[1] “Ngì-têu na-he khon-tó Yî-set-lie̍t thùng-pâu ke ngiù-yòng chhìm m̀-tó lu, cho-m̀-tet m̀ chhap kì; oi chiông kì khiên chón-hi kâu-vàn chú-ngìn.
[2] Na-he kì ke chú-ngìn lì-khôi ngì-têu tông-yén, ya-he ngì-têu m̀-tî kì ke chú-ngìn he má-ngìn, chhiu chiông kì khiên-chón vuk-hâ, tén kì ke chú-ngìn lòi chhìm ke sṳ̀ chang vàn kì.
[3] Ngì-têu na-he chhìm-tó Yî-set-lie̍t thùng-pâu m̀ kien-thet ke lì-è, tiet-thet ke sâm-fu ya-he só-yû khì-thâ ke tûng-sî, chhiòn-phu oi khiung-yong chhú-lî, cho-m̀-tet m̀ chhap.
[4] “Ngì-têu na-he khon-tó Yî-set-lie̍t thùng-pâu ke lì-è ya-he ngiù-è chhai lu-hong tôi-tó, cho-m̀-tet m̀ chhap kì; oi pông-chhu chú-ngìn chiông thèu-sâng lâi hí-lòi.
[5] “Fu-ńg cho-m̀-tet chok nàm-ngìn ke sâm-fu; nàm-ngìn ya cho-m̀-tet chok fu-ńg ke sâm-fu; yîn-vi Song-chú — ngì-têu ke Song-ti chhin nâu án-ngiòng tá-pan ke ngìn.
[6] “Ngì-têu na-he fat-hien su-táng ya-he thi-song ke tiâu-teu, teu-tú yû tiâu-mà chhai phu-lón ya-he lâu tiâu-chṳ́ khiung-ha, cho-m̀-tet chiông tiâu-mà chok-chéu.
[7] Ngì-têu cho-tet chok tiâu-chṳ́ chéu, chúng-he oi piong tiâu-mà chéu. Án-ngiòng, ngì-têu chhiu voi fàm-sṳ sun-li, hióng-su chhòng-su.
[8] “Hí sîn-vuk ke sṳ̀, vuk-táng si-mien oi vì làn-kôn. Án-ngiòng, na yû-ngìn tôi-sí, ngì-têu chhiu m̀-sṳ́ sṳ̀n-tâm liù ngìn-hiet ke chai.
[9] “Cho-m̀-tet chhai phù-thò-yèn tú chung phe̍t ke nùng-chok-vu̍t; miên-tet ngì-têu sṳ̍t m̀-tó yèn-chûng chhut-sán ke phù-thò ya-he phe̍t ke sán-vu̍t.
[10] “Cho-m̀-tet yung ngiù-è lâu lì-è khiung-ha lài-thièn.
[11] “Cho-m̀-tet chok yòng-mô lâu se mà-sâ khiung-ha chhiak ke sâm-fu.
[12] “Ngoi-sâm ke si-kok oi liòn chhui-é.”
[13] “Yû-ngìn kiet-fûn, heu-lòi m̀-siak kì ke pû-ngiòng,
[14] sún-hoi kì ke miàng-sâng, kóng kì chhai sîn-fûn ya yí-kîn m̀-he thùng-chṳ̂n-ńg.
[15] Na-he yû liá-chúng kiu-fun, se-moi-é ke yà-ôi oi to sàng mùn-héu kien ke-têu chóng-ló, nâ-chhut chṳn-kí, chṳn-mìn moi-é khok-sṳ̍t he thùng-chṳ̂n-ńg.
[16] Se-moi-é ke â-pâ oi tui ke-têu chóng-ló kóng: ‘Ngài chiông ngâ moi-é ka-pûn liá-ke ngìn, liá-ha kì m̀ siak kì,
[17] lon-kóng kì mò sú fûn-chhièn thùng-chṳ̂n. Khì-sṳ̍t, ngài liá-vi yû chṳn-kí cho-tet chṳn-mìn kì he thùng-chṳ̂n-ńg.’ Yà-ôi chhiu oi chiông sîn-fûn ya yung ke chhòng-tân pài chhai sàng-tú ke-têu chóng-ló mien-chhièn.
[18] Ke-sàng ke-têu chóng-ló chhiu yit-thin oi chiông liá-ke ló-kûng chok hí-lòi hìn-fa̍t,
[19] ya oi fa̍t kì yit-pak chak ngiùn-pi, chiông chhièn kâu-pûn se-moi-é ke â-pâ, yîn-vi kì vú-yu̍k Yî-set-lie̍t ke thùng-chṳ̂n-ńg. Yî-heu, liá se-moi-é hàn-he kì ke pû-ngiòng; kì yit-sên-ngìn cho-m̀-tet lâu liá se-moi-é lì-fûn.
[20] “Na-he liá-ke ló-kûng só-kóng ke he sṳ-sṳ̍t, mò chṳn-kí hó chṳn-mìn se-moi-é he thùng-chṳ̂n-ńg,
[21] sàng-tú ke-têu chóng-ló chhiu yit-thin oi tai se-moi-é to ngoi-kâ mùn-héu, pún-sàng ke nàm-ngìn oi yung sa̍k-thèu te̍p-sí kì; yîn-vi kì chhai Yî-set-lie̍t chûng cho kien-seu ke sṳ, chhai fu-kâ hàn-màng chhut-ka chhiu fam kiên-yìm. Án-ngiòng, ngì-têu chhiu chhù-thet ngì-têu tông-chûng liá-chúng fái-sṳ.
[22] “Na-he yû-ngìn lâu phe̍t-ngìn ke pû-ngiòng thûng-kiên, pûn-ngìn chok-tó, lióng-sà chhiòn-phu yin-kôi chhú-sí, án-ngiòng, ngì-têu chhiu chhù-thet Yî-set-lie̍t chûng liá-chúng fái-sṳ.
[23] “Na-he yû-ngìn chhai sàng-tú lâu phe̍t-ngìn ke vi-fûn-chhî thûng-kiên,
[24] ngì-têu yit-thin oi tai lióng-sà to sàng mùn-héu, yung sa̍k-thèu te̍p-sí. Ke se-moi-é kôi-sí, yîn-vi kì sûi-yèn chhai sàng-tú, chúng-he mò chhut-sâng hêm kiu-miang; ke nàm-ngìn kôi-sí, yîn-vi kì lâu phe̍t-ngìn ke vi-fûn-chhî thûng-kiên. Án-ngiòng, ngì-têu chhiu chhù-thet ngì-têu tông-chûng liá-chúng fái-sṳ.
[25] “Na-he yû-ngìn chhai yâ-ngoi khiòng-kiên phe̍t-ngìn ke vi-fûn-chhî, chṳ́-yû ke nàm-ngìn kôi-sí.
[26] Ngì-têu cho-m̀-tet sông-hoi ke se-moi-é; kì pin mò kôi-sí ke chhui. Liá-chúng on-khien lâu ngìn pûn-ngìn mèu-sat khiung-yong.
[27] Ke nàm-ngìn chhai yâ-ngoi khiòng-kiên ke vi-fûn-chhî, se-moi-é hêm kiu-miang, ya mò-ngìn lòi kiu kì.
[28] “Na-he yû-ngìn khiòng-kiên hàn-màng thin-chhîn ke thùng-chṳ̂n-ńg, lióng-sà pûn-ngìn chok-tó,
[29] ke nàm-ngìn yit-thin oi fu-pûn se-moi-é ke â-pâ ńg-sṳ̍p chak ngiùn-pi cho phín-kîm; yîn-vi kì khiòng-kiên kì, chhiu-oi thó kì cho pû-ngiòng, yit-sên-ngìn cho-m̀-tet lâu kì lì-fûn.
[30] “Ngìn cho-m̀-tet lâu kì ke heu-ôi kiet-fûn, cho-m̀-tet vú-yu̍k chhṳ-kâ ke â-pâ.”