[1] Guyyuma san Yesuus manaa bahee, garba bishaanii bira taa'e.
[2] Ummanni hedduuniis isa biratti walitti qabamnaan, doonii takka seenee ti barsiisuuf gadi taa'e; namoonni danuuniis akkasumatti qarqara garba bishaantichaa ti dhadhaabbachaa turan.
[3] Yesuus fakkeenya adda addaa tiin waan hedduu isaanitti himuu eegale, “Kunoo, namtichi tokko shanyii facaasuuf bahe.
[4] Inni odoo facaasuu, hammi tokko karaa cinaa dha bu'an, shimbirroonni dhufanii, funaananii ti nyaatan.
[5] Kaan ammoo lafa dhagaa, bakka biyyee hedduu hin qabne irra bu'an; lafti isaan irra bu'an biyyee gadi fagoo waan hin qabneef, dafanii ti biqilan.
[6] Ammoo, hogguu aduun itti baate xoollaqanii, hidda gadi fagoo waan hin godhatiniif ni goggogan.
[7] Kaan qoree keeysa bu'an; qoreen guddattee ti isaan huute.
[8] Kaan ammoo biyyee gaarii irra bu'anii ti midhaan godhatan, firiin isaanii tiis dachaa dhibba, kaan dachaa jahaatama, kaaniis dachaa soddoma tahe.
[9] Namni gurra dhagayu qabu haa dhaggeeyfatu!” jedhe.
[10] Eegasii barattoonni Yesuusitti dhihaatanii ti, “Maaliif fakkeenyaan isaanitti dubbatta?” jedhanii ti isa gaafatan.
[11] Yesuus ammoo deebisee, “Hiccitii mootummaa samii beekuun isiniif kannamee ti jira; isaaniif ammoo hin kannamne.
[12] Isa waa qabuuf, hanga isa irraa hafutti itti dabalamee ni kannamaaf; kan hin qabne ammoo, waanuma inni qabu illeen isa duraa ni fudhatama.
[13] Isaan oduma laalanii hin arkan, oduma dhaggeeyfatanii hin dhagayan, hin hubataniis; kanaafiin fakkeenyaan isaanitti dubbadha.
[14] Raajiin, Isaayyaas dubbate isaan irratti raawwatamee ti jira. Inni niis, ‘Dhagayuu ni dhageeysu, ammoo hin hubattan; laaluu ni laaltu, ammoo hin agartan.
[15] Qalbiin ummata kanaa hadooddee ti jirti; gurra isaanii tiis cuqqaalanii ti jiru, ija isaanii tiis duruunfatanii ti jiru. Akkana silaa tahuu baatee, ija isaanii tiin ni arku, gurra isaanii tiiniis ni dhagayu turan; qalbii isaanii tiiniis ni hubatu, gara kiyyattiis ni deebi'u turan, aniis isaan niin fayyisaan ture’ jedha ture.
[16] “Isin ammoo, ijji teeysan waan arkaniif jecha, gurri keeysaniis waan dhagayaniif eeybifamoo dha.
[17] Dhugumaan isinitti hima, nabiyyoonni hedduunii fi warri jireenya qaceeloo jiraatan waan isin agartan kanneen arkuuf kajeelanii, ammoo hin agarre; waan isin dhageeysaniis dhagayuuf kajeelanii, ammoo hin dhageenye” isaaniin jedhe.
[18] Yesuus itti furuudhaan, “Fakkeenyi namticha shanyii facaasuu maalitti akka hiikamu dhaggeeyfadhaa.
[19] Akkuma shanyiin karaa cinaatti facaafamte taate, eenyu illeen qoowlii mootummichaa dhagayee yoo hubachuu baate, inni hamaan dhufee ti qoowlicha qalbii isaa keeysatti facaafame duraa butata.
[20] Waa'ee shanyii lafa dhagaa keeysatti facaafamtee taanaan, tun akkuma nama qoowlicha dhagayee hogguusuma gammachuu dhaan fudhatee ti.
[21] Inni waytumaaf malee hidda hin qabu; sababa qoowlichaa tiif rakkinni yookiin reebamuun hogguu ka'u, hogguusuma gufatee irraa kufa.
[22] Akkaataa shanyii qoree keeysa buute taanaan, kun namticha qoowlicha dhagayee; booddee, cinqiin addunyaa irraa tii fi, ammaas gowwoomsaan soorummaa sobaa tiis qoowlicha ni hudhu, firiis odoo hin godhatin ni hafa.
[23] Akkaataa shanyii lafa gaarii irratti facaafamtee taanaan ammoo, akkuma namticha qoowlicha dhagayee ammaas hubatee ti; firiis mirkaniin godhate, hammi tokko dhibba, hammi kaan jahaatama, hammi kaaniis soddoma kannu” jedhe.
[24] Yesuus ammaas fakkeenya biraa tokko isaanitti hime, “Mootummaan samii dhaa nama shanyii gaarii ooyruu isaa facaafateetti fakkeeyfamti.
[25] Eega namuu rafan booda, adawwiin namtichaa dhufee, girdaad qamadii keeysa facaasee ti deeme.
[26] Midhaan biqilee firii eega godhate booddee, girdaadiis kunoo ni mullate.
[27] Hojjatoonni abbaa warraatti dhihaatanii ti, ‘Yaa Gooftaa, shanyii gaarii dha ooyruu tee titti facaaftee mitii? Girdaad kun ammoo eeysaa dhufe?’ jedhaniin.
[28] Inni ammoo deebisee, ‘Nama adawwii tiyya tahee tu akkana godhe’ isaaniin jedhe; hogguus hojjatoonni, ‘Duuba nuti dheeynee, akka keesaa haramnu ni barbaaddaa?’ jedhaniin.
[29] Inni ammoo, ‘Lakkisaa hin tahu! Girdaad odoo haramtanii, qamadiis wajjiin akka hin buqqaafneef, dhiisaa!
[30] Hanga manziila oomishaatti lachuu tuu walumaan haa guddatanii. Wayta oomishaa warri oomishaniin, dura girdaad walitti qabaa tii, akka gubamutti qabe-qabeen hidhaa, eegas booda qamadii gootaraa kiyyatti walitti anaaf qabaa jedhee tiin itti hima’ jedhee ti isaaniif deebise” jedhe.
[31] Yesuus itti furee fakkeenya biraa tokko isaanitti hime, “Mootummaan samii, firii zanaabii tan namni fuudhee ooyruu isaa keeysa facaase fakkaatti.
[32] Firiin isii dhaa shanyii hundumaa irra xixiqqoo dha, hogguu guddatte ammoo tusii hundumaa irra caaltee, mukaas taatee, shimbirroonni dhufanii dameelee isii ti irratti goojoo ni ijaarratu” jedhe.
[33] Yesuus ammaas fakkeenya biraa tokko isaanitti hime, “Mootummaan samii dhaa, rushii dubartiin takka fuutee daakuu qunnaa sadihitti maktee, hanga rushichi hunduma isaa tuu bukeeysutti keeyseetti fakkaatti” jedheeni.
[34] Yesuus kana hundumaa fakkeenyumaani dannaba namaa sanitti dubbate; eeyye, inni fakkeenyaan maletti waa takka illee isaanitti hin dubbanne.
[35] Kanaan, waan nabiyyichi, “Fakkeenyaaniin dubbachuu jalqaba, bu'uramuu lafaa tiin duraa jalqabee waan dhooyfamee turees niin beeysisa” jedhamee waan dubbatamee tu raawwatame.
[36] Yesuus eegas booda ummata san biraa deemee ti mana ol seene; hogguus barattoonni isaa itti dhihaatanii, “Fakkeenya girdaad ooyruu keeysaa nuuf hiiki!” jedhaniin.
[37] Yesuus deebisee, “Inni shanyii gaarii facaasu Ilma Namaa ti.
[38] Ooyruun addunyaa ti; shanyiin gaariin ilmaan mootummaa ti; girdaadiis ilmaan isa hamaa ti.
[39] Adawwichi girdaad facaase Sheeyxaana; oomishni dhuma addunyaa ti; warri oomishaniis maleeykoota Rabbii ti.
[40] Akkuma girdaad walitti qabamee ibiddaan gubamutti, dhuma addunyaattiis ammaas akkasuma taha.
[41] Ilmi Namaa maleeykoota isaa ni erga; isaaniis karaa Rabbii irraa waan nama gufachiisu hundumaa, warra seera-dhablee hunduma mootummaa isaa keeysaa walitti ni qabu,
[42] boolla ibiddaattiis bakka booyichaa fi ilkaan qaruun jirutti ni darbu.
[43] Eegaa, warri qaceeloon mootummaa Abbaa isaanii keeysatti akka aduutti ni ifu; namni gurra dhagayu qabu haa dhaggeeyfatu!” jedheeni.
[44] Hogguus Yesuus, “Mootummaan samii dhaa, akka qabeenya ooyruu keeysatti dhooyfamee ti fakkaatti; namtichi tokko qabeenya akkasii kana arkee ti deebisee eega daboole booddee, gammachuun deemee ti, waan qabu hundumaa gurguree lafa ooyruu san bitate.
[45] “Mootummaan samii dhaa ammaas, akka naggaadee lu'ulu'a gaggaarii barbaaduu ti fakkaatti.
[46] Naggaadichi lu'ulu'a qaalii tokko agarraan, deemee ti waan qabu hundumaa gurguree lu'ulu'a san bitate” jedhe.
[47] Yesuus ammaas itti furee, “Mootummaan samii dhaa, akka shabaka baharitti darbamee, gosa kalluunaa hunduma walitti qabee ti fakkaatti.
[48] Hogguu shabakni kalluunaan guutame, namoonni qarqara bishaanitti harkisanii ti, taa'anii kalluuna gaggaarii meeshaa isaanitti naqan, badaa ammoo ni darban.
[49] Qiyaamaa dhuma addunyaattiis akkanuma taha. Maleeykoonni Rabbii as bahanii ti, warra hamaamoo warra qaceelota irraa gargar baasu.
[50] Warra hamoo boolla ibiddaatti, bakka booyichinii fi ilkaan qaruunn jirutti isaan darbu” jedhe
[51] Kana booddee Yesuus, “Waan kanneen hundumaa hubattanii ti jirtuu?” jedhee ti isaan gaafate; isaaniis deebisanii ti, “Eeyye” jedhaniin.
[52] Inni ammaas, “Kanaaf jecha barsiisaan seeraa tokko illee nuu, kan mootummaa samii tiif barattuu tahuuf leenjifame, akka abbaa manaa kan magaazana isaa keeysaa waan haarayaa fi waan moofaa gadi baasuu ti fakkaata” jedhe.
[53] Yesuus fakkeenya kanneen hundumaa isaanitti himee eega raawwate, achii ka'ee ti deeme.
[54] Gara magaalaa kutaa itti dhalatee dhufee ti, mana sagadaa isaanii keeysatti isaan barsiise. Isaaniis ajaa'ibuun, “Hikmaan akkanaa tii fi hojii quduraa kanneen eeysumaa arkate?
[55] Inni kun ilmuma najjaartichaa tii mitii? Haati isaa tiis tanuma Maariyaam jedhamtuu mitii? Ammaas Yaaqoobii fi Yoseef, Simoonii fi Yihudaaniis obboleeyyanuma isaa tii mitii?
[56] Obboleeyyan isaa dubartoonni hundinuu asuma nu wajjiin jiraatuu mitii? Duuba namtichi kun, eeysumaa waan kanneen hundumaa arkate ree?” jedhan.
[57] Isaan haala kanatti isa balfan. Yesuus ammaas, “Nabiyyiin tokko bakka biraa hundumatti kabajaa ni qaba; ammoo biyya isaa tii fi warra isaa biratti kabajaa hin arkatu” isaaniin jedhe.
[58] Sababa amanti-dhablummaa isaanii tiif jecha, hojii quduraa hedduu achitti hin dalayne.