[1] Wayta san Herodis, bulchaan biyyaa, gurra oduu Yesuus dhagayee ti,
[2] hojjatoota isaa tiin, “Namtichi kun Yohannis Cuuphaa tahuu dha qaba; isaa tu du'aa kaafame; kanaaf hojiin quduraa kanneen hundinuu, isaan hojjatamaa jiru” jedhe.
[3] Herodis kanaan dura, waa'ee Herodiyaas, niitii obboleeysa isaa Filiphoosiif jecha, Yohannis qabsiisee, hiisisee, mana hidhaatti galchisiisee ti ture.
[4] Yohannis Herodisiin, “Ati isii fuudhuun kee seera miti” jechaa ti ture.
[5] Herodis, Yohannis ajjeesisuuf barbaadu illee, ammoo ummanni Yohannis akka nabiyyii tokkotti waan laalaniif jecha, isaan ni sodaate.
[6] Gaafa guyyaan yaaddannoo dhaloota Herodis gahe, intalti Herodiyaas keeysummoota san duratti sirbitee ti Herodis gammachiifte.
[7] Hogguus inni, waanuma isiin gaafatte isiif kannuuf wa'ada galeefi.
[8] Intalti ammoo haadhaan gorfamtee ti, “Mataa Yohannis Cuuphaa dhaa, asumatti safii tana irratti anaaf kanni” jetteeni.
[9] Mootichaas naasuun mudhii dha kutte, ammoo wa'ada galee fi keeysummoota isaa tiif jecha, akka kannamuuf ajaje.
[10] Itti ergee tiis, mana hidhaa keeysatti mataa Yohannis irraa mursiise.
[11] Mataan isaa suniis safii irratti fidamee ti, intalaaf kanname; isiiniis haadha isiitti geeysite.
[12] Barattoonni Yohannisiis dhufanii ti, reefka isaa fuudhanii awwaalan; ammaas deemanii ti Yesuusitti himan.
[13] Yesuus oduu tana hogguu dhagaye, doonii dhaan achii ka'ee ti lafa umnaa takkatti jalaa deeme; dannabni namaa ammoo deemuu isaa wayta dhagayan, mandaroota irraa miilaan isa duukaa deeman.
[14] Yesuus qarqara bishaanitti akkuma achi baheen, dannaba namaa arkee, isaaniif garaa laafee ti, dhukkubsatoo isaanii tiis fayyiseef.
[15] Hogguu dhihee galgalaawe, barattoonni isatti dhufanii ti, “Tun lafa namni hin jirre, guyyaaniis deemee ti jiraa, gara gandeenii dhaqanii, waan nyaatan akka ifitti bitataniif, ummata gadi dhiisi!” jedhaniin.
[16] Yesuus ammoo, “Deemuun isaan irra hin jiruu, isinummaan waan isaan nyaatan kannaaf!” isaaniin jedhe.
[17] Isaan ammoo deebisanii, “Nuti biddeena shanii fi kalluuna lama qofa asii qabna” jedhaniin.
[18] Inni ammoo, “Mee gara kiyya fidaa!” jedheeni.
[19] Kana booddee coqorsuma san irra akka taa'aniif ummata danuu san ajajee ti, biddeena shananii fi kalluuna lamaaniis fuudhee, gara samii ol laalee, eeybisee, kukkutee ti biddeena san barattoota isaatti kakkanne; barattoonni niis ammaas ummata saniif hiran.
[20] Isaan hundinuu nyaatanii ti quufan. Eegas booda barattoonni hambaa isaan irraa hafe safii kudha lama guutuu dha fuudhan.
[21] Warri nyaatan, dubartootaa fi joollee malee, dhiirti qofti toora kuma shanii ti turan.
[22] Yesuus hanga ifii ummata san geggeeysuu, barattoonni isaa doonii seenanii, deemanii isa dura gama akka ceehan godhe.
[23] Ummata san eega geggeeyse booddee, kophaa isaa gaara gubbatti kadhachuuf ol bahe; hanga galgalti dhuftutti kophuma isaa ti achi ture.
[24] Dooniin ammoo wayta san, lafa qarqara bishaanii irraa hedduu fagaattee, bubbeen fuullee dhaan waan itti bubbifteef jecha, bishaan wal darbuun asii fi achi daddarbamaa ti turte.
[25] Halkan keeysa gara iyyansa lukkuu lammaffaatti, Yesuus bishaan gubbaa deemaa ti gara isaanii dhufe.
[26] Barattoonni ammoo bishaan irra isaa deemu arkanii, hedduu baaraguu dhaan, “Kun ruuhaaniyyii dha” jechaa, sodaa dhaan iyyan.
[27] Yesuus ammoo hogguusuma, “Abshir, bar anaa, hin sodaatinaa!” jedhee ti isaanitti dubbate.
[28] Phexiroos deebisee, “Yaa Gooftaa! Eega si taate, bishaan irra gara kee akkaan dhufu na ajaji!” jedheeni.
[29] Inni ammoo, “Haya koottu!” jedheeni; hogguus Phexiroos doonii keeysaa bahee, bishaan gubbaa irra gara Yesuus deemuu jalqabe.
[30] Bubbee jabduun sun hogguu itti dhagayamte ammoo ni sodaate; gadi liqimfamuu jalqabnaaniis, “Yaa Gooftaa, na eewali!” jedhee ti iyye.
[31] Yesuus hogguusuma hiixatee harkaan isa qabee ti, “Ati yaa amanti-qaliil! Maaliif mamte?” jedheeni.
[32] Hogguu isaan doonii seenan, bubbeen sun ni dhaabbatte.
[33] Warri doonii keeysa jiraniis, “Ati dhugumaan Ilma Rabbii ti!” jedhanii ti Yesuusiif sgadan.
[34] Hogguu gama ceehaniis, Genesaarexitti lafatti bahan.
[35] Namoonni sanii isa tahuu hogguu baran, naannawa san hundumaatti erganii, warra dhukkubsachaa turan hundumaa gama isaa ti fidan.
[36] Warri dhukkubsatan kun, xarzuma huccuu isaa qofa tuqachuuf isa ni kadhatu turan; hangi xarzii huccuu isaa tuqan hundinuu ni fayyan.