[1] Thiên nâ, chu-yi thâng ngài kóng; thi â, liù-sîm thâng ngài ke fa.
[2] Ngài ke kau-thô chhiong yí-tiám lo̍k hâ-lòi, chhiong lu-súi tit-lo̍k thai-thi. Ngài ke fa chhiong yí-mô chṳ̂-yun nun-chhó, chhiong kâm-lìm lìm-sṳp fâ-muk.
[3] Ngài oi siên-yòng Song-chú ke sṳn-miàng; ngì-têu oi kô-siung ngài-têu Song-ti ke ví-thai.
[4] Song-chú he pó-fu ngài-têu ke Phàn-sa̍k; Kì ke chok-vì vàn-chhiòn, Kì ke tho-lu kûng-chṳn; Kì he sin-sṳ̍t, khó-kho ke Song-ti, Kì yu he kûng-ngi, yu he chṳn-chhṳ̍t.
[5] Chúng-he ngì-têu tui Kì mò chûng-sîm, mò chṳ̂-kiet cho Kì ke chṳ́-ńg, ngì-têu he fam-chhui, cha-khî ke yit-thoi.
[6] Ngì liá-têu mò chṳ-sṳt ke ngong pak-siang â, ngióng-pân kám án-ngiòng lòi po-tap Song-chú â? Kì he ngì-têu ke chhóng-chho Chú, ngì-têu ke â-pâ; Kì chhóng-chho ngì-têu, sṳ́ ngì-têu sàng-cho koet-kâ.
[7] Ngì-têu oi fì-sióng thèu-pái; ngì-têu oi sṳ̂-ngiam li̍t-sṳ́. Ngì-têu oi chhiáng fu-ló chṳ́-sṳ; ngì-têu oi chhiáng chóng-pi sot-mìn.
[8] Chṳ-kô-chá fûn-phi kok-koet ke liâng-thú, chiông ngìn-lui fûn-khôi ke-sṳ̀, Kì chhiu cheu Yî-set-lie̍t-ngìn ke su-muk, va̍k-thin van-mìn ke koet-kie.
[9] Kì sién Ngâ-kok ke chṳ́-sûn cho chhṳ-kâ ke chṳ́-mìn, yîn-vi kì-têu chhiu-he Song-chú thi̍t-phe̍t ke sán-ngia̍p.
[10] Kì chhai khóng-yâ chhìm-tó kì-têu, chhai pî-sâ chéu-sa̍k ke fông-thi khon-tó kì-têu. Kì oi-fu kì-têu, cheu-ku kì-têu, chhiong pó-fu chhṳ-kâ ke muk-chû-yìn.
[11] Ên-tiâu la-teu kâu-chṳ́ ho̍k-pî, tá-khôi yi̍t-kap pà se ên-tiâu; Song-chú ya yung yi̍t-kap lòi-pà, sṳ́ Yî-set-lie̍t m̀-voi tiet-sí.
[12] Song-chú chhṳ-kâ tai-liâng Kì ke chṳ́-mìn, m̀-sṳ́ khì-thâ sṳ̀n-mìn lòi hia̍p-chhu Kì.
[13] Kì sṳ́ kì-têu thúng-chhṳ kô-thi, hióng-su thièn-yèn chhut ke thú-sán. Kì-têu sṳ̍t sa̍k-phung chûng ke phûng-thòng, sa̍k-thèu thi chhut-sán ke kám-lám-yù.
[14] Kì-têu ke ngiù-yòng yû lo̍t m̀-thet ke nen-chṳp; kì-têu yû chui-hó ke mièn-yòng, sân-yòng, kì-têu yû Pâ-sân ke ngiù-kâ, yòng-kâ; kì-têu yû song-tén ke ma̍k-é lâu phù-thò-chiú.
[15] Liá chṳn-chhṳ̍t ke chṳ́-mìn chhiam-chhiam phì-chong; kì-têu yit fu-khiòng chhiu khôi-sṳ́ phoi-ngia̍k. Kì-têu lì-khôi chhóng-chho kì-têu ke Song-ti; kì-têu fit-thet chṳ́n-kiu kì-têu ke Phàn-sa̍k.
[16] Kì-têu pai ngiéu-siong ngiâ Song-chú chhit-tu; kì-têu cho fái-sṳ ngiâ Kì thai fat-khién.
[17] Kì-têu hien-chi pûn kúi-sṳ̀n, pûn ká-sṳ̀n, pûn kì-têu m̀ ngin-sṳt ke sṳ̀n-mìn; liá-têu sṳ̀n-mìn he chui-khiun chang chhut-hien ke, he kì-têu ke chú-siên vàn-chhiòn m̀-kiâng ke.
[18] Kì-têu m̀-tap kì-têu ke Phàn-sa̍k, kì-têu ke â-pâ; kì-têu m̀ ki-tet su sâng-miang pûn kì-têu ke Song-ti.
[19] Song-chú khon-tó liá ke fái hàng-vì chhiu fat-khién; Kì fit-thet chhṳ-kâ ke chṳ́-ńg.
[20] Kì kóng: “Ngài oi êm-mien m̀ pông-chhu kì-têu, oi khon kì-têu ke kiet-khiu̍k ngióng-pân; yîn-vi kì-têu he ngang-kiáng ke yit-thoi, he mò chûng-sîm ke chṳ́-ńg.
[21] Kì-têu yung ‘m̀ son-he sṳ̀n’ ke ngiéu-siong kit Ngài chhit-tu; kì-têu yung ká-sṳ̀n ngiâ Ngài su-hi. Só-yî, Ngài oi yung ‘m̀ son-he chṳ́-mìn’ ke mìn-chhu̍k lòi kit kì-têu chhit-tu; Ngài oi yung ngong-tong ke koet ngiâ kì-têu su-hi.
[22] Ngài ke thai fat-khién chhiong fó-sêu, oi sêu-thet thi-song só-yû ke; Ngài yit fat-fó, yîm-kiên chhiu chho̍k hí-lòi, lièn thai-sân ke kîn-kî ya sêu chhiang-chhiang.
[23] “Ngài oi yung châi-nan lòi tá-kit kì-têu; Ngài oi yung só-yû ke chien sa kì-têu.
[24] Kì-têu na m̀-he ngo-sí, chhiu-he phiang-sí; tet-ngìn-kiâng ke vûn-é oi sêu-me̍t kì-têu. Kì-têu voi pûn tông-thu̍k ke sà ngâu-sông; chhin ok ke yâ-chhu oi kûng-kit kì-têu.
[25] Chan-chên sṳ́ kû-yì liù-long kiê-thèu; siông-chhṳ̀ sṳ́ koá-fu khûng-sú kiên-fòng. Chong-tên seu-ńg sí chhiang-chhiang; ló-ngìn se-chṳ́ sí kông-kông.
[26] Ngài pún-lòi yin-kôi me̍t-thet kì-têu, sṳ́ thiên-ha ngìn m̀ ki-tet kì-têu;
[27] chúng-he Ngài m̀ pûn thi̍t-ngìn khoâ-khiéu, Ngài m̀ pûn sù-thi̍t nong-sióng, kóng he kì-têu tá-yàng Ngài ke chṳ́-mìn; khì-sṳ̍t he Ngài chhîn-sú fí-me̍t kì-têu.”
[28] Yî-set-lie̍t he mò sòng-sṳt ke mìn-chhu̍k; kì-têu tông-chûng mò pan-sà yû chṳ-sṳt.
[29] Kì-têu sióng m̀-chhut sṳt-phai ke ngièn-yîn; kì-têu m̀ mìn-pha̍k chhṳ-kâ ke kiet-khiu̍k.
[30] Yit-ke ngìn cho-má-ke nèn kiuk-san chhiên-ngìn? Lióng-ke ngìn nèn sṳ́ van-ngìn to-chhu thò-chéu? Yîn-vi kì-têu ke Phàn-sa̍k mai-thet kì-têu, thai-nèn ke Song-chú chhṳ-kâ fit-thet kì-têu.
[31] Thi̍t-ngìn chhiu tî chhṳ-kâ ke sṳ̀n-mìn mò chhòi-thiau, mò chhiong Yî-set-lie̍t ke Phàn-sa̍k thai-yû nèn-li̍t.
[32] Thi̍t-ngìn chhiong Só-tô-mâ, Ngò-mô-lâ án phai-fái, chhiong phù-thò-su kiet tông-fú tông-thu̍k ke kó-chṳ́.
[33] Kì-têu ke chiú chhiu-chhiong thu̍k-sà ke héu-súi án-thu̍k.
[34] Song-chú ki-tet thi̍t-ngìn ke fái hàng-vì, sṳ̀-kî yit-to chhiu-oi chit-fa̍t kì-têu.
[35] Song-chú oi hiong thi̍t-ngìn po-sù; to-sṳ̀ kì-têu chhiu voi phai-fái. Kì-têu me̍t-mòng ke ngit yí-kîn khiûn lé, kì-têu ke chûng-khiu̍k chhin-kiak chhiu voi to.
[36] Song-chú khon-tó Kì ke chṳ́-mìn, mò-lun cho nù-chhòi ke ya-he chhṳ-yù ke, chhiòn-phu sṳt-phai mò-li̍t, chhiu vi kì-têu sṳ̂n-yên, lìn-sit Kì ke phu̍k-ngìn.
[37] Song-chú oi chit-phi Kì ke chṳ́-mìn: “Ngì-têu só-pai ke sṳ̀n-mìn chhai nai-vi? Ngì-têu kho ke se sa̍k-thèu chhai nai-vi?
[38] Ngì-têu yung sên-ngì ke yù vi-ko kì-têu, ngì-têu yung kin-sṳ̀n ke chiú kon-ko kì-têu. Liá-ha ham kì-têu lòi pông-chhu â! Thai-sâng ham kì-têu lòi pó-fu â!
[39] “Ngì-têu liá-ha oi khon chhîn-chhú! Ngài, chṳ́-yû Ngài chang-he Song-ti, chhai Ngài yî-ngoi mò phe̍t ke sṳ̀n. Ngài sṳ́ ngìn sí, ya sṳ́ ngìn sâng; Ngài tá-sông ngìn, ya yî-chhṳ ngìn; mò-ngìn nèn thot-lì Ngài ke sú.
[40] Ngài yung Ngài yún-yén ke sâng-miang, hiong-thiên khià-sú lòi fat-sṳ kóng:
[41] Ngài oi nò-li hâu-kông ke kiam, oi chṳp-hàng kûng-tho ke sṳ́m-phan; Ngài oi chit-fa̍t thi̍t-ngìn, po-yin hen Ngài ke ngìn.
[42] Ngài ke chien-thèu oi lîm hiet lîm-to chui, chhiu-he pûn-ngìn chhṳ̀ pûn-ngìn chok ke hiet. Ngài ke li-kiam oi sṳ̍t kì-têu ke ngiuk, chhiu-he sù-thi̍t chûng liâng-chhiu ke thèu-nà.”
[43] Lie̍t-koet â, oi vi Song-chú ke chṳ́-mìn fôn-hí! Yîn-vi Song-chú vi Kì ke phu̍k-ngìn thó hiet-chai. Kì oi po-yin Kì ke sù-thi̍t; Kì oi kiet-chhiang Kì ke thú-thi, Kì oi kiu-su̍k Kì ke chṳ́-mìn.
[44] Mô-sî lâu Nun ke lai-é Yok-sû-â chhai Yî-set-lie̍t chhiòn fi-chung mien-chhièn thai-sâng thu̍k liá-sú sṳ̂.
[45] Mô-sî chiông Song-ti ke kau-hiun hiong Yî-set-lie̍t ngìn-mìn siên-ko heu,
[46] tui kì-têu kóng: “Ngì-têu yit-thin oi chiông ngài kîm-pû-ngit hiong ngì-têu pân-pu ke liá-têu kie-min ki chhai sîm-chûng, yu oi chhòn-pûn ngì-têu ke chṳ́-ńg, ham kì-têu khok-sṳ̍t chûn-hàng liá fap-li̍t yit-chhiet ke fa.
[47] Liá-têu kie-min m̀-he mò-yung ke fa, he ngì-têu ke sâng-miang. Ngì-têu chûn-hàng, chhiu cho-tet chhòng-kiú he̍t chhai Yok-tan-hò tui-mien — ngì-têu oi ngi̍p-hi cham-liâng ke ke-te thú-thi.”
[48] Ke-ngit, Song-chú tui Mô-sî kóng:
[49] “Ngì oi-to Yâ-li-kô-sàng tui-mien, chhiu-he Mô-ap-thi ke Â-pâ-lìm sân-khî, pak-sông Nì-pô-sân, tui ke-vi yén-yén khon Kâ-nàm-thi, chhiu-he Ngài oi su-pûn Yî-set-lie̍t-ngìn ke thú-thi.
[50] Ngì oi sí chhai ke sân-táng, kûi chú-chûng ke-vi hi, chhiong ngiâ-kô Â-lùn sí chhai Hò-ngí sân-táng, kûi chú-chûng ke-vi hi yit-yong,
[51] yîn-vi ngì lióng-sà chhai Yî-set-lie̍t-ngìn mien-chhièn vì-poi Ngài. Ngì-têu chhai Chhìm ke khóng-yâ, Kâ-tâi-sṳ̂-sàng fu-khiun ke Mí-li-pâ chhièn-súi sùn, chhai ngìn-mìn mien-chhièn mò chûn Ngài vì-sṳn.
[52] Só-yî, ngì cho-tet tui yén-yén ke thi-fông khon Ngài oi su-pûn Yî-set-lie̍t-ngìn ke thú-thi, chúng-he ngì cho-m̀-tet ngi̍p-hi.”