[1] Yesuus tana hundumaa dubbatee eega raawwate booddee, Galiilaa ka'ee ti gara kutaa Yihudaa tan laga Yordaanos gamaa dhaqe.
[2] Ummanni danuuniis isa jala yaa'an, inni niis achitti isaan fayyise.
[3] Hogguus Fariisonni gaaffiin isa fitinuuf dhufanii ti, “Namni sababuma fedheenuu yoo tahe, niitii isaa hiikuun seeraa?” jedhanii ti gaafatan.
[4] Inni ammoo deebisee, “Rabbiin jalqaba isaan uume, ‘Dhiiraa fi dhalaa godhee’ akka uume Kitaaba keeysatti hin dubbifnee?” jedheeni.
[5] Itti dabalee tiis, “‘Sababa kanaaf jecha, dhiirti abbaa isaa tii fi haadha isaa ni dhiifti, niitii isaa tittiis ni maxxanti; isaan lamaaniis qaamuma tokko tahu’.
[6] Irrattuu tana booddee isaan lama tahuun haftee, foon tokko tahu; kanaafiis waan Rabbi walitti tokkeeyse, namni gargar hin baasin!” jedhe.
[7] Fariisonni ammaas deebisanii, “Eegasuu Museen, xalayaa hiikkaa kanneefii haa baasuu jedhee maaliif ajaje ree?” jedhanii ti isa gaafatan.
[8] Yesuus ammaas, “Museen sababa gara-jabina keeysaniif jecha, niitii teeysan akka hiiytan isiniif hayyame malee, jalqaba duraa akkas hin turre.
[9] Ani isinittiin hima, yoo isiin ejjite malee, namtichi niitii isaa hiikee tan biraa fuudhe, zinaa dha godha” isaaniin jedhe.
[10] Hogguus barattoonni deebisanii, “Seerri jaarsaa fi jaartii jidduu jiru akkana taanaan, fuudhuma dhabuu tu irra wayyaa dha” isaan jedhan.
[11] Yesuus ammoo deebisee, “Ilmii tana warruma isaaniif kanname qofaa tu fudhachuu dandaya malee, namni hundinuu ammoo fudhachuu hin dandayu” jedheeni.
[12] Itti dabaluu dhaan ammaas, “Dhalachumaa jalqabanii warri murattee tahan ni jiru; namaaniis warri murattee akka tahan godhamaniis ni jiru; ammaas mootummaa samii tiif jedhanii warri murattee if godhaniis ni jiru. Eegaa namni tana fudhachuu dandayu haa fudhatuu!” isaaniin jedhe.
[13] Eegas Yesuus harka irra kaayee akka isaaniif kadhatuuf jecha, daa'imman isaatti fidan; barattoonni ammoo warra fidan saniin lolan.
[14] Yesuus ammoo, “Daa'imman gara kiyya haa dhufanii, hin dhoorkinaa! Mootummaan samii tiis, tan warra akka isaanii kanaaf taati” jedhe.
[15] Yesuus harka mataa daa'immanii irra eega kaaye booda achii deeme.
[16] Kunoo, namtichi tokko gara Yesuus dhufee ti, “Yaa barsiisa! Jireenya bara baraa arkachuuf, waan gaarii tam hojjachuu tu ana irra jira?” jedheeni.
[17] Yesuus ammoo, “Waan gaarii tami jettee maaliif ana gaafatta? Gaarii kan tahe tokkuma qofaa tu jiraa; jireenya bara baraa seenuu yoo barbaadde, heeroota eegi!” isaan jedhe.
[18] As irratti namtichi, “Heeroottan kami?” jedheeni. Yesuus ammaas deebisee ti, “‘Hin ajjeesin, hin ejjin, zinaa hin godhin, hin hatin, kijibaan nama irratti ragaa hin bahin!
[19] Abbaa kee tii fi haadha tee tiif kabajaa godhi; ollaa kee tiis, akkuma mataa kee tii titti jaaladhu!’ kanneen jedhani” jedheeni.
[20] Dargaggeeysichi hogguus, “Kana hundumaa raawwadhee tiin jiraa; amma hoo maal tu na irraa irrata?” jedheeni.
[21] Yesuus ammaas deebisee, “Raawwattee illaan-malee tahuu yoo barbaadde, deemii tii, qabeenya kee gurgurii, deegoof dhoortoo kanni, siifiis badhaadhinni samii irratti walitti qabamaa; koottuu tii ana duukaa bu'i!” jedheeni.
[22] Dargaggeeysichi qabeenyi isaa guddaa waan tureef jecha, dubbii tana hogguu dhagaye, nahee ti achii bahe.
[23] Eegas Yesuus barattoota isaa tiin, “Ani dhugumaan isinitti hima, nama taajiraaf mootummaa samii seenuun heddu rakkoo dha.
[24] Ammaas deebisee tiin isinittiin hima, namni taajirri tokko Mootummaa Rabbii seenuu irra, gaalli qaawa lilmee keeysaan hulluuquu tu irra sablata” jedhe.
[25] Barattoonni jecha kana wayta dhagayan hedduu rifatanii ti, “Eegasuu eenyuu tu najaa bahuu dandaya?” jedhan.
[26] Yesuus ammoo isaan daawwatee ti, “Kun nama biratti hin dandayamu, Rabbiif ammoo wannummaan hundinuu ni dandayamu” isaaniin jedhe.
[27] Phexiroos as irratti, “Kunoo, nuti waa hundumaa dhiifnee si duukaa buunee ti jirraa, eegasuu wanni arkannu maali?” jedheeni.
[28] Yesuus ammaas, “Ani dhugumaan isinitti hima, addunyaa haaraya keeysatti, wayta Ilmi Namaa arshii ulfina isaa irra taa'u, isin warri na duukaa buutaniis, arshii kudha lama irra teeysanii ti, gosa Israa'el kudha lamaan irratti firdii dha kannitu.
[29] Namni maqaa kiyyaaf jedhee, manneen, yookiin obboleeyyan dhiiraa, yookiin obboleeyyan dubraa, yookiin abbaa, yookiin haadha, yookiin joollee, yookiin araddaa isaa dhiise, dachaa dhibba ni arkata; jireenya bara baraa tiis ni dhaala.
[30] Ammoo warra duraa kanneen tahan keeysaa hedduun warra boodaa ti tahu; warra booddee jiran keeysaahiis warra duraa kanneen tahu ni jiru” isaaniin jedhe.