[1] “Chhai tak-ke chhit-ngièn chui-mî ke yit-ngièn, ngì-têu oi miên-thet ngìn ke chai.
[2] Liá-ke thiàu-li kûi-thin: Só-yû chia-chhièn pûn Yî-set-lie̍t thùng-pâu ke chai-chú yit-thin oi chiông thùng-pâu ke chai miên-thet, cho-m̀-tet chai thó, yîn-vi liá chai-vu tet-tó miên-thet he Song-chú siên-pu ke.
[3] Ngoi-koet ngìn khiam ke chai, ngì-têu cho-tet chai thó; chúng-he tui chhṳ-kâ ke thùng-pâu, mò-lun khiam ngì-têu má-ke, chhiòn-phu cho-m̀-tet chai thó.
[4] “Song-chú — ngì-têu ke Song-ti voi chhai Kì oi su-pûn ngì-têu ke thú-thi song thai-thai su-fuk pûn ngì-têu. Na-he ngì-têu thâng-chhiùng Song-chú — ngì-têu ke Song-ti, ngin-chṳ̂n chûn-hàng ngài kîm-pû-ngit pûn ngì-têu só-yû ke min-lin, ngì-têu tông-chûng chhiu m̀-voi yû khiùng-khú ngìn.
[6] Yîn-vi Song-chú — ngì-têu ke Song-ti oi cheu Kì ke yin-hí su-fuk pûn ngì-têu. Ngì-têu voi yû-chhièn chia-pûn chhin-tô ngoi-koet ngìn, ya m̀-sṳ́ hiong ngìn chia-chhièn. Ngì-têu voi kón tô-tô koet ngìn, chúng-he mò yit-koet voi kón ngì-têu.
[7] “Chhai Song-chú — ngì-têu ke Song-ti su-pûn ngì-têu ke thú-thi song, mò-lun chhai nai-ke sàng-tú, na-he fat-hien yû khiùng-khú ke thùng-pâu, ngì-têu cho-m̀-tet án ngang-sîm, kiû-sú m̀ pông-chhu kì.
[8] Ngì-têu tiên-to oi chhut-sú thai-fông, chiông kì só sî-yeu ke chia-pûn kì, lòi pú kì ke put-chiuk.
[9] Ngì-têu oi se-ngi, cho-m̀-tet yîn-vi thi-chhit ngièn — ôn-sit-ngièn voi-to lé, chhiu m̀ chia-pûn khiùng-khú ke thùng-pâu; ngì-têu sîm-tú chhie̍t-tui cho-m̀-tet yû liá-chúng fái ngiam-thèu. Na-he ngì-têu m̀ chia, kì hiong Song-chú khúng-ko, ngì-têu chhiu yû-chhui lé.
[10] M̀-hó m̀ phan-tet, yit-thin oi thai-fông pûn kì, Song-chú — ngì-têu ke Song-ti chhiu voi fàm-sṳ su-fuk pûn ngì-têu.
[11] Ngì-têu he̍t ke só-chhai sòng-sòng voi yû khiùng-khú ngìn, só-yî ngài min-lin ngì-têu, yit-thin oi hiong khiùng-khú yû sî-yeu ke thùng-pâu thai-thai fông-fông chhûn-sú pông-chhu kì-têu.”
[12] “Na-he yû Hî-pak-lòi thùng-pâu, mò-lun nàm-ńg, mai-cho ngì-têu ke nù-chhòi, yí-kîn fu̍k-sṳ ngì-têu liuk-ngièn, to thi-chhit ngièn, ngì-têu yit-thin oi piong kì, pûn kì chhṳ-yù.
[13] Ngì-têu piong kì ke sṳ̀, m̀-hó pûn kì khûng-sú lì-khôi.
[14] Song-chú — ngì-têu ke Song-ti ngióng-pân su-fuk pûn ngì-têu, ngì-têu ya oi cheu-yong chiông ngì-têu ke yòng-khiùn, ńg-kuk lâu chiú thai-fông pûn-pûn kì.
[15] Ngì-têu oi ki-tet, ngì-têu chhai Âi-khi̍p cho-ko nù-chhòi; Song-chú — ngì-têu ke Song-ti kiu-su̍k ngì-têu, só-yî ngài kîm-pû-ngit chang án-ngiòng min-lin ngì-têu.
[16] “Na-he ngì-têu ke nù-chhòi yîn-vi kin-oi ngì-têu lâu ngì-têu ke kâ-thìn, mò-oi lì-khôi ngì-têu, oi lâu ngì-têu khiung-ha he̍t hâ-hi,
[17] ngì-têu chhiu oi nâ chon-é lòi chiông kì ke ngí-kûng kho chhai mùn-piông chon yit-chak khûng. Án-ngiòng, kì chhiu yit-sên-ngìn cho ngì-têu ke nù-chhòi. Tui-thai nù-pî ya yung khiung-yong ke fông-fap.
[18] Ngì-têu piong nù-chhòi ke sṳ̀, sîm-kôn m̀-hó m̀ kâm-ngien; yîn-vi kì fu̍k-sṳ ngì-têu liuk-ngièn, chṳ́-yû nâ yit-pân kûng-ngìn só-tet kûng-chhièn ke yit-pan. Ngì-têu án-ngiòng cho, Song-chú — ngì-têu ke Song-ti chhiu voi fàm-sṳ su-fuk pûn ngì-têu.”
[19] “Ngì-têu oi chiông thèu-thôi ke ngiù-kú, yòng-kú fûn-phe̍t chhut-lòi, hien-pûn Song-chú — ngì-têu ke Song-ti; cho-m̀-tet yung liá-chúng ngiù kâng-chung, ya m̀-hó chién liá-chúng yòng ke mô.
[20] Tak-ngièn, ngì-têu lâu ngì-têu vuk-hâ ngìn oi chhai Song-chú só-sién ke só-chhai, chhai Song-chú — ngì-têu Song-ti mien-chhièn, sṳ̍t liá-chúng ngiù-yòng ke ngiuk.
[21] Na-he liá-chúng ngiù-yòng yû khiet-tiám, chhiong pâi-kiok, mô-muk, ya-he khì-thâ ngim-hò khiet-tiám, ngì-têu chhiu cho-m̀-tet chiông kì hien-pûn Song-chú — ngì-têu ke Song-ti.
[22] Ngì-têu cho-tet chhai vuk-hâ sṳ̍t liá-chúng yû khiet-tiám ke ngiù-yòng ke ngiuk. Mò-lun chhai lî-ngì song he chhiang-li ya-he mò chhiang-li ke ngìn, chhiòn-phu cho-tet sṳ̍t, chhiong sṳ̍t yâ-lu̍k ya-he lìn-yòng yit-yong.
[23] Chúng-he ngì-têu cho-m̀-tet sṳ̍t-hiet, oi chiông kì tó chhai thi-song, chhiong tó-súi yit-yong.”