[1] Guyyaan Sanbataa dabree, torbaan keeysaa guyyaa duraa bariisaa, Maariyaam Magdalaa tii fi Maariyaam taaniis qabrii san laaluuf dhaqan.
[2] Kunoo, maleeykaan Gooytichaa samii irraa waan gadi bu'eef jecha, dachiin ni sossoote; inni niis dhufee ti, dhagaa balbala qabrii irraa garagalchee ti irra taa'e.
[3] Bifti isaa akka hangaasuu, huccuun isaa tiis adii akka cabbii ti ture.
[4] Waardiyyoonni isa sodaa, hollatanii ti akkuma waan du'anii ti tahan.
[5] Maleeykaan sun ammoo dubartoota saniin, “Hin sodaatinaa! Isin Yesuus fannifamee ture akka barbaaddan anuu niin beeka.
[6] Inni as hin jiru, akkuma jedhe sanitti ka'ee ti jira; koottaa tii bakka reefki isaa kaayamee ture laalaa!
[7] Amma gaa, daddafaa deemaa tii, barattoota isaatti, akka inni du'aa ka'e fi, ammaas akka inni isin dura gara Galiilaa deemu, achittiis akka isa arkuuf teeysan itti himma! Kunoo ani isinitti himee tiin jira” jedheeni.
[8] Hogguus isaan sodaachaa ammaas gammachuu guddoo dhaan, barattoota isaatti odeeysuuf, qabrii bahanii ti fiigan.
[9] Kunoo, Yesuus isaanumaa huu qunnamee ti nagaya gaafate; isaaniis itti ol dhufanii ti, miila isaatti maramanii sagadaniif.
[10] Hogguus Yesuus, “Hin sodaatinaa, deemaa tii Galiilaatti akka gadi bu'an obboleeyyan kiyyatti himaa! Achitti ana ni arku” isaaniin jedhe.
[11] Dubartoonni odoo karaa deemaa jiranii, waardiyyoota qabrii eegaa turan keeysaa hangi tokko, magaalaa seenanii ti, waan tahe san hundumaa luboota angafootatti ni odeeysan.
[12] Luboonni angafoonni, manguddootaa wajjiin wal gahanii eega marihatan booda, horii guddaa jara loltuu saniif kannanii ti,
[13] “Barattoota isaa tu, halkan odoo nuti hirriibatti jirruu dhufanii, reefka isaa hatanii deeman jedhaa tii ummatatti odeeysaa!
[14] Dubbiin tun bulchaa biyyaa gurra yoo buute, nuu tu isa fudhachiisee, ammaas isiniis rakkoo keeysa akka hin seenne goona” jedhaniin.
[15] Akkasitti waardiyyoonni horii fudhatanii, akkuma eemaraman san godhan. Oduun tun akkasumatti hanga arraatti illee, ummata Yihudaa jiddutti ballinaan odeeyfamti.
[16] Eegana barattoonni kudha tokko, Galiilaa, gara gaara Yesuus itti isaan qaceelchetti deeman.
[17] Hogguu Yesuus arkaniis, ni sagadaniif; warri hangi tokko ammoo ni maman.
[18] Yesuus isaanitti dhihaatee ti, “Amriin hundinuu samii irrattiis, lafa irrattiis anaaf kannamtee ti jirtii.
[19] Eegasuu deemaa tii, maqaa Abbaatti, kan Ilmaatti, kan Ruuhal Qudusittiis isaan cuuphaa, saboota hundumaa irraa, barattoota godhaa!
[20] Waaniin isin ajaje hundumaa eeguus, isaan barsiisaa! Kunoo, aniis hanga dhuma addunyaatti wayta hundumaa isiniin wajjiin jira” isaaniin jedhe.