[1] “Na-he ngì-têu tông-chûng yû cho siên-tî ya-he kié-mung ke ngìn, yung sṳ̀n-chiak khì-sṳ koái-phien ngì-têu,
[2] ham ngì-têu hi pai chhiùng-lòi m̀-sṳt pai-ko ke sṳ̀n-mìn, chhiu-son kì kóng ke sṳ̀n-chiak khì-sṳ sṳ̍t-hien lé,
[3] ngì-têu ya m̀-hó tap kì; yîn-vi Song-chú — ngì-têu ke Song-ti yung kì lòi kháu-ngiam ngì-têu, oi tî ngì-têu he m̀-he yit-sîm yit-yi kin-oi Song-chú — ngì-têu ke Song-ti.
[4] Ngì-têu oi sun-chhiùng Song-chú — ngì-têu ke Song-ti, kin-vi Kì; ngì-têu oi thâng-chhiùng Kì, chûn-hàng Kì ke kie-min; ngì-têu oi sṳ-fung Kì, chôn-sîm kho Kì.
[5] Ke siên-tî ya-he kié-mung ke ngìn, ngì-têu yit-thin oi chhú-sí kì; yîn-vi kì san-thung ngì-têu phoi-ngia̍k Song-chú — ngì-têu ke Song-ti, chhiu-he thu ngì-têu chhut Âi-khi̍p, kiu ngì-têu lì-khôi cho nù-chhòi chṳ̂ thi ke Song-chú. Liá-chúng ngìn he sià-ok ke; kì sióng-oi koái-phien ngì-têu phiên-lì Song-chú — ngì-têu ke Song-ti só chṳ́-sṳ ke tho-lu. Ngì-têu yit-thin oi chhú-sí kì, tui ngì-têu tông-chûng chhù-thet liá-chúng sià-ok ke sṳ.
[6] “Lièn ngì-têu ke hiûng-thi, chṳ́-ńg, só-siak ke pû-ngiòng, ya-he chhin chhîn-khiun ke phèn-yû, ya khó-nèn voi thêu-thêu-é lòi san-thung ngì-têu hi pai ngì-têu lâu ngì-têu chú-siên chhiùng-lòi m̀-sṳt pai-ko ke sṳ̀n-mìn.
[7] Kì-têu tông-chûng, khó-nèn yû-ngìn voi koái-phien ngì-têu hi pai fu-khiun ya-he yén-fông ke ngìn só-pai ke sṳ̀n-mìn.
[8] Chúng-he ngì-têu cho-m̀-tet thâng-chhiùng kì, cho-m̀-tet sin-fu̍k kì. Ngì-têu m̀-sṳ́ lìn-mén liá-chúng ngìn, ya m̀-hó pó-fu kì.
[9] Yit-thin oi chhù-thet kì! Ngì-têu chhṳ-kâ oi siên chhut-sú yung sa̍k-thèu te̍p kì, lòi pûn phe̍t-ngìn thèn.
[10] Oi yung sa̍k-thèu te̍p-sí kì, yîn-vi kì sióng-oi koái-phien ngì-têu lì-khôi Song-chú — ngì-têu ke Song-ti, chhiu-he thu ngì-têu chhut Âi-khi̍p, kiu ngì-têu lì-khôi cho nù-chhòi chṳ̂ thi ke Song-chú.
[11] Án-ngiòng, Yî-set-lie̍t-ngìn chhiòn-phu thâng-tó liá-khien sṳ chang voi kiâng, ngì-têu tông-chûng chhiu m̀-voi chai yû-ngìn kám-cho liá-chúng sià-ok ke sṳ.
[12] “Na-he ngì-têu thâng-ngìn kóng, chhai Song-chú — ngì-têu ke Song-ti su-pûn ngì-têu he̍t ke yit-ke sàng-tú yû fái-ngìn chhut-hien, koái-phien sàng-tú ke ngìn hi pai ngì-têu chhiùng-lòi m̀-sṳt pai-ko ke sṳ̀n-mìn,
[14] ngì-têu oi chha̍t-tái tá-tham, thiàu-chhà. Na-he chṳn-mìn liá-chúng sià-ok ke sṳ khok-sṳ̍t fat-sên ko,
[15] ngì-têu chhiu oi yung tô-kiam sêu-me̍t sàng-tú só-yû ke ngìn-mìn lâu thèu-sâng, chiông ke-sàng vàn-chhiòn fí-me̍t.
[16] Ngì-têu oi chiông sàng-tú só-yû ke chan-li-phín si̍p chhai kóng-chhòng song, yèn-heu piong-fó chiông sàng lâu sàng-tú só-yû chhòi-vu̍t chhiòn-phu sêu-thet, cho chi-vu̍t hien-pûn Song-chú — ngì-têu ke Song-ti. Ke-sàng oi yún-yén pien fông-phû, cho-m̀-tet chhùng-kien.
[17] Só-yû yin-kôi sêu-thet ke tûng-sî, ngì-têu cho-m̀-tet pó-liù. Án-ngiòng, Song-chú chhiu m̀-voi chai fat-khién. Na-he ngì-têu chûn-hàng ngài kîm-pû-ngit só pân-pu ke, Song-chú — ngì-têu Song-ti yit-chhiet ke kie-min, sṳ̍t-hàng Kì só fôn-hí ke sṳ, Kì chhiu voi lìn-mén ngì-têu, yung chhṳ̀-oi khoán-thai ngì-têu, cheu Kì tui ngì-têu chú-siên ke yin-hí, sṳ́ ngì-têu ngìn-khiéu chen-kâ.”