[1] Yesuus Beeytal Maqdas keeysaa bahee, odoo deemaa jiruu, barattoonni isaa ijaarsa darboota Beeytal Maqdas isa agarsiisuuf dhufan.
[2] Inni ammoo, “Isaan kanneen hundumaa ni agartu mitii? Dhugumaan isiniin jedha, odoo hin jigin, bakka tanatti dhagaan tokko illeen wal irratti hin hafu” jedhee ti deebiseefi.
[3] Akkuma Yesuus Gaara Ejersaa gubbaa gadi taa'een, barattoonni kophatti gara isaa dhufanii ti, “Kun yoom akka tahu nutti himi! Milikkinni dhufa kee tii tii fi kan dhuma addunyaa tiis maali?” jedhaniin.
[4] Yesuus deebisee, “Nam tokko illeen akka isin hin dogongorsiifne if eeggadhaa!
[5] Namoonni hedduun, ‘Ani Masiihi’ jechaa maqaa kiyyaan ni dhufu, namoota hedduus ni dogongorsiisu.
[6] Duulaa fi oduu duulaa tiis ni dhageeysu, tun akka isin hin rifachiifne beekaa! Wanni akkanaa kun tahuun irra jira; ammoo dhumti addunyaa amma illee hin geenye.
[7] Ummanni ummata irratti, mootummaaniis mootummaa irratti ni kaka'u; abaarii fi, sossoohuun dachii tiis bakka adda addaatti ni tahu.
[8] Wanni kanneen hundinuu ammoo jalqaba cimiimmuu ti.
[9] “Hogguus cinqitti dabarsanii isin ni kannu; isiniis ni ajjeesu; anaaf jecha saboota hundumaa biratti, warra jibbamoo dha taatu.
[10] Waytan san namoonni hedduun amantii irraa garagalu, dabarsanii tiis wal ni kannu, waliis ni jibbu.
[11] Nabiyyoonni kijibaa hedduu tu ka'a, nama hedduus ni dogongorsiisu.
[12] Seera-dhablummaan waan hoddomaatuuf jecha, jaalalti nama hedduu dhaa qabbanaawaa ti deemti.
[13] Namni hanga dhumaatti jabaatee dhaabbatu ammoo najaa dha baha.
[14] Saboota hundumaa irratti akka ragaa bahuuf jecha, Wangeelli Mootummaa kun guutummaa addunyaa irratti ni lallabama; achiin booda dhumti addunyaa dhaa dhufti” jedhe.
[15] Yesuus itti furee, “Wayta jibbisiisaan bakka xaaharaa najisu, kan nabi Daani'el waa'ee isaa dubbate sun, bakka xaaharaa dhaabbatee agartan, namni kana dubbisu haa hubatuu!
[16] Hogguus warri Yihudaa keeysa jiran, gara gaarotaatti haa baqatanii.
[17] Namni wixina mana isaa irra jiru, waan mana keeysa jiru fudhachuuf jecha gadi hin bu'in!
[18] Namni ooyruu keeysa jiruus, huccuu isaa fudhachuuf hin galin!
[19] Ammoo dubartoota ulfaa tii fi warra hoosisaniif guyyoonni sun akkam sodaachisoo dha!
[20] Baqachuun keeysan wayta ganna keeysa yookiin guyyaa Sanbataa irra akka hin taaneef kadhadhaa!
[21] Hogguus cinqii guddoo tu taha, cinqiin akkasii jalqaba addunyaa tii kaasee hanga ammaatti hin taane, deebitee fuula duraafiis hin taatu.
[22] Guyyoonni sun odoo gabaabbachuu baatanii, namni tokko illeen hin hafu ture; ammoo warra filatamaniif jecha guyyoonni sun gabaabbachuuf taa'u.
[23] “Hogguus namni yoo, ‘Kunoo, Masiihiin as jira’ yookiin ‘Achi jira’ isiniin jedhe hin amaninaa!
[24] Masiihonni kijibaa tii fi nabiyyoonni kijibaa ka'anii, odoo waan dandayamuuf taatee, warra Rabbiif filataman illee taanaan, dogongorsiisuuf milikkita gurguddaa fi mu'ujizaa hedduu ni agarsiisu.
[25] Kunoo ani duraan dursee isinitti himee tiin jira.
[26] “Yoo kan isaan, ‘Kunoo, huffee gammoojjii keeysa jira’ isiniin jedhan taate gadi hin bahinaa. ‘Kunoo deeraa manaa keeysa jira’ yoo isiniin jedhaniis hin amaninaa!
[27] Akkuma hangaasuun baha-biiftuu irraa hanga lixa-biiftutti ibsitutti, dhufti Ilma Namaa tiis akkasuma tahuuf taa'a.
[28] Bakkuma raqni jiru, hamarraan irratti wal geeysi” jedhe.
[29] Yesuus ammaas itti dabaluu dhaan, “Hiraarama guyyoota sanii booda, hogguusuma aduun ni dukkanooyti, jiini niis ifa isaa hin kannu; urjoonni samii irraa ni harca'u, haalli eemara bantii samii tiis ni roorra'u.
[30] Hogguusi milikkinni Ilma Namaa samii keeysatti mullata; wayta san qomoon addunyaa hundinuu ni booyu; Ilmi Namaa tiis, kan duumeeysa samii irraa tiin, humnaa fi durrii ulfina guddaa dhaan dhufu ni arku.
[31] Inni, maleeykoota isaa samii irraa, sagalee garrii guddoo dhaan wajjiin erga, isaan ammoo warra Rabbiif filataman, suduuda afran bubbee irraa, xarafa bantii samii gama tokkoo irraa hanga gama kaanii irraa hiis walitti qabu” jedhe.
[32] Yesuus ammaas, “Muka habruu fakkeenya godhaa tii irraa baraa! Dameen isii quqquuyxee, baala hogguu magarsitu, birraan akka dhihaate ni hubattu.
[33] Akkasumatti isiniis, tana hundumaa hogguu agartan, akka inni balbalatti dhihaate beekaa!
[34] “Dhugumaan isinitti hima, wanni kanneen hundinuu hanga raawwatamanitti dhaloonni ammaa kun hin dabru.
[35] Samii fi dachiin ni dabru; qoowliin tiyya ammoo gonkumaa hin dabartu” jedhe.
[36] Yesuus ammaas itti dabalee, “Guyyicha sanii fi za'aa san ammoo Abbaa kiyya qofaa tu beeka malee, maleeykoonni samii illeen, Ilmi niis tokko illeenuu hin beekan.
[37] Bara Nohi, akkuma tahee turetti, bara dhufa Ilma Namaa tittiis akkasuma tahuuf taa'a.
[38] Bara dabre san bishaan badiidhaa dura, hanga guyyaa Nohi markaba seenetti, namoonni nyaachaa, dhugaa, fuudhaa, heerumaa tiis turan.
[39] Isaan hanga guyyaa bishaan badiidhaa dhufee hunduma isaanii haree deemutti, odoo hin beekin akkuma turan sanitti, ammaas bara dhufa Ilma Namaattiis akkasuma tahuuf taa'a.
[40] Gaafas namni lama oyruu keeysatti ni arkamu, tokko ni fudhatama, inni kaan ammoo ni dhiifama.
[41] Dubartiin lama dhagaa daaku irratti ni daaku, takka ni fudhatamti, isiin taan ammoo ni dhiifamti.
[42] Irrattuu isiniis Gooftaan keeysan yoom akka dhufu guyyaa isaa hin beeytanii, dammaqaa!
[43] Abbaan manaa halkan keeysaa, za'aa hattuun itti dhuftu odoo beekee, qophaawee eeguu dhaan, mana isaa cabsuu itti hin dhiisu ture; mee dubbii tana keeysa gadi laalaa!
[44] Haaluma kanatti; Ilmi Namaa za'aa, ni dhufa jettanii itti hin eeynetti waan dhufuuf jecha, isiniis warra qophooytan tahaa!” jedheeni.
[45] Yesuus itti furee, “Eegasuu kaadamaan amanamaanii fi aaqilli, kan gooftaan isaa, hojjatoota isaa warra kaaniif, nyaanni isaanii waytitti akka kannamuuf haa godhu jedhee, mana isaa irratti wakalu eenyu?
[46] Kaadamtichi, kan wayta gooftaan isaa deebi'ee dhufu odoo hojjatuu arku, eeybifamaa dha.
[47] Dhugumaan isinitti hima, gooftaan isaa qabeenya isaa hundumaa irrattuu wakkiila isa godhata.
[48] Ammoo kaadamaan hamaa tahee yaada isaa keeysatti, ‘Gooftaan kiyya ni dhibaawaa dafee hin galu’ yoo jedhee,
[49] hojjatoota kaan tumee, ammaas nyaatee quufee warra farshaantuu wajjiiniis yoo dhuguu jalqabe,
[50] gooftaan kaadamticha sanii, guyyaa inni ni dhufa jedhee itti hin eeginitti, za'aa inni hin beekinittiis ni dhufa.
[51] Kaadamaa saniis fofottoysee, warra fakkeeysitoota wajjiin isa ramadee, bakka booyichinii fi ilkaan qaruun jirutti darba” jedhe.