[1] Eegasii Fariisonninii fi barsiisonni seeraa Yerusaaleem irraa gara Yesuus dhufanii ti,
[2] “Barattoonni kee maaliif seera aadaa abbootii teenyaa caphsu? Isaan biddeena nyaachuun dura, kunoo harka hin dhiqatan” jedhaniin.
[3] Yesuus deebisee, “Isin hoo, seera aadaa abbootii teeysanii tiif jettanii, maaliif heera Rabbii caphsitu?
[4] Rabbi, ‘Abbee tii fi haatee tiif kabajaa godhi!’ bakka biraatti ammaas, ‘Abbaa isaa tii fi haadha isaa namni arrabsu haa ajjeefamuu!’ jedhee ti jira.
[5] Isin ammoo, ‘Namni abbaa isaa tii fi haadha isaa gargaaruun irra ture tokko isaaniin, wanti na biraa isiniif kannamee ittiin fayyadamuu turtan sun, amma Rabbiif qodhamtee ti jirti yoo jedhe,
[6] eegasuu haawwan isaa tiif kabajaa kannuun isa hin barbaachiftu’ jettu. Akkasitti seera aadaa abbootii teeysanii tiif jettanii Qoowlii Rabbii bakka dhoorkitu.
[7] Isin yaa fakkeeysitoota! Isaayyaas waa'ee keeysan laalchisuun raajii isaa keeysatti,
[8] ‘Ummanni kun afaan isaa tiin kabaja anaaf kanna, garaan isaa ammoo, hedduu dha ana irraa fagoo dha.
[9] Isaan bilaashuma ana ibaadu, ajaja namaa tiis, akka heera Rabbitti barsiisu’ jedhee dubbachuun, gaarii dha dubbate” jedhe.
[10] Yesuus ummata ifitti yaamee ti, “Dhaggeeyfadhaa hubadhaas!
[11] Wanni afaan namaa seenu, nama hin najisu; ammoo waan afaan namaa keeysaa bahuu tu nama najisa” isaaniin jedhe.
[12] Hogguus barattoonni gara isaa dhufanii, “Warri Fariisotaa waan ati jette kanneen dhagayanii akka mufatan beeytee jirtaa?” jedhaniin.
[13] Yesuus ammoo deebisee, “Unkurri abbaan kiyya kan samii irraa hin dhaabin hundinuu ni buqqaafama.
[14] Isaan ittuma dhiisaa! Isaan jaamoota jaamaa karaa agarsiisu; namni jaamaan tokko nama jaamaa karaa yoo agarsiise, lachuu tuu waliin boollatti kufu” jedhe.
[15] Phexiroos ammoo deebisee, “Fakkeenya kana nuuf hiiki!” jedheeni.
[16] Yesuus ammaas deebisee, “Isiniis ilaa arra hammanuma manduusoo dhaa?
[17] Wanni afaaniin seenu hundinuu, qochumaa keeysa seenee booddee qaama keeysaa alatti akka bahu hin hubattanii?
[18] Ammoo wanni afaan keeysaa baatu, qalbii yaada namaa keeysaa waan dhuftuuf; isii tu nama najisa.
[19] Yaadni hamaan hundinuu qalbii keeysaa baha, isaaniis, nama ajjeechaa, ejjummaa fi zinaa, halalummaa, hanna, cubbuun ragaa bahuu, maqa-balleeysuus.
[20] Isaan kanneen tu nama najisa malee, harka odoo hin dhiqatin nyaachuun nama hin najisu” jedheeni.
[21] Yesuus achii ka'ee, gara kutaa Xiiroosii fi Sidooni deeme.
[22] Kunoo, dubartiin Kana'aan takka naannawa san irraa dhuftee ti sagalee guddoo dhaan, “Yaa Gooftaa Ilma Daawwid! Intalti tiyya ruuhaan hamaan qabamtee shiddatti jirtii, anaaf maari!” jette.
[23] Yesuus ammoo jawaaba tokko illee isiif hin deebifne. Barattoonni isaa hogguus isa bira dhufanii, “Tun nu duubaa iyyaa ti jirtii, nu jalaa deebisi!” jedhaniin.
[24] Inni ammoo deebisee, “Ani warra Israa'el, kanneen akka hoolota karaa irraa badanii qofattiin ergame” jedheeni.
[25] Dubartittiin ammoo dhuftee, Yesuus duratti jilbiiffattee, “Yaa Gooftaa, na gargaari!” jetteeni.
[26] Yesuus hogguus deebisee, “Biddeena joollee fuudhanii sarootaaf darbuun gaarii miti” jedheeni.
[27] Isiin ammaas, “Eeyye yaa Gooftaa, haa tahu malee, saroonni niis gabatee gooftaa isaanii irraa hambaa bubu'u bar nyaatanii” jette.
[28] Hogguus Yesuus, “Yaa haadha dhiiraa! Amantiin tee guddoo dhaa, akkuma barbaadde siif haa tahu!” jedhee ti deebiseef; intalti isii tiis hogguma san fayyite.
[29] Eegasii Yesuus achii deemee, Garba Bishaan Galiilaa bira dhufee, gaara tokko irratti ol bahee ti taa'e.
[30] Ummanni hedduun warra dhukkubsatoo, naafa, hokkolaa, jaamaa, didaa fi kanneen biraa tiis hedduu fidanii ti miila Yesuus jala kaayan; inni niis isaan ni fayyise.
[31] Danuun namaa sun ammoo, warri didaan akka dubbatan, hokkoloon akka fayyan, nafoonni akka deeman, jaaman akka arkan hubatanii ti ajaa'iban; ammaas Rabbi Gooytaa Israa'eliifiis hamdii dha dhiheeysan.
[32] Yesuus eegas barattoota isaa yaamee ti, “Ummanni kun guyyaa sadeen kana anuma wajjiin turan, waan nyaataniis waan hin qabneef isaaniif niin naha; ani akka isaan karaa irratti gaggabanii hin kukkufneef jecha, akkuma beelawaniin gadi isaan dhiisuun natti ulfaata” isaaniin jedhe.
[33] As irratti barattoonni isaa, “As huffee gammoojjii kanatti biddeena ummata dila kana quubsu eeysaa arkanna?” jedhaniin.
[34] Yesuus ammoo, “Biddeena meeqa if biraa qabdu?” jedhee isaan gaafannaan, isaan ammaas, “Biddeena torbaa fi kalluuna xixiqqaa muraasa qabna” jedhaniin.
[35] Hogguus inni ummanni lafuma san akka gadi taa'an ajajee ti,
[36] biddeena torbanii fi kalluunnan san fuudhee, Rabbiif galata galchee, kukkutee bartootatti kakkanne; barattoonni niis ummata saniif ni dhiheeysan.
[37] Hundi isaanii tiis nyaatanii ni quufan; hambaa isaan irraa hafees safii torba guutuu dha fuudhan.
[38] Warri biddeena san nyaatan, dubartootaa fi joollee malee, dhiirti nama kuma afur turan.
[39] Eegas booda Yesuus, ummata san gadi dhiisee ti, doonii seenee gara kutaa Magadaan jedhamuu deeme.