[1] Yesuus ammaas, “Namootatti mullachuuf jettanii gocha qaceelummaa keeysanii nama duratti akka hin goone if eeggadhaa! Akkana yoo gootan ammoo, Abbaa keeysan kan samii irraa biraa zajaa hin arkattan.
[2] “Eegaa, ati wayta sadaqaa kannitu, akka warri fakkeeysituun namoota biratti faarfamuuf jedhanii, manneen sagadaa tii fi karaa irratti godhan sanitti, atiis akkasumatti if dura garrii hin afuufsisin! Dhugumaan isinitti hima, isaan kanneen ujuraa isaanii fudhatanii ti jiru.
[3] Ati ammoo wayta sadaqaa kannitu, waan harki kee kan mirgaa godhu, harki kee kan bitaa illeen hin beekin!
[4] Duuba sadaqaa tee yoo dhooysatti goote; hogguus Abbaan kee kan dhooysatti arku ammoo zajaa tee siif kanna” jedhe.
[5] Yesuus itti furee, “Wayta kadhannaa gootaniis, akka warra fakkeeysituu hin tahinaa! Isaan namootatti mullachuuf jedhanii manneen sagadaa keeysattii fi ruknii karaa gurguddaa irra dhaabbatanii kadhachuu dha jaalatu; ani dhugumaaniin isinitti hima, isaan ujuraa isaanii fudhatanii ti jiru.
[6] Ati ammoo hogguu kadhattu, mana kee titti ol galii, balbala cufadhu, Abbaa kee isa ijatti hin mullanne kadhadhu! Eegas Abbaan kee inni waan dhooysatti godhame arkuus zajaa tee siif kanna.
[7] “Hogguu kadhattaniis akka warra ummata saba Israa'el hin tahin, dubbii hiikaa hin qabne hin hoddomeeysinaa! Isaan dubbii hoddomeeysuu isaanii irraa akka dhagayamanii ti itti fakkaata.
[8] Isin akka isaanii kana hin tahinaa! Bar Abbaan keeysan, waan isin barbaachisu odoo isinuu isa hin gaafatin dura ni beekaa!
[9] “Eegasuu akkana jechaa kadhadhaa, ‘Yaa Abbaa keenya, kan samii irra jirtu! Maqaan kee haa qulqullaawu!
[10] Mootummaan tee haa dhuftu, fedhiin tee samii irratti akka taatutti, akkasumatti ammaas lafa irrattiis haa taatu!
[11] Soora guyya-guyyaan nu barbaachisu arra nuuf kanni!
[12] Akkuma nuti deeyni namaaf oomfii goonutti, atiis deeyni teenya oomfii nuuf godhi!
[13] Fitinatti nu hin naqin, hamaa jalaa nu eewali malee; [mootummaan, humni niis, ulfinni niis baruma baraan keetuma. Aammiin!]’
[14] “Namootaaf dilii isaanii yoo oomfii gootan, Abbaan keeysan inni samii irra jiru dilii teeysan oomfii isiniif godha.
[15] Isin ammoo namootaaf dilii isaanii oomfii godhuu yoo baattan, Abbaan keeysaniis ammaas dilii teeysan oomfii isiniif hin godhu!” jedhe.
[16] Yesuus, “Isin wayta soomantan ammoo, akka warra fakkeeysitutti fuula if hin xooleeysinaa! Isaan soomanuun isaanii namootatti akka mullatuuf jecha, fuula isaanii ni dootteeysu; dhugumaan isinitti hima, isaan ujuraa isaanii fudhatanii ti jiru.
[17] Ati ammoo wayta soomantu, mataa kee waa dibadhu, fuula kee tiis dhiqadhu!
[18] Soomanuun kee tiis, akka namootaaf zaahir hin taane, Abbaa kee kan masxuuratti jiru qofaaf godhi, Abbaan kee inni waan dhooysatti godhame hundumaa arku sun, zajaa siif ni deebisa” jedhe.
[19] Yesuus ammaas, “Addunyaa ifii keeysaniif lafa irratti bakka biliinii fi daandoon nyaatutti, bakka hattuuniis caphsitee hattutti, walitti hin qabatinaa!
[20] Ammoo addunyaa ifii keeysaniif samii irratti bakka biliin yookiin daandoon hin nyaannetti, bakka hattuuniis caphsitee hin hannetti walitti qabadhaa!
[21] Qalbiin teeysaniis bakkuma addunyaan teeysan jirtu taati” jedhe.
[22] Yesuus, “Ijji ibsaa qaamaa ti; ijji tee fayyaa yoo taate, qaamni kee hundinuu qaceellotti ifa.
[23] Ijji tee da'iifa yoo taate ammoo, qaamni kee hundinuu dukkanaawaa dha taha; irrattuu ibsaan si keeysaa yoo dukkanaawe, dukkanti hangam takka haa cimtu ree!” jedhe.
[24] Yesuus itti furuu dhaan, “Namni tokko illeen gooftolii lama kaadamuu hin dandayu; inni gooftaa tokko jibbee kaan ni jaalata taha, yookiin tokkoof amanamaa tahee kaan ni tuffata taha; isiniis akkasumatti Rabbii fi addunyaas, bakka takkaa kaadamuu hin dandeeysan.
[25] “Kanaafiin ani isinitti hima; jireenya keeysaniif, waan nyaattanii fi waan dhuydaniif, yookiin qaama keeysanitti waan uffattaniif hin cinqaminaa! Jireenyi nyaata irra, qaamni niis uffata irra ni caalu mitii?
[26] Shimbirroota qilleensa keeysa bararan laalaa! Isaan hin facaasan, hin haamaniis gootarattiis hin galchan; ammoo Abbaan keeysan inni samii irraa isaan ni soora. Isin ammoo isaan irra gatii caalu qabdanii mitii?
[27] Isin keeysaa namni tokko itti cinqamuu dhaan umrii isaa irratti guyyaa tokko, eda'achuu namni dandayu ni jiraa?
[28] Waa'ee uffataa tiif jecha maaliif cinqamtu? Mee ililloota dirree, akkaataa isaan itti biqilanii guddatan laalaa! Isaan hin dalagan, niis hin erban.
[29] Haa tahu malee, Solomoon mootichi ulfina guddaa qabaachuu ture illeen, isaan kanneen keeysaa hanga takkaa takka, akka hin shallamaminiin isinitti hima.
[30] Irrattuu Rabbi, citaa arra dirreetti arkamee, boru ibiddatti naqamu akkanatti bareechee kan uwwisu yoo tahe, isin yaa warra amanti-qaliil, hedduu irra caalchisee isin hin uwwisuu ree?
[31] “Eegasuu isin ‘Maal nyaanna?’ yookiin ‘Maal dhuyna?’ yookiin ‘Maal uffanna?’ jettanii hin cinqaminaa!
[32] Ummata saba Israa'el hin tahinii tu, waan kanneen hundumaaf yaadaan rakkata; kun hundinuu akka isin barbaachisu ammoo, Abbaan keeysan inni samii irraa bar ni beekaa!
[33] Duraan dursitanii ammoo Mootummaa Rabbii tii fi tola Rabbii fardeeyfadhaa malee, wanni hafan kanneen hundi niis daballitti isiniif ni kannamu.
[34] Guyyaan boruu mataa isaa tiif waan cinqamuuf jecha, isin guyyaa boruu tiif hin cinqaminaa! Guyyoonni matuma-matatti gahaa rakkina ifii ti qabu” jedhe.