[1] Mô-sî ki-siu̍k tui Yî-set-lie̍t ngìn-mìn kóng:
[2] “Liá-ha ngài yí-kîn yit-pak ngi-sṳ̍p se, mò fap-thu ki-siu̍k tai-liâng ngì-têu lé. Song-chú ya yí-kîn lâu ngài kóng, ngài cho-m̀-tet ko Yok-tan-hò.
[3] Song-chú — ngì-têu ke Song-ti voi chhai ngì-têu thèu-chhièn chhîn-chhṳ tai-liâng ngì-têu ko-hi, sêu-me̍t ke-thi ke kok mìn-chhu̍k, sṳ́ ngì-têu cham-liâng kì-têu ke thú-thi. Cheu Song-chú só-kóng ke, Yok-sû-â oi cho ngì-têu ke liâng-chhiu thu ngì-têu ko-hi.
[4] Song-chú ngióng-pân tá-yàng Â-mô-li ke lióng-ke vòng — Sî-fèn lâu Ngo̍k, fí-fái kì-têu ke koet-kâ, ya oi cheu-yong sêu-me̍t ke-phién ke kok mìn-chhu̍k.
[5] Song-chú oi chiông kì-têu kâu-pûn ngì-têu; ngì-têu yit-thin oi cheu ngài ke min-lin tui-fu kì-têu.
[6] Oi kiên-khiòng, oi yúng-kám, m̀-sṳ́ kiâng kì-têu, yîn-vi Song-chú — ngì-têu ke Song-ti oi lâu ngì-têu khiung-ha hi. Kì m̀-voi lì-khôi ngì-têu, m̀-voi fit-thet ngì-têu.”
[7] Yèn-heu, Mô-sî ham Yok-sû-â lòi, chhai Yî-set-lie̍t chung-ngìn mien-chhièn tui kì kóng: “Ngì oi kiên-khiòng, oi yúng-kám, yîn-vi ngì oi tai-liâng ngìn-mìn hi cham-liâng Song-chú yin-hí su-pûn kì-têu chú-siên ke thú-thi.
[8] Song-chú oi chhai ngì thèu-chhièn chhîn-chhṳ tai-liâng ngì, lâu ngì khiung-ha hi. Kì m̀-voi lì-khôi ngì, ya m̀-voi fit-thet ngì. Só-yî, ngì cho-m̀-tet mò-tám, ya cho-m̀-tet chho̍k-kiâng.”
[9] Án-ngiòng, Mô-sî chiông liá fap-li̍t siá hâ-lòi, kâu-pûn ke-têu kông Song-chú yok-khui ke Li-vi chi-sṳ̂ lâu Yî-set-lie̍t só-yû ke chóng-ló.
[10] Mô-sî min-lin kì-têu kóng: “Tak-pái chhit-ngièn ke chui-mî yit-ngièn, chhiu-he miên-thet chai-vu ke-ngièn ke Tap Liàu-è Chiet,
[11] Yî-set-lie̍t-ngìn chhiòn-phu lòi-to Song-chú — ngì-têu ke Song-ti só-sién ke só-chhai chhèu-kien Kì, ke-sṳ̀ ngì-têu oi hiong kì-têu siên-thu̍k liá fap-li̍t.
[12] Ngì-têu oi seu-si̍p só-yû ke nàm-ngìn, fu-ńg, se-ngìn-è, lâu he̍t chhai ngì-têu sàng-tú ke ngoi-chhu̍k ngìn, hó-pûn thai-kâ thâng-tó, hó-pûn thai-kâ ho̍k-si̍p kin-vi Song-chú — ngì-têu ke Song-ti, khok-sṳ̍t chûn-hàng liá fap-li̍t yit-chhiet ke fa.
[13] Án-ngiòng, ngì-têu ke chṳ́-sûn, chhiu-he ke-têu hàn-màng thâng-tó liá fap-li̍t ke, voi-yû kî-fi thâng-tó. Kì-têu hàn-sâng ke ngit ya oi chhai ngì-têu oi cham-liâng ke Yok-tan-hò ke-phién ho̍k-si̍p kin-vi Song-chú — ngì-têu Song-ti.”
[14] Song-chú tui Mô-sî kóng: “Ngì mò kí-kiú chhiu oi lì-khôi sṳ-kiên. Ngì ham Yok-sû-â to sṳn-chong-phùng lòi, Ngài oi pûn kì ngim-vu.” Mô-sî lâu Yok-sû-â chhiu lòi-to sṳn-chong-phùng.
[15] Yû yùn-chhû thìn chhai sṳn-chong-phùng mùn-héu, Song-chú chhai yùn-chhû tî-poi hiong kì-têu hién-hien.
[16] Song-chú tui Mô-sî kóng: “Ngì khoai-voi lâu chú-chûng thùng soi lé; ngì sí-heu, liá ngìn-mìn voi chhai kì-têu oi ngi̍p-hi ke thú-thi hi-pai phe̍t ke sṳ̀n-mìn, hàng kiên-yìm, lì-khôi Ngài, vì-poi Ngài lâu kì-têu li̍p ke yok.
[17] Ke-sṳ̀, Ngài voi tui kì-têu fat-khién, fit-thet kì-têu, êm-tén mien m̀-tap kì-têu; kì-têu chhiu voi sêu-me̍t. Chhin-tô châi-nan voi lìm-to kì-têu sṳ̂n-song, kì-têu chhiu tî liá he yîn-vi Ngài — kì-têu ke Song-ti mò-chai lâu kì-têu khiung-ha.
[18] Ke-sṳ̀, Ngài voi êm-tén mien m̀ pông-chhu kì-têu; yîn-vi kì-têu hàng sià-ok ke sṳ, hi-pai phe̍t ke sṳ̀n-mìn.
[19] “Liá-ha ngì oi siá-hâ liá-sú sṳ̂-kô, kâu Yî-set-lie̍t ngìn-mìn, pûn kì-têu phoi, sṳ́ liá-sú kô sàng-cho Ngài chit-phi kì-têu ke chṳn-kí.
[20] Ngài oi cheu hiong kì-têu chú-siên ke yin-hí, thu kì-têu to ke liù-nen-lâu-me̍t, chhin-phì ke thú-thi. Chhai ke-vi, kì-têu voi ko m̀ sèu-sṳ̍t m̀ sèu-chok ke sên-fa̍t. Chúng-he kì-têu voi lì-khôi Ngài, hi-pai phe̍t ke sṳ̀n-mìn, fit-thet Ngài, vì-poi Ngài ke yok.
[21] Chhin-tô châi-nan voi lìm-to kì-têu sṳ̂n-song. Chúng-he liá-sú kô hàn-he voi liù-chhòn, voi sàng-cho chit-phi kì-têu ke chṳn-kí. Sûi-yèn Ngài hàn-màng thu kì-têu to Ngài yin-hí oi pûn kì-têu ke thú-thi, chúng-he Ngài yí-kîn tî kì-têu ke sîm-sṳ̂ yi-ngiam.”
[22] Ke-ngit, Mô-sî chhiu siá-hâ liá-sú sṳ̂-kô, kâu Yî-set-lie̍t ngìn-mìn.
[23] Heu-lòi, Song-chú tui Nun ke lai-é Yok-sû-â kóng: “Ngì oi kiên-khiòng, oi yúng-kám, yîn-vi ngì oi tai-liâng Yî-set-lie̍t ngìn-mìn ngi̍p-hi Ngài yin-hí pûn kì-têu ke thú-thi. Yû Ngài lâu ngì khiung-ha.”
[24] Mô-sî chiông Song-chú ke fap-li̍t siá chhai sû-song; kì chiông chhiòn-phu siá hâ-lòi.
[25] Siá-hó yî-heu, kì tui ke-têu kông Song-chú yok-khui ke Li-vi chi-sṳ̂ kóng:
[26] “Ngì-têu oi chiông liá Fap-li̍t-sû piong chhai Song-chú — ngì-têu Song-ti ke yok-khui sùn-thèu, liù chhai ke-vi, sàng-cho Kì chit-phi Kì chṳ́-mìn ke chṳn-kí.
[27] Ngài tî kì-têu chhin ngang-kiáng chhin phoi-ngia̍k. Ngài chhai sṳ-kiên ke sṳ̀, kì-têu chhòng-theu phoi-ngia̍k Song-chú, ngài sí-heu, kì-têu voi hàn-kha phoi-ngia̍k.
[28] Ngì-têu oi seu-si̍p kok kî-chhu̍k ke chóng-ló lâu kôn-yèn to ngài mien-chhièn lòi, ngài oi chiông liá-têu fa kóng pûn kì-têu thâng. Ngài oi kín-ko kì-têu, yu oi ham thiên-thi lòi cho-chṳn.
[29] Ngài tî, ngài sí-heu ngìn-mìn voi fî-sòng phai-fái, phiên-lì ngài só fûn-fu kì-têu ke tho. Chiông-lòi, kì-têu su-tó châi-nan he yîn-vi kì-têu cho Song-chú khon-cho sià-ok ke sṳ, kì-têu sú só cho ke ngiâ Kì fat-khién.”
[30] Heu-lòi, Mô-sî chhai Yî-set-lie̍t chhiòn fi-chung mien-chhièn thai-sâng ngiam liá-sú sṳ̂: