[1] “Song-chú — ngì-têu ke Song-ti min-lin ngài chiông yî-ha ke kie-min, fap-li̍t lâu li-kûi kâu ngì-têu, hó-pûn ngì-têu chhai oi ko-hi cham-liâng ke thú-thi song chûn-hàng.
[2] Ngì-têu lâu ngì-têu ke chṳ́-sûn oi yit-sên-ngìn kin-vi Song-chú — ngì-têu ke Song-ti, sun-chhiùng Kì thûng-ko ngài fûn-fu ngì-têu só-yû ke fap-li̍t lâu kie-min. Án-ngiòng, ngì-têu chhiu voi hióng-su chhòng-su.
[3] Yî-set-lie̍t-ngìn nâ, ngì-têu oi chu-yi thâng, ya oi khok-sṳ̍t chûn-hàng. Án-ngiòng, ngì-têu chhiu voi cheu Song-chú — ngài-têu chú-siên ke Song-ti só yin-hí ke, sṳ-sṳ sun-li, sàng-cho khiòng-sṳn ke koet-kâ, chhai ke liù-nen-lâu-me̍t, chhin-phì ke thú-thi song hióng-fuk.
[4] “Yî-set-lie̍t-ngìn nâ, ngì-têu oi chu-yi thâng! Song-chú he ngài-têu ke Song-ti; chṳ́-yû Kì he Song-chú.
[5] Ngì-têu oi yung chhiòn-phu ke sîm-chṳ, chhìn-kám lâu li̍t-liong kin-oi Song-chú — ngì-têu ke Song-ti.
[6] Kîm-pû-ngit ngài fûn-fu ngì-têu ke kie-min, ngì-têu oi piong chhai sîm-tú,
[7] sat-mâng kâu ngì-têu ke chṳ́-ńg. Mò-lun chhai vuk-hâ ya-he chhut-ngoi, hiet-khun ya-he cho-kûng, oi sòng-sòng thàm-lun liá-têu kie-min.
[8] Ngì-têu oi chiông liá-têu kie-min cho ki-ho, thak chhai sú-hong, tai chhai ngiak-thèu,
[9] siá chhai vuk-hâ ke mùn-khiông lâu thai-mùn.
[10] “Song-chú — ngì-têu ke Song-ti voi cheu Kì tui ngì-têu ke chú-siên — Â-pak-lâ-hón, Yî-sat, Ngâ-kok só yin-hí ke, thu ngì-têu chin-ngi̍p ke thú-thi. Ke só-chhai yu-thai yu-chiâng ke sàng-sṳ m̀-he ngì-têu só-hí ke,
[11] vuk-tú tôi-mân ke hó tûng-sî ya m̀-he ngì-têu khong ke. Ke-vi ke chiáng m̀-he ngì-têu yet ke; phù-thò-yèn, kám-lám-yèn ya m̀-he ngì-têu chung ke. Song-chú thu ngì-têu ngi̍p-hi, pûn ngì-têu sṳ̍t-páu ke sṳ̀,
[12] ngì-têu oi se-ngi, m̀-hó m̀ ki-tet Kì. Song-chú sṳt tui cho nù-chhòi ke Âi-khi̍p-thi chiông ngì-têu kiu chhut-lòi.
[13] Ngì-têu oi kin-vi Song-chú — ngì-têu ke Song-ti, tân-chhiang kin-pai Kì, fung Kì ke miàng fat-sṳ.
[14] Cho-m̀-tet pai chû-vì kok-koet yit-chhiet ke sṳ̀n-mìn.
[15] Na-he ngì-têu pai phe̍t ke sṳ̀n-mìn, Song-chú — ngì-têu ke Song-ti voi fat-khién chiông ngì-têu sêu-me̍t, yîn-vi lâu ngì-têu thùng-chhai ke Song-chú he chôn-chhìn ke Song-ti.
[16] “Ngì-têu cho-m̀-tet chhiong yî-chhièn chhai Mâ-sat án-ngiòng sṳ-tham Song-chú — ngì-têu ke Song-ti.
[17] Ngì-têu oi ngin-chṳ̂n chûn-sú Song-chú — ngì-têu ke Song-ti hiong ngì-têu pân-pu ke kie-min, fap-li̍t lâu li-kûi.
[18] Ngì-têu oi cho Song-chú khon-cho chho̍k lâu hó ke sṳ, chhiu nèn sṳ-sṳ sun-li, hó-pûn ngì-têu ngi̍p-hi cham-liâng Song-chú yin-hí pûn ngì-têu chú-siên ke chhin-chiâng ke thú-thi;
[19] ngì-têu ya oi cheu Song-chú ke min-lin chiông só-yû ke thi̍t-ngìn kiuk-chéu.
[20] “Chiông-lòi, ngì-têu ke chṳ́-sûn voi mun ngì-têu: ‘Song-chú — ngài-têu ke Song-ti cho-má-ke min-lin ngài-têu chûn-sú liá só-yû ke kie-min, fap-li̍t lâu li-kûi nè?’
[21] Ngì-têu oi lâu kì-têu kóng: ‘Ngài-têu sṳt chhai Âi-khi̍p cho Âi-khi̍p-vòng ke nù-chhòi, chúng-he Song-chú yung tông-thai ke nèn-li̍t kié-kiu ngài-têu.
[22] Ngài-têu chhîn-muk khon-tó Song-chú chhai Âi-khi̍p-ngìn tông-chûng, chhai Âi-khi̍p-vòng lâu kì só-yû kôn-yèn mien-chhièn, hàng tet-ngìn-kiâng ke sṳ̀n-chiak khì-sṳ.
[23] Kì kiu ngài-têu lì-khôi Âi-khi̍p, thu ngài-têu to liá-vi, cheu Kì tui ngài-têu chú-siên só yin-hí ke, chiông liá-te thú-thi su-pûn ngài-têu.
[24] Song-chú — ngài-têu ke Song-ti min-lin ngài-têu chûn-sú liá só-yû ke fap-li̍t, kin-vi Kì; án-ngiòng, Kì chhiu voi sòng-sòng pó-yu ngài-têu, sṳ́ ngài-têu hîn-vong, chhiong kîm-pû-ngit khiung-yong.
[25] Na-he ngài-têu khok-sṳ̍t chûn-hàng Song-chú — ngài-têu ke Song-ti só min-lin liá yit-chhiet ke kie-min, Kì chhiu voi chiap-na̍p ngài-têu.’ ”