ke thú-thi song me̍t-thet.
[22] Song-chú voi yung hi-phiang, thu̍k-chhông, ngie̍t-phiang sông-hoi ngì-têu, yu yung sêu-fûng lâu thiên-hôn fí-me̍t ngì-têu ke ńg-kuk, yit-chhṳ̍t to ngì-têu chhiòn-phu me̍t-thet.
[23] Thiên voi chhiong thùng cho ke, m̀-voi lo̍k-yí, thi voi chhiong thiet án-ngang.
[24] Song-chú voi sṳ́ ngì-têu ke thú-thi chṳ́-yû fôi-chhṳ̀n lâu fûng-sâ, chhṳ̍t-to Kì chiông ngì-têu chhiòn-phu sêu-me̍t.
[25] “Song-chú voi sṳ́ thi̍t-ngìn tá-yàng ngì-têu. Ngì-têu tui yit-ke fông-hiong kûng-tá kì-têu, chúng-he ngì-têu voi hiong si-mien pat-fông thò-chéu. Thiên-ha van-mìn khon-tó ngì-têu só su-tó ke châi-nan chhiòn-phu voi chho̍k-kiâng.
[26] Fî-niâu lâu chhu-lui voi lòi-sṳ̍t ngì-têu ke sṳ̂n-sṳ̂; mò-ngìn hó kiuk kì-têu chéu.
[27] Song-chú voi sṳ́ ngì-têu pot chhông-é, chhiong Kì yî-chhièn sṳ́ Âi-khi̍p-ngìn pot chhông-é yit-yong. Kì voi sṳ́ ngì-têu chhiòn-sṳ̂n pot-sién, yu-thung yu-yông, mò fap-thu yî-chhṳ.
[28] Song-chú voi sṳ́ ngì-têu pot-tiên, mô-muk, sîm-sṳ̀n lon-lon.
[29] Ngit-sṳ̀-thèu, ngì-têu voi chhiong mô-muk-è chhai vû-am chûng miâ-lòi miâ-hi. Ngì-têu ke sṳ-ngia̍p voi m̀ sun-li. Ngì-têu sòng-sòng voi pûn-ngìn khî-fu, pûn-ngìn chhióng, mò-ngìn hó kiu ngì-têu.
[30] “Lâu ngì-têu thin-chhîn ke se-moi-é, voi yû phe̍t-ke nàm-ngìn hi khiòng-khiòng lâu kì soi-muk. Ngì-têu hí-vuk, mò fap-thu ngi̍p-hi he̍t; ngì-têu chung phù-thò-yèn, sṳ̍t m̀-tó phù-thò.
[31] Ngì-têu voi khon-tó phe̍t-ngìn chhṳ̀ ngì-têu ke ngiù, chúng-he ngì-têu sṳ̍t m̀-tó ngiù-ngiuk. Ngì-têu voi khon-tó chhṳ-kâ ke lì-è pûn-ngìn chhióng-hi, chúng-he thó m̀ chón-lòi. Ngì-têu ke yòng-khiùn voi pûn thi̍t-ngìn kiuk-hi, mò-ngìn hó then-sú chhióng chón-lòi.
[32] Ngì-têu voi muk kîm-kîm khon-tén chhṳ-kâ ke chṳ́-ńg pûn ngoi-chhu̍k ngìn chok-hi cho nù-chhòi, tak-ngit tén kì-têu chón-lòi, tén-to muk-chû chhiâng-miâng, chúng-he chhiòn mò-li̍t kiu kì-têu.
[33] Ngì-têu só m̀ ngin-sṳt ke yit-ke mìn-chhu̍k voi chhióng-chéu ngì-têu sat-mâng kâng-chung ke chhut-sán; ngì-têu fán-chón voi sòng-sòng pûn-ngìn khî-fu, ap-pet.
[34] Ngì-têu voi yîn-vi chhîn-muk só khon-tó ke châi-nan lòi pot-tiên.
[35] Song-chú voi sṳ́ ngì-têu sûng-kiok lièn chhit-thèu pot chhông-é, tui kiok-tái to thèu-nà pot thu̍k chhông-é, mò fap-thu yî-hó.
[36] “Song-chú voi chiông ngì-têu lâu ngì-têu só-li̍p ke kiûn-vòng kiuk-to ngoi-koet, to ngì-têu lâu ngì-têu chú-siên mò he̍t-ko ke só-chhai hi; ngì-têu voi chhai ke-vi pai su-é lâu sa̍k-thèu chho ke sṳ̀n-mìn.
[37] Chhai Song-chú kiuk ngì-têu hi ke koet-kâ, ke-vi ke ngìn voi yîn-vi ngì-têu só tù-tó ke châi-nan lòi chho̍k-kiâng; kì-têu voi seu ngì-têu, sâu-nat ngì-têu.
[38] “Ngì-têu ve-chúng tô, chúng-he sû-sṳ̀n séu, yîn-vi chhó-máng voi sṳ̍t-thet ńg-kuk.
[39] Ngì-têu châi-chung, cheu-ku phù-thò-yèn, chúng-he chak m̀-tó phù-thò, lîm m̀-tó phù-thò chiú, yîn-vi phù-thò-su voi pûn chhùng-è sṳ̍t-thet.
[40] Sûi-yèn ngì-têu ke thú-thi yû chhin-tô kám-lám-su, chúng-he mò kám-lám-yù hó-yung, yîn-vi kám-lám màng siuk chhiu voi lut chhiang-chhiang.
[41] Ngì-têu sên-yông chṳ́-ńg, chúng-he kì-têu voi tá m̀ kien-thet, yîn-vi kì-têu voi pûn-ngìn chok-chéu.
[42] Ngì-têu ke su-é lâu ńg-kuk chhiòn-phu voi pûn hoi-chhùng sṳ̍t chhiang-chhiang.
[43] “He̍t chhai ngì-têu tông-chûng ke ngoi-chhu̍k ngìn ye̍t-lòi ye̍t hîn-vong; chúng-he ngì-têu voi kín lòi kín sôi-mì.
[44] Kì-têu yû-chhièn chia-pûn ngì-têu; chúng-he ngì-têu mò-chhièn hó chia-pûn kì-têu. Kì-têu voi cho thèu, ngì-têu voi cho mî pûn kì-têu kón.
[45] “Liá-têu chu-chú chhiòn-phu voi lìm-to ngì-têu sṳ̂n-song, kiuk-tó ngì-têu, chhṳ̍t-to ngì-têu chhiòn-phu me̍t-mòng; yîn-vi ngì-têu m̀ thâng-chhiùng Song-chú — ngì-têu ke Song-ti, m̀ chûn-sú Kì kâu-pûn ngì-têu ke só-yû fap-li̍t kie-min.
[46] Liá-têu chu-chú voi chhiong sṳ̀n-chiak án-ngiòng sṳ̍t-hien, lòi-cho Song-ti sṳ́m-phan ngì-têu lâu ngì-têu ke chṳ́-sûn yún-yén ke chṳn-kí.
[47] Song-chú — ngì-têu ke Song-ti chhai tak fông-mien su-fuk pûn ngì-têu, chúng-he ngì-têu he mò kâm-sîm lo̍k-yi lòi sṳ-fung Kì;
[48] só-yî, ngì-têu voi fu̍k-sṳ Song-chú phai-lòi kûng-tá ngì-têu ke thi̍t-ngìn. Ngì-têu voi ngo tú-sṳ́, choi-châu, chhak-sṳ̂n lu-thí, má-ke chhiu mò lé. Song-chú voi sṳ́ ngì-têu kâ thiet-kâ, yit-chhṳ̍t to ngì-têu chhiòn-phu me̍t-mòng.
[49] Song-chú voi sṳ́ yén-fông ke yit-ke koet-kâ lòi, chhiu-chhiong ên-tiâu yit-yong, fut-yèn-kiên pî-lòi kûng-tá ngì-têu. Kì-têu ke fa ngì-têu thâng m̀-sṳt;
[50] kì-têu fî-sòng hiûng-ok, mò chûn-kin ló-ngìn-kâ, me mò thí-sit se-ngìn-è.
[51] Kì-têu voi chiông ngì-têu ke thèu-sâng lâu thú-sán sṳ̍t chhiang-chhiang, mò-lun ńg-kuk, sîn-chiú, kám-lám-yù, ngiù-yòng chhiòn-mò liù hâ-lòi, chhṳ̍t-to ngì-têu me̍t-thet.
[52] Kì-têu voi pâu-vì Song-chú — ngì-têu ke Song-ti oi su-pûn ngì-têu ke thú-thi song tak-ke sàng-chṳ́n; ngì-têu só yí-kho ke-têu kô-thai kiên-ku ke sàng-chhiòng chhiòn-phu voi vang-thet.
[53] “Thi̍t-ngìn vì-khun ngì-têu ke sàng-chṳ́n ke sṳ̀, ngì-têu voi yîn-vi mò tûng-sî hó-sṳ̍t chhiu sṳ̍t chhṳ-kâ ke kut-ngiuk, chhiu-he Song-chú — ngì-têu ke Song-ti su-pûn ngì-têu ke chṳ́-ńg.
[54] Ngì-têu su vì-khun ke sṳ̀, ngì-têu chûng-kiên lièn sîm-chhòng tông-ngiôn ke nàm-ngìn ya voi yîn-vi ngo tú-sṳ́ chhiu sṳ̍t chhṳ-kâ ke chṳ́-ńg, yîn-vi mò tûng-sî hó-sṳ̍t! Lièn chhṳ-kâ ke hiûng-thi, só-siak ke pû-ngiòng, ya-he só-chhûn ke chṳ́-ńg, kì ya m̀-hén pûn-pûn kì-têu sṳ̍t.
[56] Ngì-têu chûng-kiên chui yu-siu, kô-kui, lièn kiok-tái me m̀-sṳt tha̍p thi ke fu-ngìn-kâ ya voi pien-to sîm-kôn tông-thu̍k. Thi̍t-ngìn vì-khun sàng-chṳ́n ke sṳ̀, kì voi yîn-vi mò tûng-sî hó-sṳ̍t, thêu-thêu-é sṳ̍t-thet chhṳ-kâ kiung ke ô-nga-é lâu pâu-yî. Lièn kì só-siak ke ló-kûng ya-he chhûn-tó ke chṳ́-ńg, kì ya m̀-hén pûn-pûn kì-têu sṳ̍t.
[58] “Na-he ngì-têu m̀ khok-sṳ̍t chûn-hàng liá sû-hong só ki-chai Song-ti só-yû ke fap-li̍t, m̀ kin-vi Song-chú — ngì-têu ke Song-ti yùng-yeu khó-vi ke sṳn-miàng,
[59] Song-chú voi sṳ́ ngì-têu lâu ngì-têu ke chṳ́-sûn pot-tó tet-ngìn-kiâng ke thai-phiang, chhiu-he yu kiú yu thung ke phiang-chṳn.
[60] Âi-khi̍p-ngìn só pot, ke-têu tet-ngìn-kiâng ke phiang-thung, Kì voi sṳ́ ngì-têu pot, yún-yén yî m̀-hó.
[61] Song-chú ya voi sṳ́ ngì-têu pot liá Fap-li̍t-sû mò siá ke kok-chúng phiang-thung lâu vûn-é, chhṳ̍t-to ngì-têu chhiòn-phu me̍t-mòng.
[62] Sûi-yèn ngì-têu ke ngìn-khiéu chhiong thiên-táng ke sên-é án-tô, chúng-he chhûn hâ-lòi ke ngìn voi chhin-séu, yîn-vi ngì-têu m̀ thâng-chhiùng Song-chú — ngì-têu ke Song-ti.
[63] Song-chú sṳt hó khoán-thai ngì-têu, fôn-hí sṳ́ ngì-têu fat-tha̍t; cheu-yong, Kì ya voi phan-tet sêu-me̍t ngì-têu, sṳ́ ngì-têu me̍t-mòng. Ngì-têu voi tui ke oi ngi̍p-hi cham-liâng ke thú-thi song pûn Kì lièn-kîn pâng-thet.
[64] “Song-chú voi chiông ngì-têu kiuk-to kok-koet, fûn-san to chhiòn sṳ-kie. Ngì-têu voi chhai ke-vi pai su-é lâu sa̍k-thèu chho ke sṳ̀n-mìn, chhiu-he ngì-têu lâu ngì-têu ke chú-siên m̀-sṳt pai-ko ke sṳ̀n-mìn.
[65] Ngì-têu mò-lun hi-to nai-koet m̀-voi yû phìn-ôn, mò vi-só hó lo̍k-kiok. Song-chú voi sṳ́ ngì-têu chhûng-mân sèu-li, muk-chû sṳt-mìn, sîm-sṳ̀n chhie̍t-mong.
[66] Ngì-têu ke sin-miang mò-thin mò-chho̍k, sîm-chûng chhûng-mân kiâng-hiám, ngit-ya mien-lìm sí-mòng.
[67] Ngì-têu só khon-tó ke yit-chhiet voi hoi ngì-têu kiâng-to mò-kat mò-sat, chêu-sṳ̀n tén m̀-tet to am-pû, am-pû tén m̀-tet to thiên-kông.
[68] Sûi-yèn Song-chú kóng-ko ngì-têu m̀-voi chai khon-tó Âi-khi̍p, Kì hàn-he voi yung nù-chhòi-sòn sung ngì-têu chón-hi. Chhai ke-vi, chhiu-son ngì-têu sióng-oi mai-sṳ̂n cho thi̍t-ngìn ke nù-chhòi lâu nù-pî, chúng-he mò-ngìn voi mâi ngì-têu.”