[1] “Li-vi kî-chhu̍k ke chi-sṳ̂, chhiu-he Li-vi chhiòn kî-chhu̍k, chhai Yî-set-lie̍t chûng cho-m̀-tet yû chhṳ-kâ ke thú-thi lâu sán-ngia̍p. Kì-têu ke sên-fa̍t oi yí-kho ngìn-mìn hien-pûn Song-chú ke chi-vu̍t lâu fung-hien.
[2] Kì-têu mò-chhiong khì-thâ kî-chhu̍k ke ngìn yû chhṳ-kâ ke sán-ngia̍p; cheu Song-chú ke yin-hí, Song-chú chhṳ-kâ chhiu cho kì-têu ke sán-ngia̍p.
[3] “Ngìn-mìn hien ngiù-yòng cho sên-ngì ke sṳ̀, oi chiông chhièn-thúi, hâ-ngâm lâu puk-nui pûn-pûn chi-sṳ̂.
[4] Ngì-têu ya oi chiông sîn-chhut ke ńg-kuk, sîn-chiú, kám-lám-yù, lâu sîn-chién ke yòng-mô kâu-pûn kì-têu;
[5] yîn-vi Song-chú — ngì-têu ke Song-ti tui kok kî-chhu̍k chûng kién-sién Li-vi-ngìn lâu kì-têu ke chṳ́-sûn, yún-yén fung Song-chú ke miàng cho chi-sṳ̂.
[6] “Li-vi-ngìn na-he chhṳ-ngien lì-khôi kì chhai Yî-set-lie̍t chûng he̍t ke sàng-chṳ́n, yit-sîm yit-yi to Song-chú só-sién ke só-chhai,
[7] chhiu cho-tet fung Song-chú — kì Song-ti ke miàng cho chi-sṳ̂, lâu ke só-chhai khì-thâ Li-vi-ngìn khiung-ha thùng-kûng sṳ-fung Song-chú.
[8] Kì lâu khì-thâ ke chi-sṳ̂ oi chiap-su phiàng-tô ke liòng-sṳ̍t. Kì vuk-hâ tô sung-pûn kì ke, kì hàn cho-tet liù-tén.”
[9] “Ngì-têu chin-ngi̍p Song-chú — ngì-têu ke Song-ti só-oi su-pûn ngì-têu ke thú-thi chṳ̂ heu, cho-m̀-tet thèn ke-thi kok mìn-chhu̍k só hàng tet-ngìn-nâu ke fái fûng-siu̍k.
[10] Ngì-têu cho-m̀-tet chiông chṳ́-ńg piong chhai chi-thàn táng sêu; ya cho-m̀-tet puk-koa, son-miang, hàng sià-su̍t,
[11] fa fù-kau, khiù-mun kúi-sṳ̀n ya-he sí-ngìn ke yîm-fùn.
[12] Song-chú chhin nâu cho liá-chúng fái-sṳ ke ngìn. Só-yî, Song-chú — ngì-têu ke Song-ti oi chhai ngì-têu mien-chhièn chhù-thet ke-têu mìn-chhu̍k.
[13] Ngì-têu chhie̍t-tui oi tui Song-chú — ngì-têu ke Song-ti vàn-chhiòn chûng-sîm.”
[14] Chiap-tén, Mô-sî kóng: “Ngì-têu oi cham-liâng ke thi, ke-têu mìn-chhu̍k thâng-chhiùng puk-koa lâu son-miang ke fa; chúng-he Song-chú — ngì-têu ke Song-ti put-chún ngì-têu án-ngiòng cho.
[15] Song-chú — ngì-têu ke Song-ti oi tui ngì-têu thùng-pâu chûng-kiên vi ngì-têu hîn-hí yit-vi chhiong ngài án-ngiòng ke siên-tî; ngì-têu oi thâng-chhiùng kì.
[16] “Ngì-têu chhi-si̍p chhai Hò-lie̍t-sân ke-ngit, khién-khiù Song-chú — ngì-têu ke Song-ti, kóng: ‘M̀-hó chai pûn ngài-têu thâng-tó Song-chú — ngài-têu ke Song-ti kóng-fa, ya m̀-hó chai pûn ngài-têu khon-tó Kì chhai fó-yam chûng chhut-hien, miên-tet ngài-têu ngiàm-sṳ̀ sí-thet.’
[17] Tui án-ngiòng, Song-chú chhiu lâu ngài kóng: ‘Kì-têu ke yêu-khiù chhin-chho̍k.
[18] Ngài oi tui kì-têu thùng-pâu chûng-kiên vi kì-têu hîn-hí yit-vi chhiong ngì án-ngiòng ke siên-tî. Ngài oi chiông só-oi kóng ke fa chhîn-chhṳ lâu kì kóng; kì oi chiông Ngài yit-chhiet ke min-lin lâu ngìn-mìn kóng.
[19] Kì oi fung Ngài ke miàng kóng Ngài ham kì kóng ke fa; má-ngìn m̀ thâng-chhiùng, má-ngìn chhiu voi su chit-fa̍t.
[20] Na-he yû siên-tî mò Ngài ke min-lin, chúng-he chia Ngài ke miàng kóng-fa, ya-he yû siên-tî yung phe̍t ke sṳ̀n-mìn ke miàng kóng-fa, kì yit-thin oi chhú sí-hìn.’
[21] “Ngì-têu khó-nèn voi sióng: ‘Oi ngióng-pân chang voi tî, ke m̀-he Song-chú só-kóng ke fa?’
[22] Na-he yû siên-tî chhṳ-kâ ngin-vì thoi Song-chú kóng-fa, chúng-he kì só-kóng ke fa pin-mò sṳ̍t-hien, án-ngiòng, kì ke fa chhiu m̀-he Song-chú só-kóng ke. Ke siên-tî he cheu chhṳ-kâ ke yi-sṳ kóng-fa, ngì-têu m̀-sṳ́ kiâng kì.”