[1] Yesuus ammaas fakkeenyaan namootatti dubbate;
[2] “Mootummaan samii, mooticha ilma isaa tiif feestaa aruuzaa godhetti fakkeeyfamti.
[3] Mootichi, warra feestaa aruuzaa kanaaf afeeramanii turan, akka yaadachiisaniif jecha, hojjatoota isaa itti erge; isaan ammoo dhufuu dha didan.
[4] Ammaas hojjatoota warra biraa tiin, ‘Warra afeeraman saniin, kunoo nyaanni qophaa'ee ti jira; sangoonni kiyyaas, kurkurri gagabbatooniis qalamanii, wanni hundinuu qophaawee, gara feestaa aruuzaa koottaa jedhaa tii itti himaa!’ jedhee ti itti erge.
[5] Warri afeeraman ammoo tana gurrattuu odoo hin qicatin, inni tokko gara qonna isaa, kaaniis gara daldaalaa isaatti kutan.
[6] Warri kaan ammoo hojjatoota mootichaa san qaqqabanii, akka malee isaan godhanii ti ajjeesan.
[7] Mootichi hogguus hedduu aaree ti, loltoota isaa itti ergee, warra nama ajjeesan san dhabamsiisee, magaalaa isaanii tiis gube.
[8] Eegasii mootichi hojjatoota isaa tiin, ‘Aruuzni qophaawaa dha, warri afeeraman ammoo aruuza kanaan hin malle.
[9] Eegasuu karaa uugaa magaalaa nama geeysu dhaqaa tii, namuma agartan hunda gara aruuzatti afeeraa!’ jedheeni.
[10] Hogguus hojjatoonni sun karaa gurguddatti bahanii ti, namuma arkan hundumaa, warra hamoo fi warra gaariis walitti qaban, manni aruuzaa tiis keeysummaan ni guutame.
[11] “Kana booddee mootichi keeysummoota isaa laaluuf ol seennaan, kunoo nama uffata aruuzaa hin uffatin tokko arke.
[12] Namtichaaniis, ‘Yaa saahiboo! Ati uffata aruuzaa malee akkamitti as seente?’ jedheeni; namtichi niis waanuma jedhu dhabe.
[13] Hogguus mootichi warra achi keeysa kaadamaniin, ‘Harkaa fi miila isaa hidhaa tii, bakka booyichinii fi ilkaan qaruun jirutti, dukkana alaatti darbaa!’ jedheeni.
[14] Warri yaamaman illeen hedduu dha, ammoo warri filataman muraasa” jedhee ti, dubbii isaa xumure.
[15] Hogguus Fariisonni deemanii ti, akkaataa waanuma inni dubbatuun, hillimatti isa galchan irratti marihatan.
[16] Eegas dargaa isaanii tii fi ammaas murna Herodis keeysaa hiis hanga tokko wajjiin Yesuusitti erganii ti, “Yaa barsiisaa, akka ati nama dhugaa taatee, karaa Rabbii tiis dhugumaan barsiiftu, nuti ni beeyna; ati ammaas, namni maal naan jedha jettee if hin qoorrifattu, namaas wal hin caalchiftu.
[17] Eegasuu, Qeesaariif gibira kafaluun seera moo, seeraa mitii irratti, yaada qabdu mee nutti himi!” jedhaniin.
[18] Yesuus ammoo jallina isaanii beekuun, “Isin yaa fakkeeysitoota, maaliif na fitintu?
[19] Maallaqa gibiraaf kafaltan san mee ana agarsiisaa!” jedheeni; isaaniis maallaqa tokko itti fidan.
[20] Hogguus Yesuus, “Suuraan tun tan eenyuu ti? Katabbiin tuniis tan eenyuu ti?” jedheeni.
[21] Isaaniis, “Tan Qeesaari” isaan jedhan. Hogguus Yesuus, “Eegasuu waan Qeesaar kanneen tahan, Qeesaariif kannaa, waan Rabbii kanneen tahaniis, Rabbumaaf kannaa!” isaaniin jedhe.
[22] Hogguu jawaaba kana dhagayan, ajaa'ibanii ti, dhiisanii isa biraa deeman.
[23] Guyyuma sani Saduqoonni, warri qiyaamaan hin jirtu jedhan, gara Yesuus dhufanii ti,
[24] “Yaa Barsiisa, ‘Namni tokko odoo ilmoo hin arkatin yoo du'e, obboleeysi isaa niitii isaa san dhaalee joollee obboleeysa isaa tiif haa gurguddisuu!’ jedhe Museen.
[25] Kunoo obboleeyyan dhiiraa torba, nu jidduu jiraachaa ti turan; angaftichi niitii fuudhee ti, odoo ilmoo hin arkatin du'ee, niitii isaa tiis obboleeysa isaatti dhiise.
[26] Haaluma kanatti inni lammeeysaan, sadeeysaaniis hanga isa torbeeysatti, isii tana fuudhanii ti, odoo ilmoo irraa hin arkatin dudu'an.
[27] Hundumaa booddee ammoo dubartittii niis ni duute.
[28] Eegaa hundi isaanii tuu, niitummatti isii waan fuudhaniif jecha, guyyaa qiyaamaa, isaan torban keeysaa isa kamiif niitii taati?” jedhanii ti isa gaafatan.
[29] Yesuus ammoo, “Barreeyfama Qulqulluu fi, ammaas humna Rabbii tiis, beekuu dhaba keeysaniif dogongortan.
[30] Gaafa Qiyaamaa, akkuma maleeykoota samii irraa ti tahu malee, hin fuudhan, niis hin heeruman.
[31] Waa'ee warri du'an du'aa ka'uu taanaan ammoo, waan Rabbi isiniin jedhe, isin numaa huu hin qaraanee?
[32] Inni, ‘Ani Rabbii Abrahaami, Rabbii Yisihaaqi, Rabbii Yaaqoobi’ jedhee dubbatee ti jira. Inni Rabbii warra du'oo tii miti, Rabbii warra jiraatoo ti malee” isaaniin jedhe.
[33] Hogguus dilli namaa tana dhagayanii ti ilmii isaa tiis ajaa'iban.
[34] Saduuqota afaan qabachiisuu isaa hogguu dhagayan, Fariisonni niis achitti walitti qabaman.
[35] Isaan keeysaa namtichi seera beekaan tokko, Yesuus fitinuuf jecha gaaffii isa gaafate,
[36] “Yaa barsiisaa, heera keeysaa seerri hundumaa irra caalu kami?” jedheeni.
[37] Hogguus Yesuus, “‘Rabbii kee Gooyticha, garaa kee hundumaan, lubbuu tee hundumaan, qalbii tee hundumaaniis jaalachuu tu si irra jira’.
[38] Seerri guddaan hundumaa duraa isa kana.
[39] Lammeeysaaniis, isuma duraa kana fakkaata; ‘Ollaa kee akka if jaalattutti jaaladhu!’
[40] Seeruma lamaan kanneen irratti, heerrinii fi barsiisni nabiyyootaa hundinuu hundeeyfamanii ti jiru” jedheeni.
[41] Akkuma Fariisonni walitti qabamanii jiraniin, Yesuus gaaffii takka isaan gaafate.
[42] “Masiihicha irratti yaada maal qabdu? Inni ilma eenyuu ti jettu?” jedheeni. Isaaniis, “Ilma Daawwid” jedhanii ti deebisaniifi.
[43] As irratti Yesuus, “Akkas taanaan, duuba akkamitti Daawwid Ruuhal Qudusiin geggeeyfamee Gooftaa jedhee yaama ree?
[44] ‘Gooytichi Gooftaa kiyyaan, adawwii tee miila kee jala hangaan siif kaayuu, gara harka mirgaa kiyyaa tiin taa'i, isaan jedhee ti jira’ isaaniin jedhe.
[45] Eega Daawwiduu, Gooftaa kiyya jedhee isa yaame, akkamitti ilma isaa taha ree?” isaaniin jedhe.
[46] Nam tokko illeen, jawaabuma tokko illee isaaf kannuu hin dandeenye; guyyaa san irraa jalqabee, gaaffii takka dabalee isa gaafachuuf, namni ija jabaatees hin turre.