[1] “Ha̍k-lón su-sông ya-he yâm-thet ke ngìn cho-m̀-tet kâ-ngi̍p kin-pai Song-chú ke chhi-fi.
[2] “Sṳ̂-sên-chṳ́ cho-m̀-tet kâ-ngi̍p kin-pai Song-chú ke chhi-fi; kì ke chṳ́-sûn, sṳm-chṳ to thi-sṳ̍p thoi, ya cho-m̀-tet kâ-ngi̍p kin-pai Song-chú ke chhi-fi.
[3] “Â-mùn-ngìn ya-he Mô-ap-ngìn cho-m̀-tet kâ-ngi̍p kin-pai Song-chú ke chhi-fi. Kì-têu ke chṳ́-sûn, sṳm-chṳ to thi-sṳ̍p thoi, ya cho-m̀-tet kâ-ngi̍p kin-pai Song-chú ke chhi-fi.
[4] Yîn-vi ngì-têu chhut Âi-khi̍p ke sṳ̀, kì-têu mò kiûng-kip ngì-têu lu-thù song só sî-yeu ke liòng-sṳ̍t lâu súi, kì-têu yu tui Mî-sok-put-tha̍t-mí-â ke Pí-tho̍t-sàng chhiáng Pí-ngí ke lai-é Pâ-làn lòi chu-chú ngì-têu.
[5] Chúng-he Song-chú — ngì-têu ke Song-ti m̀-hén thâng Pâ-làn ke fa, fán-chón chiông chu-chú chón-cho chuk-fuk, yîn-vi Song-chú — ngì-têu ke Song-ti siak ngì-têu.
[6] Ngì-têu yit-sên-ngìn chhie̍t-tui cho-m̀-tet vi kì-têu khiù phìn-ôn, khiù fàn-yùng.
[7] “Ngì-têu cho-m̀-tet méu-sṳ Yî-tûng-ngìn, yîn-vi kì-têu he ngì-têu ke chhîn-chhu̍k. Ngì-têu cho-m̀-tet méu-sṳ Âi-khi̍p-ngìn, yîn-vi ngì-têu sṳt chhiam-sṳ̀ he̍t chhai kì-têu ke thú-thi song.
[8] Liá-têu ngìn ke thi-sâm thoi chṳ́-sûn cho-tet kâ-ngi̍p kin-pai Song-chú ke chhi-fi.”
[9] “Ngì-têu chhai chan-thi ôn-yàng ke sṳ̀, oi lì-khôi só-yû sṳ́ ngì-têu chhai lî-ngì song mò chhiang-li ke sṳ.
[10] Na-he yû-ngìn chhai am-pû-sṳ̀ yîn-vi leu-chîn pien-cho mò chhiang-li, kì chhiu oi lì-khôi kiûn-yàng, liù chhai yàng-ngoi.
[11] Lìm-am-é kì yit-thin oi sé-sṳ̂n, to ngit-thèu lo̍k-sân chang cho-tet chón yàng-fòng.
[12] “Ngì-têu oi chhai kiûn-yàng ngoi chṳ́-thin yit-ke só-chhai cho phien-só.
[13] Chhai ngì-têu ke chông-phi chûng oi tai yit-kî se chhán-è, ô-sṳ́ ke sṳ̀ nâ-lòi yet fut-è, yèn-heu chiông só ô ke mài-thet.
[14] Ngì-têu ke kiûn-yàng yit-thin oi pó-chhṳ̀ lî-ngì song ke chhiang-li; yîn-vi Song-chú — ngì-têu ke Song-ti lâu ngì-têu khiung-ha chhai yàng-tú, pó-fu ngì-têu, sṳ́ ngì-têu tá-yàng thi̍t-ngìn. Ngì-têu cho-m̀-tet cho mò chhiang-li ke sṳ, miên-tet Song-chú lì-khôi ngì-têu.”
[15] “Na-he yû nù-phu̍k thò-chéu lì-khôi chú-ngìn, yêu-khiù ngì-têu ke pó-fu, ngì-têu cho-m̀-tet chiông kì sung-chón kì chú-ngìn ke-vi.
[16] Kì cho-tet chhṳ-yù chhai ngì-têu tông-chûng sién oi he̍t ke sàng; ngì-têu cho-m̀-tet khî-fu kì.
[17] “Yî-set-lie̍t ke nàm-ńg cho-m̀-tet chhai sṳ̀n-meu cho ngiù-lòng ya-he kî-ńg.
[18] Cho ngiù-lòng ya-he kî-ńg tet-tó ke chhièn cho-m̀-tet nâ to Song-chú — ngì-têu Song-ti ke sṳn-thien vàn-ngien; yîn-vi Song-chú — ngì-têu ke Song-ti chhin nâu ngìn hi-cho sṳ̀n-meu ke nàm-chhông lâu kî-ńg.
[19] “Ngì-têu chia chhièn, liòng-sṳ̍t, ya-he khì-thâ ke tûng-sî pûn Yî-set-lie̍t thùng-pâu, cho-m̀-tet son li-sit.
[20] Chia-pûn ngoi-chhu̍k ngìn cho-tet son li-sit, chia-pûn Yî-set-lie̍t thùng-pâu chhiu cho-m̀-tet. Ngì-têu chûn-sú liá kûi-thin, Song-chú — ngì-têu ke Song-ti chhiu voi chhai ngì-têu oi ngi̍p-hi cham-liâng ke-te thú-thi song fàm-sṳ su-fuk pûn ngì-têu.
[21] “Ngì-têu hiong Song-chú — ngì-têu ke Song-ti hí-ngien, cho-m̀-tet kín yèn-chhàn m̀-vàn; yîn-vi Song-chú yit-thin voi thó ngì-têu só-hí ke ngien. M̀ vàn-ngien chhiu-he fam-chhui.
[22] Mò hiong Song-chú — ngì-têu ke Song-ti hí-ngien, m̀-son fam-chhui, chúng-he chhṳ-thung hí-ngien, yit-thin oi vàn-ngien.
[24] “Ngì-têu kîn-ko lìn-sa ke phù-thò-yèn, cho-tet sùi-yi sṳ̍t yèn-chûng ke phù-thò, chúng-he cho-m̀-tet nâ má-ke tûng-sî chiông phù-thò chông hí-lòi tai-chéu.
[25] Ngì-têu kîn-ko lìn-sa ke ma̍k-thièn, cho-tet yung sú lo̍t ma̍k-chhon lòi-sṳ̍t, chúng-he cho-m̀-tet yung liàm-è hi sû-kot.”