[1] “Ngì-têu chhai Song-chú — ngì-têu ke Song-ti oi su-pûn ngì-têu ke thú-thi song, na-he fat-hien yû-ngìn pûn-ngìn chhṳ̀-sí, sṳ̂-thí pûn-ngìn fit chhai yâ-thi, chúng-he m̀-tî he má-ngìn chhṳ̀ ke,
[2] ngì-têu ke chóng-ló lâu sṳ́m-phan-kôn chhiu-oi hi-to fit sṳ̂-thí ke hien-chhòng, tui ke-vi liòng to chû-vì kok sàng-chṳ́n ke khî-lì,
[3] khon nai-chho sàng chui-khiûn hien-chhòng. Ke-sàng ke chóng-ló chhiu-oi sién yit-chak m̀-sṳt koa-ko ak, m̀-sṳt kâng-ko thièn ke se ngiù-mà,
[4] chiông kì khiên-to m̀-sṳt châu-ko súi ke hò-pa sùn, chhai mò-ngìn kâng-chung ko ke thi-fông tá-thôn kì ke kiáng-kîn.
[5] Li-vi chi-sṳ̂ ya oi thèn-tén hi, yîn-vi kì-têu oi kiet-chhài yû-koân siông-châng lâu hiûng-sat só-yû ke on-khien. Song-chú — ngì-têu ke Song-ti yí-kîn kién-sién kì-têu lòi sṳ-fung Kì, fung Kì ke miàng chuk-fuk.
[6] Chui-khiûn hien-chhòng ke-sàng ke chóng-ló, chhiòn-phu oi chhai ke-chak se ngiù-mà táng-kô sé-sú,
[7] yèn-heu khì-tó kóng: ‘Ngài-têu mò chhṳ̀ liá-ke ngìn, ya mò khon-tó má-ngìn chhṳ̀-sí kì.
[8] Song-chú â, khiù Ngì sa-miên Ngì tui Âi-khi̍p chṳ́n-kiu chhut-lòi ke chṳ́-mìn Yî-set-lie̍t. Khiù Ngì sa-miên ngài-têu, mo̍k pûn ngài-têu pà chhṳ̀ mò-chhui ke ngìn ke hiet-chai.’
[9] Ngì-têu án-ngiòng sṳ̍t-hàng Song-chú ke yêu-khiù, chhiu m̀-sṳ́ pà liá chhṳ̀-ngìn ke hiet-chai.”
[10] “Song-chú — ngì-têu ke Song-ti sṳ́ ngì-têu tá-yàng sù-thi̍t, chok-ngìn chón-lòi,
[11] ngì khó-nèn chhai chok-lòi ke ngìn tông-chûng fat-hien chhin-chiâng ke se-moi-é, tông kak-yi, sióng thó kì cho pû-ngiòng.
[12] Án-ngiòng, ngì chhiu cho-tet tai kì chón vuk-hâ. Kì yin-kôi thi thèu-nà-mô, chién sú chṳ́-kap, kiok chṳ́-kap,
[13] von-thet khiu ke sâm-fu, he̍t chhai ngì vuk-hâ vi kì ke yà-ôi ôi-sông yit-chak ngie̍t. Kîn-ko liá-chham sṳ̀-kiên, ngì chhiu cho-tet lâu kì kiet-fûn.
[14] Heu-lòi ngì na-he m̀-oi kì, chhiu-oi piong kì chhṳ-yù; yîn-vi ngì sṳt khiòng-pet kì lâu ngì kiet-fûn, m̀-hó chiông kì chún-cho nù-pî mai-thet.”
[15] “Na-he yû-ngìn yû lióng-ke pû-ngiòng, kì siak khì-chûng ke yit-sà, mò-siak nang-ngoi yit-sà. Kì-têu lióng-sà lâu kì kiung lai-é, chúng-he chóng-chṳ́ he ke kì mò-siak ke pû-ngiòng kiung ke;
[16] to pûn chhòi-sán ke sṳ̀, kì cho-m̀-tet phiên-sîm, cho-m̀-tet chiông chóng-chṳ́ ke khièn-li chón-pûn só-siak ke pû-ngiòng kiung ke lai-é.
[17] Chhiu-son chóng-chṳ́ he kì mò-siak ke pû-ngiòng só-kiung ke, ya oi sṳ̀n-ngin kì chóng-chṳ́ ke khièn-li, chhai pûn chhòi-sán ke sṳ̀ oi kâ yit-fun pûn kì. Kì he chóng-chṳ́, he â-pâ chui heu-sâng ke sṳ̀ kiung ke, yin-kôi tet-tó chóng-chṳ́ ke thi̍t-khièn.”
[18] “Na-he yû-ngìn yû ngang-kiáng yu phoi-ngia̍k ke lai-é, sûi-yèn tak-pái su chhú-fa̍t, kì hàn-he m̀ thâng-chhiùng yà-ôi ke fa,
[19] yà-ôi chhiu-oi chok kì, tai kì to pún-sàng mùn-héu, ke-têu chóng-ló mien-chhièn chiap-su sṳ́m-phan.
[20] Kì-têu oi tui ke-têu chóng-ló kóng: ‘Ngài-têu ke lai-é ngang-kiáng phoi-ngia̍k, m̀ thâng-chhiùng ngài-têu ke fa, kûi-ngit hau-chiú fong-thong.’
[21] Sàng-tú ke ngìn-mìn chhiu-oi yung sa̍k-thèu te̍p-sí kì. Án-ngiòng, chhiu nèn tui ngì-têu tông-chûng chhù-thet liá-chúng fái-sṳ. Yî-set-lie̍t ngìn-mìn thâng-tó liá-chúng sṳ, thai-kâ chang voi kiâng.”
[22] “Na-he yû-ngìn chhú sí-hìn, sṳ̂-thí koa chhai tún-è táng,
[23] liá sṳ̂-thí cho-m̀-tet liù chhai tún-è táng to thi-ngi ngit, yit-thin oi chhai ke-ngit mài-chong, yîn-vi sṳ̂-thí koa chhai tún-è táng voi lòi ngiâ Song-ti chu-chú ke thú-thi. Ngì-têu oi mài-chong sṳ̂-thí, miên-tet tá-lá-sap Song-chú — ngì-têu ke Song-ti su-pûn ngì-têu ke thú-thi.”