[1] “Liá-ha, ngài yí-kîn pûn ngì-têu chhai chuk-fuk lâu chu-chú chṳ̂-kiên chhṳ-kâ tho̍k. Chhai chhin-tô châi-nan fat-sên heu, ngì-têu he̍t chhai Song-chú — ngì-têu ke Song-ti kiuk ngì-têu hi-to ke ngoi-koet sṳ̀, chhiu voi sióng-hí ngài pûn ngì-têu ke sién-chet.
[2] Na-he ngì-têu lâu ngì-têu ke chṳ́-sûn fì-sîm chón-yi, kûi-hiong Song-chú — ngì-têu ke Song-ti, yit-sîm yit-yi chûn-hàng ngài kîm-pû-ngit pân-pu pûn ngì-têu ke kie-min,
[3] Kì chhiu voi lìn-mén ngì-têu. Song-chú — ngì-têu ke Song-ti voi tui Kì kiuk ngì-têu fûn-san ke tak só-chhai, thu ngì-têu to-chón-lòi, sṳ́ ngì-têu chai hióng-su fàn-yùng.
[4] Chhiu-son ngì-têu liù-long to thiên-ngài hói-kok, Song-chú — ngì-têu ke Song-ti ya voi chiông ngì-têu chhi-si̍p khiung-ha, thu ngì-têu to-chón-lòi,
[5] sṳ́ ngì-têu chhùng-sîn tet-tó ngì-têu chú-siên he̍t-ko ke thú-thi, yu voi sṳ́ ngì-têu pí chú-siên hàn-kha hîn-vong, ngìn-khiéu hàn-kha tô.
[6] Song-chú — ngì-têu ke Song-ti voi chhai ngì-têu lâu ngì-têu chṳ́-sûn ke sîm hàng kot-lî, sṳ́ ngì-têu yit-sîm yit-yi kin-oi Kì, yu ki-siu̍k sên-fa̍t.
[7] Song-chú — ngì-têu ke Song-ti voi chiông liá-têu chu-chú kâ chhai ke-têu nâu ngì-têu, pet-hoi ngì-têu ke thi̍t-ngìn sṳ̂n-song.
[8] Ngì-têu voi chai yit-pái thâng-chhiùng Song-chú, chûn-hàng ngài kîm-pû-ngit pân-pu pûn ngì-têu yit-chhiet ke kie-min.
[9] Song-chú — ngì-têu ke Song-ti voi sṳ́ ngì-têu ke sṳ-ngia̍p fat-tha̍t, tô-chṳ́ tô-sûn, liuk-hiuk hîn-vong, ńg-kuk fûng-tên. Song-chú lo̍k-yi sṳ́ ngì-têu ke chú-siên fàn-yùng, Kì khiung-yong voi lo̍k-yi sṳ́ ngì-têu fàn-yùng.
[10] Chúng-he ngì-têu yit-thin oi thâng-chhiùng Kì, chûn-hàng siá chhai liá Fap-li̍t-sû, Kì só-yû ke fap-li̍t kie-min. Ngì-têu yit-thin oi yit-sîm yit-yi kûi-hiong Song-chú — ngì-têu ke Song-ti.
[11] “Ngài kîm-pû-ngit pân-pu pûn ngì-têu ke kie-min m̀-voi nàn chûn-hàng, ya lì ngì-têu mò kí-yén.
[12] Liá kie-min m̀-he koa chhai thiên-táng; ngì-têu m̀-sṳ́ mun: ‘Má-ngìn oi thoi ngài-têu sông-thiên hi chiông liá kie-min tai-chón thi-song lòi, hó pûn ngài-têu thâng-tó lòi sṳ̍t-hàng nè?’
[13] Liá kie-min me m̀-he chhai hói ke-phién; ngì-têu m̀-sṳ́ mun: ‘Má-ngìn oi thoi ngài-têu ko-hói hi chiông liá kie-min tai-lòi, hó pûn ngài-têu thâng-tó lòi sṳ̍t-hàng nè?’
[14] Khì-sṳ̍t, liá kie-min lì ngì-têu mò kí-yén, chhiu chhai ngì-têu choi-tú ya chhai ngì-têu sîm-tú, hó pûn ngì-têu chûn-hàng.
[15] “Kîm-pû-ngit, ngài chiông sâng-sí fo-fuk chhiòn-phu pài chhai ngì-têu mien-chhièn, pûn ngì-têu chhṳ-kâ tho̍k.
[16] Liá-ha, ngài fûn-fu ngì-têu kin-oi Song-chú — ngì-têu ke Song-ti, chûn-hàng Kì ke tho, chûn-sú Kì ke fap-li̍t, kie-min lâu li-kûi; án-ngiòng, ngì-têu chhiu voi sàng-cho fàn-yùng ke koet-kâ. Chhai ngì-têu oi ngi̍p-hi cham-liâng ke thú-thi song, Song-chú — ngì-têu ke Song-ti voi su-fuk pûn ngì-têu.
[17] Na-he ngì-têu ke sîm m̀-hén thâng-chhiùng, fán-chón su yín-yu hi-pai phe̍t ke sṳ̀n-mìn,
[18] ngài liá-ha chhai liá-vi ngiàm-ngiàm kín-ko ngì-têu, ngì-têu yit-thin voi me̍t-mòng, chhie̍t-tui m̀-voi chhòng-kiú he̍t chhai Yok-tan-hò ke-phién, ngì-têu oi ngi̍p-hi cham-liâng ke thú-thi song.
[19] Liá-ha, ngài ham thiên-thi lòi cho-chṳn, ngài chiông sâng-miang lâu sí-mòng, chuk-fuk lâu chu-chú pài chhai ngì-têu mien-chhièn. Oi tho̍k sâng-miang! Ngì-têu lâu ngì-têu ke chṳ́-sûn chhiu-nèn sên-chhùn.
[20] Oi kin-oi Song-chú — ngì-têu ke Song-ti, thâng-chhiùng Kì, tui Kì chûng-sîm. Án-ngiòng, ngì-têu lâu ngì-têu ke chṳ́-sûn chhiu-nèn chhòng-kiú sên-fa̍t chhai Song-chú yin-hí pûn ngì-têu chú-siên Â-pak-lâ-hón, Yî-sat, Ngâ-kok ke thú-thi song.”