[1] Yesuus, “Isin nama irratti firdii hin godhinaa, akka isin irrattiis firdiin hin godhamne!
[2] Haaluma isin warra kaan irratti firdii ittiin gootaniin, isin irrattiis akkasumatti faradama; waanuma namaaf ittiin saffartaniin isiniifiis saffarama.
[3] Maaliif huuba ija obboleeysa kee tii keeysa jiru ilaalta? Kullooda ija tee keeysa jiru hin hubattuu?
[4] Kulloodni odoo ija tee keeysa jiruu, ati akkamitti obboleeysa kee tiin, ‘Huubaan ija tee keeysaa sii baasa’ jechuun dandeeysaa ree?
[5] Ati yaa fakkeeysituu, duraan dursitee kullooda ija tee keeysa jiru if irraa baasi, achi booda huuba ija obboleeysa kee tii keeysa jiru baasuu dandeeysa.
[6] “Waan xaahara sarootaaf hin kanninaa! Lu'ulu'a keeysan booyyee duratti hin darbinaa! Yoo darbitan isaan miila isaanii jalatti irra yaa'u; eegas boodaas isinitti garagalanii isin ni kukkutu” jedhe.
[7] Yesuus itti furee, “Kadhadhaa isiniif ni kannamaa, barbaadaa ni arkattuu, hulaa dhadhawaa isiniif banamaa.
[8] Kan kadhatu hundinuu ni fudhata, kan barbaaduus ni arkata, kan balbala dhadhawuufiis ni banama.
[9] Isin keeysaa ilmi isaa biddeena yoo isa kadhate, dhagaa kan kannuuf mee eenyu?
[10] Yookiin yoo kalluuna tokko isa kadhate, bofa ni kannaafii ree?
[11] Eegasuu isin warra hamaamoo taatan illee, joollee teeysaniif waan gaarii kannuu ni beeytan; Abbaan keeysan inni samii keeysaa, kannaawwan gaggaarii hangam irra caalu, warra isa kadhataniif kanna!
[12] “Waanuma namoonni akka isiniif godhan jaalattan, isiniis akkasumatti isaaniif godhaa; seerrinii fi nabiyyoonni niis tanuma barsiisu” jedhe.
[13] Yesuus, “Karra dhiphoo dhaan ol seenaa! Karaan gara badiidhatti nama geeysu, karaa uugaa dha, karriti isaa tiis ballaa dha; namoota hedduu tu achiin seena.
[14] Karaan gara jireenyatti nama geeysu ammoo dhiphoo dha, karriti isaa tiis dhiphoo dha, namoonni isa arkataniis muraasa” jedhe.
[15] Yesuus itti furee, “Nabiyyoota kijiboo irraa if eeggadhaa, keeysi isaanii yayyii hamtuu tahee, ammoo waaroo hoolaa uffatanii ti gara keeysan dhufu.
[16] Firii isaanii tiin eenyummaa isaanii ni beeytu; firii inabaa qajimaa irraa, habruus waleensuu irraa guuruu ni dandayuu ree?
[17] Akkasumatti mukni gaariin firii gaarii dha godhata, mukni hamaanis firii hamaa dha godhata.
[18] Mukni gaariin firii hamaa godhachuu, mukni hamaaniis firii gaarii godhachuu hin dandayan.
[19] Mukni firii gaarii hin goone hundinuu ni murama, ibiddattiis ni darbama.
[20] Haala kanatti firii hojii isaanii tiin eenyummaa isaanii ni beeytu” jedhe.
[21] Yesuus, “Fedhii Abbaa kiyyaa isa samii irraa nama godhu malee, ‘Yaa Gooftaa, yaa Gooftaa’ warri anaan jedhan hundinuu mootummaa samitti warra galan jechuu miti.
[22] Guyyaa firdii san namoonni hedduun, ‘Yaa Gooftaa, yaa Gooftaa, nuti maqaa kee tiin raajii dubbannee ti jirra, maqaa kee tiiniis ruuhaanota hamoos baafnee, maqaa kee tiin mu'ujizaa hedduus goonee ti jirraa mitii?’ anaan jedhu.
[23] Ani hogguus, ‘Gonkumaa ani isin hin beeku, isin yaa warra seera-dhabloota, ija tiyya duraa deemaa!’ jedhee tiin zaahiritti isaanitti hima” jedhe.
[24] Yesuus, “Eegasuu, namni jechoota qoowlii tiyyaa kanneen dhaggeeyfatee hojii irra oolchu hundinuu, akka nama ogeeysa mana isaa dhagaa irratti ijaarratetti fakkeeyfama.
[25] Roobni roobee, galaanni lola'ee, bubbeeniis bubbiftee ti, mana san dhawan; mantichi ammoo bu'urri isaa dhagaa irratti dhaabamee waan tureef jecha, hin jiiyne.
[26] Ammoo namni jechoota qoowlii tiyyaa kanneen dhaggeeyfatee hojii irra hin oolchine hundinuu, akka nama gowwaa mana isaa bu'ura malee, lafa cirrachaa irratti ijaarratetti fakkeeyfama.
[27] Roobni roobee, galaanni dhufee, bubbeeniis bubbiftee, mana san ni dhawan; mantichi suniis jigiinsa hambaa hin qabne jige” jedhe.
[28] Yesuus qoowlii isaa kanneen dubbatee hogguu raawwate, namoonni danuun barsiisa isaa hedduu dha ajaa'iban.
[29] Inni akka barsiisota seeraa isaanitti odoo hin tahin, akka nama amrii qabuu tokkotti isaan ni barsiisa ture.