[1] Bara sani Yohannis Cuuphaan, huffee gammoojjii Yihudaa keeysa labsaa dhufe.
[2] “Mootummaan samii dhihaattee ti jirtii toowbadhaa!” jedhe.
[3] Nabi Isaayyaas, “Sagaleen huffee gammoojjii keeysa, Gooftichaaf karaa tolchaa tii, xurree inni irra deemuus diriirsaa!” jettee ti iyyiti jechuun, Yohannis tahuu isaa ilaalchisuun dubbate.
[4] Yohannis uffata rifeensa gaalaa irraa dhawame uffate, mudhii isaa tiis waraansillee teephaa tiin hidhate; nyaanni isaa ammoo awwaannisaa fi deeyma daammuu ti ture.
[5] Hogguus warri Yerusaaleem keeysa jiraatanii fi, warri Yihudaa, ammaas warri kutaa naannawa Yordaanos jiraatan hundinuu bakka Yohannis Cuuphaan jirutti yaa'an.
[6] Isaan kanneen, dilii isaanii eega himatan booda, Yohannisiin laga Yordaanositti ni cuuphamu turan.
[7] Yohannis ammoo Fariisotaa fi Saduqoota keeysaa namoonni hedduun cuuphamuuf gara isaa akka dhufan hogguu arke, “Isin yaa ilmaan buutii, balaa isinitti bu'uuf deemtu jalaa akka dheeysitaniif, eenyuu tu isin gorse?
[8] Eegasuu firii toowbachuu keeysan mulliftu godhadhaa!
[9] ‘Nuti abbaaf Abrahaami qabna’ ifiin jechuu kan dandeeysan isinitti hin fakkaatin! Rabbi dhagaaggee kanneen irraa Abrahaamiif joollee kaasuu akka dandayuun isinitti hima.
[10] Ammumaa huu, duruun qottoon hidda mukkeenii irra kaayamtee ti jirti; mukni firii gaarii hin goone hundinuu muramee ti ibiddatti naqama” jedhe.
[11] Yohannis itti furuun, “Ani toowbaafiin bishaaniin isin cuupha, ammoo inni ana booddee dhufuuf taa'u, ana irra jabaata, ani kophee miila isaa illee baachuuf nama gahuu miti; inni Ruuhal Qudusii fi ibiddaan isin cuupha.
[12] Manshiin uuda isaa ittiin azooru harka isaa ti jirti; midhaan isaa gootaratti walitti qaba; qashaa ammoo ibidda hin dhaamneen guba” jedheeni.
[13] Yesuus hogguus Yohannisiin cuuphamuuf jecha, Galiilaa irraa gara Yordaanositti isa bira dhufe.
[14] Yohannis ammoo, “Ana kan silaa siin cuuphamuu qabuu, ati ammoo gara kiyya dhuftaa?” jedhee ti gadi jabeeysee isa diduu yaale.
[15] Yesuus ammoo deebisee, “Rabbi duratti waan qaceelaa tahe hundumaa akka kanatti raawwachuun waan nu barbaachisuuf jecha, mee amma akkasuma haa taatuu itti dhiisi!” jedheeni; as irratti Yohannisiis isa jalaa diduu ni dhiise.
[16] Yesuus eega cuuphame booda bishaan keeysaa dafee akkuma baheen, kunoo, bantiiwwan samii dhaa ni banaman; Ruuhaan Rabbii tiis bifa himiimitti gadi dhufee kan isa irratti bu'u arke.
[17] Kunoo sagaleen takkaas, “Inni kun Ilma kiyya jaalatamaa dha, akka gaarittiis isatti niin gammade” jettee ti samiiwwan keeysaa dubbatte.