[1] Eegasii, Yesuus ummata achi jiruu fi barattoota isaa tiin,
[2] “Barsiisonni seeraa tii fi, Fariisonni niis, barchuma Musee irraa tattaa'u.
[3] Waan isaan isinitti himan hundumaa godhaa! Eegaasi ammoo waan isaan godhan hin godhinaa! Isaan warra waan barsiisan ifii fuu hojii irra hin oolchine.
[4] Isaan ba'aa ulfaatuu hidhanii ti, gateetii namaa irra kaahu; ifiif ammoo qubumaan illee hin tuqan.
[5] Isaan waan dalagan hundumaa namootatti if mullisuuf hojjatan. Qarxaasa rarraafataniis ni guddisu, handaara uffata isaanitti hodhataniis ni dheereysu.
[6] Bakka feestaattiis ulfina jaalatu, manneen sagadaa keeysattiis barcuma hundumaa irra caalu jaalatu.
[7] Magaalaa keeysattiis salaamtaa kabajaa ti barbaadu, barsiisaa guddaa jedhamanii yaamamuus ni jaalatu.
[8] “Isin ammoo barsiisaa guddaa ifiin hin jechisiisinaa! Barsiisaan keeysan tokkuma; isin hundinuu obboleeyyani.
[9] Lafa irratti nam tokko illee abbaa jettanii hin yaaminaa! Abbaan keeysan tokko, inni niis kan samii keeysa jiruu dha.
[10] Hoogganaa ifiin hin jechisiisinaa! Hoogganaan keeysan Kiristoosuma.
[11] Isin keeysaa inni hunda caalu, kaadamaa keeysan haa tahu.
[12] Namni ol if kakaasu gadi ni deebifama, namni gadi if qabuus ol ni kaafama” jedhe.
[13] Yesuus ammaas, “Isin barsiisota seeraa tii fi Fariisota, warra fakkeeysituu, isiniif magan! Isin mootummaa samii dhaa namoota irratti cuftu; ifiif hin seentan, warra silaa seenuu barbaada niis, seenuu isaanitti hin dhiiftan.
[14] Isin barsiisota seeraa tii fi Fariisota, warra fakkeeysituu, isin carraa eeggattanii waan gursummeeytiin qabdu harkaa fixxanii, fakkeeysuuf ammoo kadhata keeysan warra dheereeysitaniif magan! Kanaafiis yakka guddaa tu isin irratti jiguuf taa'a.
[15] Barsiisota seeraa tii fi Fariisota fakkeeysitoota, isiniif magan! Nama tokko amansiisuuf jettanii baharii fi barraa dha waliin geeysu; eega inni amantii fudhate booddee ammoo, inni harka lama isin caalaa warra jahannam akka tahu isa gootu.
[16] “Isin yaa kara-agarsiiftuu jaamoota, isiniif magan! Isin warri, ‘Namticha mana Beeytal Maqdasiin kakate, kakuun isaa humattuu hin hisaabamtu; namticha ziqeeya Beeytal Maqdasiin kakate ammoo, kakuun san isa ni qabdi’ jettu.
[17] Isin yaa warra gowwaa jaamaa! Ziqeeya moo, Beeytal Maqdas, kan ziqeeya qulqulleeysuu tu irra caala?
[18] Isin ammaas warri, ‘Namticha bakka aarsaa tiin kakate, kakuun isaa hin gahu; ammoo namticha kannaa bakka aarsaa irra jiruun kakate, kakuun isaa ni gaha’ jettu.
[19] Isin yaa warra jaamaa! Kannaa sani moo, bakka aarsaa kan kannuma sanuu qulqulleeysuu tu irra caala?
[20] Eegaa namni bakka aarsaa tiin kakatu, bakka aarsaa sanii fi, ammaas waan bakka aarsaa san irra jiru hundumaan kakachuu isaa ti.
[21] Namni Beeytal Maqdasiin kakatuus, beeytal maqadasii fi, ammaas isa Beeytal Maqdas keeysa jiraatuuniis kakachuu isaa ti.
[22] Namni samiin kakatuus, arshii Rabbii tii fi, ammaas Rabbi kan arshii san irra taa'uuniis kakachuu isaa ti.
[23] “Yaa barsiisota seeraa tii fi Fariisota, fakkeeysitoota, isiniif magan! Haabasuuddaa, xalataanii fi shukaariis, firii irraa arkattan keeysaa, kudhan keeysaa tokko, Rabbiif ni kannitu; ammoo heera Rabbii keeysaa waan kanneen irra caalatti barbaachisan, warra akka firdii qaceeltuu, gaarummaa fi amantii dhaa, moggatti darbitu. Kudhan keeysaa tokko kannuu oduma hin dhiisin, jarreen kanneeniis, raawwachuun isinuma irra ture.
[24] Yaa kara-garsiiftuu jaamoota! Bookee ni xalalchitu, gaala ammoo ni liqimsitu.
[25] “Isin barsiisota seeraa tii fi Fariisota, fakkeeysitoota, isiniif magan! Geebaa fi qorii duuba isaanii ni dhiiyxu, ammoo keeysi isaanii buttummaa fi bololaan guutame!
[26] Yaa Fariisaa jaamaa! Dura mee geebaa fi qoriis keeysa isaanii dhiqi, kana booda duubni isaanii tiis naziifamuun ni mala.
[27] “Barsiisota seeraa tii fi Fariisota fakkeeysitoota, isiniif magan! Isin warra akka qubbii nooraa dibamtee, alaan bareedduu fakkaattuu ti, keeysi isaanii ammoo lafuma nama du'ee tii fi waanuma najisaan guutaman.
[28] Ammaas isiniis akkasumatti, alaan namoota biratti qaceeloo dha fakkaattu, keeysi keeysan ammoo fakkeeysummaa fi badii dhaan takashaman” jedheeni.
[29] Yesuus itti furuu dhaan, “Isin barsiisota seeraa tii fi Fariisota, fakkeeysitoota, isiniif magan! Isin yaa warra qubbii nabiyyootaa ijaaree, ammaas siidaa warra qaceelotaa tiis miidhagsitu.
[30] Akkasumaanuu ammaas, ‘Bara abbootii teenyaa san odoo jiraanne, nuti silaa dhiiga nabiyyootaa dhangalaasuu isaanii titti, hin hirmaannu turre’ jettu.
[31] Akkaatuma kanaanuu isin, ilmaan warra nabiyyoota ajjeesan sanii, tahuu keeysani if irratti ragaa baatu.
[32] Eegasuu isiniis qiimaa qunnaa dilii abbootii teeysanii guuttadhaa!
[33] Isin jaawwoota, yaa ilmaan buutii! Firdii jahannamitti isin neeyxu arkachuu jalaa akkamitti baatu ree?
[34] “Kanaaf kunoo ani nabiyyoota, namoota hikmaa qabanii fi barsiisotas gara keeysaniin erga; isaan keeysaa hanga tokko ajjeeftanii ti fanniftu, warra kaan ammoo manneen sagadaa keeysan keeysatti ni garaftu, magaalaa irraa gara magaalaaattiis ni ariitu.
[35] Akkasitti, dhiiyni warra qaceelotaa kan lafa irratti dhangala'e hundinuu, isin gubbaa dha taha; kuniis, dhiiga Abeel nama qaceelaa sanii jalqabee, hanga dhiiga Zakkaariyaas ilma Baraakiyaa, kan isin bakka aarsaa tii fi Beeytal Maqdas jiddutti ajjeeftanitti, warra jiruu dha.
[36] Ani dhugumaan isinitti hima, gumaan kun hundinuu dhaloota kana irratti dhufa” isaaniin jedhe.
[37] Yesuus, “Yaa Yerusaaleem, yaa Yerusaaleem, ati tan nabiyyoota ajjeeftu, warra sitti ergamaniis dhagaa dhaan rukuttu, akka lukkuun ilmaan isii goblaa isii jalatti walitti qabdutti, wayta meeqan ilmaan kee walitti qabuu barbaade; ati ammoo hin barbaanne.
[38] Kunoo arkaa, manni keeysan onee ti isin irratti hafa.
[39] Ani isinittiin hima; amma irraa jalqabee, ‘Maqaa Gooytaa tiin kan dhufu galateeyfamaa dha’ hanga jettanitti deebitanii ana hin agartan” jedheeni.