[1] Song-chú ke phu̍k-ngìn Mô-sî sí-thet heu, Song-chú tui Mô-sî ke chhu-sú — Nun ke lai-é Yok-sû-â kóng:
[2] “Ngài ke phu̍k-ngìn Mô-sî sí-thet lé; liá-ha ngì oi chún-phi tai-liâng só-yû ke Yî-set-lie̍t-ngìn ko Yok-tan-hò, to Ngài oi su-pûn ngì-têu ke thú-thi hi.
[3] Cheu Ngài yin-hí Mô-sî ke, ngì-têu tha̍p-ko ke thi-fông, Ngài chhiòn-phu oi su-pûn ngì-têu.
[4] Ngì-têu ke koet-kie voi tui nàm-phién ke sâ-mo̍k, chhṳ̍t-to pet-phién ke Lì-pâ-nun-sân, tui tûng-phién ke Yu-fat-lâ-tí-hò, kîn-ko Het-ngìn chhiòn-thi, to sî-phién ke Thi-chûng-hói.
[5] Yok-sû-â â, ngì chhai sâng ke ngit-è, mò yit-ke ngìn yû khó-nèn tá-yàng ngì. Ngài oi lâu ngì khiung-ha, chhiong Ngài lâu Mô-sî khiung-ha yit-yong. Ngài yit-thin m̀-voi fit-thet ngì, chhie̍t-tui m̀-voi lì-khôi ngì.
[6] Ngì oi kiên-khiòng, oi yúng-kám, yîn-vi ngì oi tai-liâng liá ngìn-mìn hi cham-liâng Ngài yin-hí pûn kì-têu chú-siên ke thú-thi.
[7] Ngì oi kiên-khiòng, chhin yúng-kám, khok-sṳ̍t chûn-sú Ngài phu̍k-ngìn Mô-sî kâu-pûn ngì ke chhiòn-phu fap-li̍t, m̀ phiên-chó m̀ phiên-yu, ngì mò-lun hi-to nai-vi, yit-thin voi fàm-sṳ sun-li.
[8] Liá Fap-li̍t-sû ngì oi chhòng-theu thu̍k, ngit-ya sṳ̂-sióng, sṳ́ ngì voi ngin-chṳ̂n chûn-sú liá sû tî-poi só-siá ke fa. Án-ngiòng, ngì chhiu voi sṳ̀n-kûng, fàm-sṳ sun-li.
[9] Ngì oi ki-tet Ngài ke min-lin: Oi kiên-khiòng, oi yúng-kám! M̀-sṳ́ kiâng, m̀-hó sṳt-chṳ; yîn-vi ngì mò-lun to nai-vi, Ngài, Song-chú — ngì ke Song-ti yit-thin voi lâu ngì khiung-ha.”
[10] Yok-sû-â fûn-fu ngìn-mìn ke-têu liâng-chhiu,
[11] oi to yàng-chûng tak só-chhai hi siên-pu: “Ngì-têu oi chún-phi sṳ̍t-vu̍t, yîn-vi sâm-ngit nui ngì-têu oi ko Yok-tan-hò, ngi̍p-hi cham-liâng Song-chú — ngì-têu ke Song-ti oi su-pûn ngì-têu ke thú-thi.”
[12] Yok-sû-â tui Lî-phien, Kâ-tet lióng kî-chhu̍k, pin Mâ-nâ-sî pan kî-chhu̍k ke ngìn kóng:
[13] “Ngì-têu oi ki-tet Song-chú ke phu̍k-ngìn Mô-sî fûn-fu ko ngì-têu ke fa: ‘Song-chú — ngì-têu ke Song-ti chiông Yok-tan-hò tûng-phién liá-te thú-thi su-pûn ngì-têu, pûn ngì-têu ôn-tún hó-se.’
[14] Ngì-têu ke pû-ngiòng, chṳ́-ńg lâu thèu-sâng oi liù chhai liá-vi; chúng-he ngì-têu ke chan-sṳ oi chông-phi hó-se, chhai Yî-set-lie̍t thùng-pâu thèu-chhièn tá thèu-chhṳn, siên ko Yok-tan-hò. Ngì-têu oi lâu kì-têu khiung-ha hi siông-chhṳ̀,
[15] chhṳ̍t-to kì-têu cham-liâng Yok-tan-hò sî-phién, chhiu-he Song-chú — ngì-têu ke Song-ti su-pûn kì-têu ke thú-thi. Kì-têu chhai ke-vi ôn-tún hó-se yî-heu, ngì-têu chang cho-tet chón Yok-tan-hò tûng-phién, to Song-chú ke phu̍k-ngìn Mô-sî pûn ngì-têu ke thú-thi.”
[16] Kì-têu en Yok-sû-â: “Ngì min-lin ngài-têu cho má-ke, ngài-têu chhiu cho má-ke; ngì phai ngài-têu to má-ke thi-fông hi, ngài-têu chhiu to má-ke thi-fông hi.
[17] Ngài-têu voi thâng-chhiùng ngì, chhiong ngài-têu thèu-pái ngin-chṳ̂n thâng-chhiùng Mô-sî khiung-yong. Chúng-he, ngien Song-chú — ngì ke Song-ti lâu ngì khiung-ha, chhiu-chhiong Kì lâu Mô-sî khiung-ha yit-yong.
[18] Má-ngìn fán-khong ngì ke min-lin, m̀ thâng-chhiùng ngì ke chṳ́-fî, má-ngìn chhiu oi chhú-sí. Chúng-he, ngì oi kiên-khiòng, oi yúng-kám!”