[1] “Cho-m̀-tet chiông yû khiet-tiám ke ngiù-yòng hien-pûn Song-chú — ngì-têu ke Song-ti, yîn-vi ke he Kì só nâu ke.
[2] “Chhai Song-chú — ngì-têu ke Song-ti só su-pûn ngì-têu he̍t ke sàng-tú, na-he yû nàm-ngìn ya-he fu-ngìn-kâ tet-chhui Song-chú, lì-khôi Kì ke yok, vì-poi Kì ke kim-lin, hi kin-pai fu̍k-sṳ phe̍t ke sṳ̀n-mìn, ya-he pai ngit-thèu, ngie̍t-kông, sên-sṳ̀n,
[4] ngì-têu na thâng-tó liá-chúng sṳ, chhiu yit-thin oi chha̍t-tái thiàu-chhà chûi-kiu. Na-he liá-chúng fái-sṳ khok-sṳ̍t chhai Yî-set-lie̍t chûng fat-sên,
[5] ngì-têu yit-thin oi chiông ke nàm-ngìn ya-he fu-ngìn-kâ lâi-to sàng-mùn ngoi, yung sa̍k-thèu te̍p-sí.
[6] Chúng-he ngì-têu oi yû lióng-ke ya-he lióng-ke yî-song ke chṳn-ngìn khúng-ko kì, chang cho-tet chhú-sí kì; ngì-têu cho-m̀-tet tân-kho yit-ke ngìn cho kien-chṳn chhiu chhú-sí kì.
[7] Cho chṳn-ngìn ke oi siên te̍p sa̍k-thèu, chung-ngìn chang thèn-tén kì te̍p sa̍k-thèu. Án-ngiòng, chang-nèn tui ngì-têu tông-chûng chhù-thet liá-chúng fái-sṳ.
[8] “Yû-têu on-khien khó-nèn he thi-fông song ke sṳ́m-phan-kôn chhin-nàn chhài-kiet ke, chhiong chhòi-sán ke kiu-fun, sông-hoi ke on-khien, fûn-phien mèu-sat ya-he ngu-sat ke on-khien. Na-he yû liá-chúng ke on-khien, ngì-têu yit-thin oi nâ to Song-chú — ngì-têu ke Song-ti só-sién ke só-chhai,
[9] kâu-pûn chhṳ̍t-pân ke Li-vi chi-sṳ̂ lâu sṳ́m-phan-kôn hi chhài-kiet.
[10] Kì-têu chhai Song-chú só-sién ke só-chhai chhài-kiet yî-heu, ngì-têu chhiu oi chûn-cheu kì-têu ke chṳ́-sṳ ngin-chṳ̂n chṳp-hàng.
[11] Oi vàn-chhiòn cheu kì-têu ke chṳ́-kau, cheu kì-têu ke chhài-kiet hi chṳp-hàng, cho-m̀-tet phiên-lì chó-yu.
[12] Má-ngìn vì-khong ke chhṳ̍t-pân chhai Song-chú — ngì-têu Song-ti mien-chhièn ke chi-sṳ̂ ya-he sṳ́m-phan-kôn ke chhài-kiet, chhiu oi chhú sí-hìn. Án-ngiòng, ngì-têu chhiu-nèn tui Yî-set-lie̍t chûng chhù-thet liá-chúng fái-sṳ.
[13] Ngìn-mìn thâng-tó chang voi kiâng; mò-ngìn kám chai cho liá-chúng fái-sṳ.”
[14] “Ngì-têu cham-liâng Song-chú — ngì-têu ke Song-ti oi su-pûn ngì-têu ke thú-thi, chhai ke-vi ôn-kî chṳ̂ heu, na-he kiet-thin oi chhiong chû-vì ke koet-kâ khiung-yong yû chhṳ-kâ ke vòng,
[15] chhiu yit-thin oi sat-li̍p Song-chú — ngì-têu ke Song-ti só kién-sién ke ngìn. Ngì-têu yit-thin oi sat-li̍p chhṳ-kâ ke thùng-pâu cho vòng, cho-m̀-tet sat-li̍p ngoi-chhu̍k ngìn.
[16] Vòng cho-m̀-tet vi chhṳ-kâ chen-kâ chan-mâ; ya cho-m̀-tet phai-ngìn to-chón Âi-khi̍p mâi-mâ, yîn-vi Song-chú sṳt fûn-fu ngì-têu kóng: ‘Cho-m̀-tet chai chón-hi Âi-khi̍p.’
[17] Vòng cho-m̀-tet chen-kâ vòng-fî, miên-tet su yín-yu lì-khôi Song-chú; ya cho-m̀-tet vi chhṳ-kâ chit-chhùn kîm-ngiùn, thâm-oi chhòi-fu.
[18] Vòng tên-kî yî-heu, chhiu oi tui ke-têu Li-vi chi-sṳ̂ nâ liá Fap-li̍t-sû, vi chhṳ-kâ chhâu-siá yit-fun.
[19] Vòng oi chiông liá-kién sû piong chhai sṳ̂n-piên, yit-sên-ngìn sòng-sòng thu̍k, sat-mâng ho̍k-si̍p ngióng-pân kin-vi Song-chú — kì ke Song-ti, khok-sṳ̍t chûn-hàng liá Fap-li̍t-sû tî-poi só ki-chai yit-chhiet ke fap-li̍t lâu kie-min.
[20] Án-ngiòng, kì chhiu m̀-voi kiêu-ngau, khon-khiâng thùng-pâu, ya m̀-voi vì-poi Song-chú ke min-lin, phiên-chhâ chó-yu. Kì chang voi thúng-chhṳ kiú-kiú; kì ke chṳ́-sûn ya voi ki-siu̍k thúng-chhṳ Yî-set-lie̍t.”