[1] “Ngì-têu yit-thin oi chhai Â-pit-ngie̍t sú Phàn-ko-chiet, tui Song-chú — ngì-têu ke Song-ti péu-sṳ chûn-kin, yîn-vi Kì sṳt chhai liá-chak ngie̍t ke yit-ke am-pû kiu ngì-têu chhut Âi-khi̍p.
[2] Ngì-têu oi to Song-chú — ngì-têu Song-ti só-sién oi sat-li̍p Kì ke miàng ke só-chhai, chhai ke-vi chhṳ̀ ngiù-yòng, cho Phàn-ko-chiet ke sên-ngì hien-pûn Kì.
[3] Phàn-ko-chiet ke sṳ̍t-vu̍t cho-m̀-tet yû fat-kau ke. Ngì-têu yit-thin oi sṳ̍t vù-kau-piáng chhit-ngit, chhiu-chhiong ke-ngièn ngì-têu kín-kín chhuk-chhuk lì-khôi Âi-khi̍p. Liá-chúng piáng yu ôn-to khú-nan-piáng; ngì-têu oi sṳ̍t, sṳ́ ngì-têu yit-sên-ngìn ki-ngiam chhut Âi-khi̍p, lì-khôi khú-nan ke-ngit.
[4] Liá chhit-ngit, ngì-têu kin-nui ke tak-kâ chhiòn-phu put-chún yû fat-kau; thi-yit am-pû só chhṳ̀ thèu-sâng ke ngiuk oi chhai ke am-pû sṳ̍t-thet, cho-m̀-tet liù-to thi-ngi chêu-sṳ̀n.
[5] “Ngì-têu oi chhai Song-chú — ngì-têu ke Song-ti só-sién oi sat-li̍p Kì ke miàng ke só-chhai chhṳ̀ Phàn-ko-chiet ke thèu-sâng, cho-m̀-tet chhai Kì oi su-pûn ngì-têu ke khì-thâ sàng-tú lòi chhṳ̀. Oi tén ngit-thèu lo̍k-sân yî-heu chang chhṳ̀, yîn-vi chhut Âi-khi̍p tông-sṳ̀ he chhai ngit-thèu lo̍k-sân ke sṳ̀.
[7] Oi chhai Song-chú — ngì-têu ke Song-ti só-sién ke só-chhai chú chi-ngiuk, sṳ̍t chi-ngiuk, thi-ngi chêu-sṳ̀n chhiu chón vuk-hâ hi.
[8] Ngì-têu oi ki-siu̍k sṳ̍t vù-kau-piáng liuk-ngit; thi-chhit ngit oi chhi-si̍p kin-pai Song-chú — ngì-têu ke Song-ti, cho-m̀-tet kûng-chok.”
[9] “Ngì-têu oi tui khôi-sṳ́ sû-kot ke-ngit, son chhit lî-pai,
[10] yèn-heu sú Chhit-chhit Sû-kot-chiet, tui Song-chú — ngì-têu ke Song-ti péu-sṳ chûn-kin. Ngì-têu oi cheu Kì só sóng-su ke sû-sṳ̀n, tai-tén kâm-sîm-chi lòi hien-pûn Kì.
[11] Ngì-têu lâu ngì-têu ke chṳ́-ńg, nù-phu̍k, nù-pî, he̍t chhai ngì-têu sàng-tú ke Li-vi-ngìn, pin chhai ngì-têu chûng-kiên ke ngoi-chhu̍k ngìn, kû-yì lâu koá-fu, oi chhai Song-chú — ngì-têu ke Song-ti só-sién oi sat-li̍p Kì ke miàng ke só-chhai khiung-ha fôn-hí khin-chuk.
[12] Ngì-têu yit-thin oi khok-sṳ̍t chûn-sú liá-têu thiàu-li; m̀-hó m̀ ki-tet ngì-têu sṳt chhai Âi-khi̍p cho-ko nù-chhòi.”
[13] “Ngì-têu tún-hó ńg-kuk lâu sîn-chiú yî-heu, oi sú Tap Liàu-è Chiet chhit-ngit.
[14] Ngì-têu lâu ngì-têu ke chṳ́-ńg, nù-phu̍k, nù-pî, pin he̍t chhai ngì-têu sàng-tú ke Li-vi-ngìn, ngoi-chhu̍k ngìn, kû-yì, koá-fu, oi khiung-ha fôn-hí khin-chuk.
[15] Ngì-têu oi chhai Song-chú — ngì-têu ke Song-ti só-sién ke só-chhai sú Tap Liàu-è Chiet chhit-ngit, péu-sṳ chûn-kin. Thai-kâ oi fôn-hí khoai-lo̍k; yîn-vi Song-chú — ngì-têu ke Song-ti voi sṳ́ ngì-têu fûng-sû, sṳ́ ngì-têu só-cho ke chhiòn-phu sun-li.
[16] “Chhiòn-koet só-yû ke nàm-ngìn oi yit-ngièn sâm-pái, chhiu-he chhai Phàn-ko-chiet, Chhit-chhit Sû-kot-chiet, Tap Liàu-è Chiet, to Song-chú — ngì-têu ke Song-ti só-sién ke só-chhai kin-pai Kì. M̀-hó khûng-sú hi.
[17] Tak-sà oi cheu Song-chú — ngì-têu ke Song-ti só-su ke fuk-fun, chhin chhṳ-kâ ke nèn-li̍t, tai lî-vu̍t hien-pûn Kì.”
[18] “Ngì-têu oi tui kok kî-chhu̍k chûng, vi Song-chú — ngì-têu ke Song-ti só su-pûn ngì-têu ke sàng-chṳ́n sat-li̍p sṳ́m-phan-kôn lâu khì-thâ kôn-yèn. Liá-têu ngìn yit-thin oi yung kûng-phìn sṳ́m-phan ngìn-mìn,
[19] oi kûng-chṳn mò phiên-sîm, m̀-hó lon yung chṳt-khièn; ya cho-m̀-tet pûn-ngìn sû-mâi, yîn-vi pûn-ngìn sû-mâi voi sṳ́ mìn-lî ke ngìn chhiâng-miâng, sṳ́ kûng-chṳn ke ngìn tiên-to sṳ-fî.
[20] Ngì-têu chṳp-hàng fap-li̍t oi chûi-khiù kûng-phìn chṳn-chhṳ̍t. Án-ngiòng, ngì-têu chang voi yû-hó sṳ̀n-chiap Song-chú — ngì-têu ke Song-ti só-oi su-pûn ngì-têu ke thú-thi, chhòng-kiú he̍t chhai ke-vi.
[21] “Ngì-têu vi Song-chú — ngì-têu ke Song-ti hí chi-thàn ke sṳ̀, cho-m̀-tet chhai sùn-thèu sat-li̍p Â-sa-lâ ńg-sṳ̀n ke su tún-è,
[22] ya cho-m̀-tet sat-li̍p sa̍k tún-è lòi pai, yîn-vi ke-he Song-chú — ngì-têu ke Song-ti só-nâu ke.”