[1] “Na-he yû lióng-ke Yî-set-lie̍t-ngìn sông fap-yen kié-kiet yên-kâ ke sṳ, khì-chûng yit-sà pûn sṳ́m-phan-kôn phan mò-chhui, nang-ngoi yit-sà yû-chhui,
[2] na-he yû-chhui ke ngìn yin-kôi su piên-hìn, sṳ́m-phan-kôn oi min-lin kì tông-mien phu̍k chhai thi-song su-hìn. Piên-tá ke su-muk oi khon fam-chhui ke chhûng-khiâng lòi-thin.
[3] Chui-tô tá si-sṳ̍p ha, cho-m̀-tet chhêu-ko; na-he chhêu-ko liá su-muk, chhiu-he kûng-khôi vú-yu̍k ngì ke thùng-pâu.
[4] “Ngiù tha̍p kuk ke sṳ̀, m̀-hó lùng-tén kì ke choi.”
[5] “Na-he yû hiûng-thi lióng-sà khiung-ha he̍t, khì-chûng yit-sà siên sí-thet, mò liù-hâ heu-thoi, kì ke koá-fu cho-m̀-tet chai lâu chhu̍k-ngoi ngìn kiet-fûn. Sí-chá ke hiûng-thi oi chhin hiûng-thi ke ngi-vu thó kì;
[6] kì-têu kiung ke chóng-chṳ́ oi son-cho sí-thet ke hiûng-thi ke lai-é, miên-tet kì ke miàng chhai Yî-set-lie̍t chûng chhù-thet.
[7] Na-he sí-chá ke hiûng-thi m̀-hén thó kì, ke ńg-ngìn oi to sàng mùn-héu kien chóng-ló, lâu kì-têu kóng: ‘Siên-fû ke hiûng-thi m̀-hén chhin hiûng-thi ke ngi-vu, liù sí-thet ke hiûng-thi ke miàng, thoi kì chhai Yî-set-lie̍t chûng liù heu-thoi.’
[8] Pún-sàng ke-têu chóng-ló chhiu oi ham ke hiûng-thi lòi, lâu kì sông-liòng. Na-he kì hàn-he kiên-chhṳ̀ kóng: ‘Ngài mò-oi thó kì’,
[9] kiâ hiûng-thi ke koá-fu chhiu oi chhai ke-têu chóng-ló mien-chhièn hàng sông-hi, thot-hâ ke hiûng-thi ke yit-chak hài, phi héu-lân chhai kì ke mien, siên-pu kóng: ‘M̀-hén thoi hiûng-thi liù heu-thoi ke ngìn yin-kôi su liá-chúng vú-yu̍k.’
[10] Chhai Yî-set-lie̍t chûng, kì ke kâ oi ham-cho ‘Pûn-ngìn thot-hài ke kâ.’ ”
[11] “Na-he lióng-ke ngìn siông-tá, khì-chûng yit-sà ke pû-ngiòng vi-tó oi kiu ló-kûng lì-khôi tui-fông ke sú, hi kha̍k-tó nang-ngoi ke-sà ke ha̍k-lón,
[12] chhiu-oi chám-thôn pû-ngiòng ke sú, cho-m̀-tet lìn-mén kì.
[13] “Ngì-têu ke thoi-é tú cho-m̀-tet yû yit-thai yit-se lióng-yong ke chhṳn-thò.
[14] Ngì-têu vuk-hâ cho-m̀-tet yû yit-thai yit-se lióng-yong ke sṳ̂n-téu.
[15] Oi sṳ̀n-sṳ̍t, yung chṳn-khok ke chhṳn-thò lâu sṳ̂n-téu, hó pûn ngì-têu chhai Song-chú — ngì-têu ke Song-ti oi su-pûn ngì-têu ke thú-thi song hióng-su chhòng-su.
[16] Song-chú — ngì-têu ke Song-ti chhin nâu cha-khî ke ngìn.”
[17] “Oi ki-tet, ngì-têu chhut Âi-khi̍p ke sṳ̀, chhai lu-thù Â-mâ-li̍t-ngìn ngióng-pân tui-thai ngì-têu.
[18] Kì-têu m̀-kiâng Song-ti, chhai ngì-têu tông-khioi mò-li̍t ke sṳ̀, tui heu-poi kûng-tá, chiông hàng chhai heu-poi ke ngìn chhiòn-phu chhṳ̀-thet.
[19] Só-yî, tông Song-chú — ngì-têu ke Song-ti chiông thú-thi su-pûn ngì-têu, sṳ́ ngì-têu mò su ngoi-thi̍t káu-lon, cho-tet hióng-su phìn-ôn ke sṳ̀, ngì-têu oi sêu-me̍t só-yû ke Â-mâ-li̍t-ngìn, pûn ngìn mò-chai sióng-hí kì-têu. M̀-hó m̀ ki-tet!”