[1] “Na-he yû ngìn thó pû-ngiòng heu fat-hien kì yû kien-seu ke hàng-vì chhiu m̀-siak kì, siá lì-fûn sû pûn kì, ham kì lì-khôi;
[2] na-he liá-ke pû-ngiòng lì-khôi heu, hi lâu phe̍t-ngìn kiet-fûn,
[3] thi-ngi ke ló-kûng ya m̀-siak kì, siá lì-fûn sû pûn kì, ham kì lì-khôi; ya-he liá-ke ló-kûng sí-thet;
[4] mò-lun chhai nai-chúng chhìn-hìn chṳ̂ ha, kì ke chhièn-fû cho-m̀-tet chai lâu kì kiet-fûn. Yîn-vi tui kì ke chhièn-fû lòi-kóng, kì yí-kîn pûn-ngìn tá-lá-sap lé. Na-he chhièn-fû chai lâu kì kiet-fûn, chhiu-he mo-fam Song-chú. Ngì-têu yit-thin cho-m̀-tet chhai Song-chú — ngì-têu ke Song-ti oi su-pûn ngì-têu ke thú-thi song fam Kì só chhin-nâu ke chhui.”
[5] “Cho-m̀-tet ham chang kiet-fûn ke ngìn cho-pîn, ya cho-m̀-tet ham kì tâm-ngim kûng-chṳt; oi pûn kì yû yit-ngièn ke ká-khì, liù chhai vuk-hâ, pûn pû-ngiòng khoai-lo̍k.
[6] “Cho-m̀-tet nâ ngìn ke mo-sa̍k ya-he song-tún cho tí-ap, yîn-vi án-ngiòng voi hoi kì mò phan-fap sên-fa̍t.
[7] “Na-he yû-ngìn póng-ka Yî-set-lie̍t thùng-pâu, khiòng-pet kì cho nù-phu̍k, ya-he chiông kì mai-cho nù-chhòi, ke póng-ka ngìn ke chhiu yit-thin oi chhú-sí. Ngì-têu oi tui ngì-têu tông-chûng chhù-thet liá-chúng fái-sṳ.
[8] “Ngì-têu na-he pot chhòn-ngiam-sin ke phì-fû-phiang, yit-thin oi cheu Li-vi chi-sṳ̂ só chṳ́-kau ngì-têu ke ngin-chṳ̂n hi-cho; ngì-têu oi cheu ngài min-lin kì-têu ke, khok-sṳ̍t chûn-hàng.
[9] Oi ki-tet, ngì-têu lì-khôi Âi-khi̍p heu, Song-chú — ngì-têu ke Song-ti sṳt chhai lu-thù chûng ngióng-pân tui-thai Mî-li-ôn.
[10] “Ngì-têu mò-lun chia-pûn ngìn má-ke, cho-m̀-tet ngi̍p kì vuk-hâ, chhṳ-kâ tho̍k oi cho tí-ap ke tûng-sî;
[11] oi chhai ngoi-poi, tén kì chhîn-chhṳ chiông tí-ap-phín nâ chhut-lòi kâu-pûn ngì-têu.
[12] Kì na-he khiùng-ngìn, yu nâ ngoi-sâm kâu-pûn ngì-têu, ngì-têu cho-m̀-tet chiông liá tí-ap-phín liù-to thi-ngi ngit;
[13] oi chhai ke-ngit, ngit-thèu lo̍k-sân ke sṳ̀, chiông ngoi-sâm vàn-pûn kì, pûn kì cho-tet nâ-lòi cho phî koi-tén soi-muk. Án-ngiòng, kì voi kám-kit ngì-têu; Song-chú — ngì-têu ke Song-ti ya voi khon liá kûng-ngi ke sṳ, lòi tui ngì-têu fôn-hí.
[14] “Khun-khú, phìn-khiùng ke kûng-ngìn, mò-lun he Yî-set-lie̍t thùng-pâu ya-he chhiam-sṳ̀ he̍t chhai ngì-têu sàng-tú ke ngoi-chhu̍k ngìn, ngì-têu chhiòn-phu cho-m̀-tet khî-fu kì.
[15] Oi chhai ngit-thèu lo̍k-sân yî-chhièn fu-pûn kì ke-ngit ke kûng-chhièn, yîn-vi kì sî-yeu chhièn; kì kho kûng-chhièn vì-chhṳ̀ sên-fa̍t. Ngì-têu na-he m̀ fu-pûn kì, kì hiong Song-chú khúng-ko, ngì-têu chhiu yû-chhui lé.
[16] “Yà-ôi mò yin-kôi yîn-vi chṳ́-ńg só-fam ke chhui lòi chhú-sí; chṳ́-ńg ya mò yin-kôi yîn-vi yà-ôi só-fam ke chhui lòi chhú-sí. Tak-sà yin-tông tâm-tông chhṳ-kâ só-fam ke chhui.
[17] “Cho-m̀-tet chhîm-fam ngoi-chhu̍k ngìn ya-he kû-yì ke khièn-li; ya cho-m̀-tet nâ koá-fu ke sâm-fu cho tí-ap.
[18] Oi ki-tet, ngì-têu chhai Âi-khi̍p cho-ko nù-chhòi. Song-chú — ngì-têu ke Song-ti kiu-su̍k ngì-têu lì-khôi ke-vi, só-yî ngài min-lin ngì-têu oi chûn-hàng liá kie-min.
[19] “Ngì-têu sû-sṳ̀n ke sṳ̀, leu-thet mò tai-chón vuk-hâ ke ńg-kuk, cho-m̀-tet to-chón hi-nâ; oi liù chhai thièn-tú, pûn ngoi-chhu̍k ngìn, kû-yì lâu koá-fu hi-ngiâm. Án-ngiòng, Song-chú — ngì-têu ke Song-ti voi fàm-sṳ su-fuk pûn ngì-têu.
[20] Ngì-têu tá kám-lám, tá yit-lîn yî-heu, cho-m̀-tet to-chón hi tá mò tá-tó ke; oi chiông chhûn-tó ke liù-pûn ngoi-chhu̍k ngìn, kû-yì lâu koá-fu.
[21] Ngì-têu chak phù-thò, chak yit-lîn yî-heu, cho-m̀-tet to-chón hi-chak mò chak-tó ke; oi chiông chhûn-tó ke liù-pûn ngoi-chhu̍k ngìn, kû-yì lâu koá-fu.
[22] Oi ki-tet, ngì-têu chhai Âi-khi̍p cho-ko nù-chhòi, só-yî ngài min-lin ngì-têu oi chûn-hàng liá kie-min.”