[1] “Chhai Song-chú — ngì-têu ke Song-ti sêu-me̍t Kì oi su-pûn ngì-têu ke-thi ke kok mìn-chhu̍k, sṳ́ ngì-têu cham-liâng kì-têu ke thú-thi, pûn ngì-têu he̍t chhai kì-têu ke sàng-chṳ́n lâu vuk-è yî-heu,
[2] ngì-têu chhiu oi chiông kûi-te thú-thi fûn-cho sâm-khî, chhai tak-khî ke chûng-sîm hí yit-chho sàng, oi chhai kâu-thûng fông-phien ke thi-fông, sṳ́ yîn-vi ko-sṳt hoi-sí ngìn ke ngìn cho-tet thò-to ke-vi, yêu-khiù pó-fu.
[4] Na-he yû-ngìn m̀ tú-hó hoi-sí lâu kì chhiòn-mò yên-sù ke ngìn, kì cho-tet thò-to yit-ke thò-sám-sàng hi pó-miang.
[5] Kí-li lòi-kóng, yû-ngìn lâu lìn-sa khiung-ha to su-lìm chûng chám su-é, tông chám ke sṳ̀, kì ke pú-thèu lut-thet, pî-to kì lìn-sa ke sṳ̂n-hong, hoi kì sí-thet, liá-ke ngìn cho-tet thò-to ngim-hò yit-ke thò-sám-sàng hi pó-miang.
[6] Na-he chṳ́-yû yit-ke thò-sám-sàng, khó-nèn yîn-vi lu-thù thet-yén, ke po-hiet-sù ke chhîn-chhit kiuk-tó kì, chhai thai fat-fó chûng chiông kì chhṳ̀-sí. Khì-sṳ̍t, liá-ke ngìn he m̀ tú-hó hoi-sí lâu kì chhiòn-mò yên-sù ke lìn-sa, he m̀ yin-kôi chhú-sí ke.
[7] Só-yî, ngài min-lin ngì-têu oi hí sâm-chho thò-sám-sàng.
[8] “Song-chú — ngì-têu ke Song-ti, cheu Kì hiong ngì-têu chú-siên só-cho ke yin-hí, na-he khok-chán ngì-têu ke thi-kie, chiông Kì yin-hí pûn ngì-têu ke thú-thi su-pûn ngì-têu,
[9] ngì-têu chhiu oi nang-ngoi chen-kâ sâm-chho thò-sám-sàng. (Na-he ngì-têu ngin-chṳ̂n chûn-hàng ngài kîm-pû-ngit hiong ngì-têu pân-pu ke só-yû kie-min, kin-oi Song-chú — ngì-têu ke Song-ti, sòng-sòng chûn-hàng Kì ke tho, Kì chhiu voi chiông liá thú-thi su-pûn ngì-têu.)
[10] Ngì-têu oi án-ngiòng cho, pûn mò-chhui ke ngìn m̀-sṳ́ sí; ngì-têu ya m̀-sṳ́ chhai Song-chú — ngì-têu ke Song-ti oi su-pûn ngì-têu ke thú-thi song sṳ̀n-tâm mò-chhui ke ngìn pûn-ngìn chhṳ̀-sí ke hiet-chai.
[11] “Na-he yû-ngìn hen kì ke lìn-sa, mài-fu̍k hí-lòi, ku-yi sat-hoi kì, yèn-heu thò-to yit-ke thò-sám-sàng hi,
[12] kì pún-sàng ke chóng-ló yit-thin oi phai-ngìn hi chiông kì khiòng-khiòng chok chón-lòi, kâu-pûn po-hiet-sù ke chhîn-chhit lòi chhú-sí kì.
[13] Ngì-têu m̀-sṳ́ lìn-mén liá-chúng ngìn, oi tui Yî-set-lie̍t chûng chhù-thet liá-chúng mèu-sat ngìn ke chhui, sṳ́ ngì-têu chhiu fàm-sṳ sun-li.”
[14] “Ngì-têu chhai Song-chú — ngì-têu ke Song-ti oi su-pûn ngì-têu ke thú-thi song, cho-m̀-tet sái lìn-sa ke thi-kie; ke he chhièn-ngìn só va̍k-thin ke.”
[15] “Tân-tân kho yit-ke chṳn-ngìn lòi-thin ngìn ke chhui he m̀-la ke; chṳ-séu oi-yû lióng-ke yî-song ke chṳn-ngìn chang cho-tet thin ngìn ke chhui.
[16] Na-he yû yit-ke fái-ngìn cho ká kien-chṳn, ham-hoi nang-ngoi yit-ke ngìn,
[17] liá lióng-ke chên-lun ke ngìn chhiu oi to Song-chú só-sién ke só-chhai, khiù lùn-pân ke chi-sṳ̂ lâu sṳ́m-phan-kôn lòi kiet-chhài.
[18] Sṳ́m-phan-kôn yit-thin oi siòng-se thiàu-chhà on-khien, na-he fat-hien chṳn-ngìn cho ká kien-chṳn, ham-hoi Yî-set-lie̍t thùng-pâu,
[19] ngì-têu chhiu oi tui-thai kì chhiong kì sióng-oi tui-thai thùng-pâu yit-yong. Án-ngiòng, ngì-têu chhiu cho-tet chhù-thet liá-chúng fái-sṳ.
[20] Khì-thâ ke ngìn thâng-tó chang voi kiâng, mò-ngìn kám chai cho liá-chúng fái-sṳ.
[21] Tui liá-chúng ngìn, ngì-têu m̀-sṳ́ lìn-mén, yin-kôi yung-miang phòi-miang, muk-chû phòi muk-chû, ngà-chhṳ́ phòi ngà-chhṳ́, sú phòi sú, kiok phòi kiok.”