[1] Yesuus doonii seenee, bishaan gama ceehee ti, gara magaalaa isaa dhufe.
[2] Kunoo jarreen tokko nama qaamni isaa laamshawe siree irra ciibsanii ti gara isaa fidan; Yesuus amantii jarreen kanaa hogguu arke, namticha qaamni isaa laamshaween, “Yaa ilma kiyya abshir jabaadhu! Diliin tee hundi niis oomfii siif godhamtee ti jirti” jedheeni.
[3] As irratti barsiisota seeraa keeysaa muraasni, “Namtichi kun Rabbi arrabsa” qalbii isaanii keeysatti ifiin jedhan.
[4] Yesuus ammoo yaada isaanii beekee ti, “Qalbii teeysan keeysatti maaliif hamtuu yaaddu?
[5] Kamtu irra sablata? Diliin tee oomfii siif godhamtee ti jirti, jechuu dha moo, yookiin ka'ii tii deemi jechuu dha?
[6] Ilmi Namaa addunyaa irratti, dilii oomfii godhuuf amrii akka qabu, isin ammoo beekaa!” isaaniin jedhe. Eegas namticha laamshawaa dhaan, “Ka'ii tii, siree tee fudhadhuu mana keetitti gali!” jedheeni.
[7] Namtichi niis hogguusuma ka'ee ti, gara mana isaa deeme.
[8] Dannabni namaa tana hogguu arkan ni birratan, Rabbi kan amrii akkasii namootaaf kanneefiis hamdii dha dhiheeysan.
[9] Yesuus achii ka'ee dabraa odoo jiruu, nama Maatewos jedhamu tokko, kan bakka qaraxaa taa'u arkee ti, “Na duukaa bu'i!” jedheeni. Maatewosiis hogguusuma ka'ee ti isa duukaa bu'e.
[10] Kana booddee ammoo Yesuus mana Maatewositti gabatee nyaataa bira taa'e; kunoo qaraxxootaa fi warri tuffatamoon hedduun dhufanii ti, Yesuusii fi barattoota isaa wajjiin gabatee bira taa'an.
[11] Warri Fariisotaa tana hogguu arkan barattoota isaa tiin, “Maaliif barsiisaan keeysan warra qaraxxuu dhaa fi tuffatamoo wajjiin nyaata?” jedhaniin.
[12] Yesuus ammoo hogguu tana dhagaye, “Warra dhukkabsatoo malee, warri fayyaa qaban ogeeysa fayyaa dhaa hin barbaadan.
[13] ‘Ani rahamataan barbaada malee, aarsaa miti’ jechuun hiikkaa maal akka qabu, deemaa tii baradhaa! Ani warra qaceelota yaamuuf hin dhufne, warra dilaawootaan yaamuuf dhufe malee” jedhe.
[14] Eegas barattoonni Yohannis Yesuus bira dhufanii ti, “Nuu fi Fariisonni maaliif soomanna? Barattoonni kee ammoo maaliif hin soomanne?” jedhaniin.
[15] Yesuus deebisee, “Aruuztichi hanga isaan bira jiru warri millisee dhaa, gadduu ni dandayuu? Guyyaan aruuztichi isaan biraa itti fudhatamu dhufuuf taa'a; isaan hogguu san ni soomu.
[16] “Nam tokko illeen erbee haaraya takkaa hin miicamin, uffata moofaa irratti hin erbu; erbeen haarayni uffata moofaa ni baqaysiti, baqaqaan tuniis tan duraa irra tan caalu taati.
[17] Akkuma kanatti ammaas, daadhii inabaa haaraya qandii moofaatti hin naqan; akana yoo godhan, qandiin ni dhooti, daadhiiniis ni dhangalaati, qandichi niis turaab taha. Akkas godhuu mannaa, daadhii inabaa haaraya, qandii haarayatti naquu dha, akkasitti daadhii fi qandiniis ni eewalamu” isaaniin jedhe.
[18] Yesuus odoo tana isaanitti dubbachaa jiruu, kunoo hoogganaan tokko dhufee ti isa duratti jilbiiffatee ti, “Intalti tiyya ammumaan tana na duraa duutee, ati mee koottuu tii harka kee isii irra kaahi, isiiniis deebitee ti jiraatti” jedheeni.
[19] Akkasitti Yesuus ka'ee barattoota isaa tiin wajji hoogganaa san duukaa deeme.
[20] Hogguus dubartiin takka, tan bara kudha lama dhiiga irraa yaa'uun dhibamaa turte, duyda isaa duubaan dhuftee ti, xarzii uffata Yesuus tuuyxe.
[21] Isiin garaa isii keeysatti, “Uffatuma isaa qofa silaa tuqee niin fayya” jettee yaaddee ti turte.
[22] Yesuus ammoo garagalee isii arkee, “Abshir, intala tiyya, amantiin tee si fayyiftee ti jirti” jedheeni; dubartittiiniis hogguma san fayyite.
[23] Yesuus mana hooggantichaa hogguu gahe, warra uluullee gaddaa afuufanii fi nama danuu goohaa booyu arkee ti,
[24] “Intalti rafutti jirti malee hin duunee, asii deemaa!” isaaniin jedhe. Isaan ammoo itti koflan.
[25] Namoonni eega gadi yaafaman booddee, Yesuus keeysa ol seenee ti, harka intalaa qabe, isiiniis ni kaate.
[26] Oduun tuniis naannawa kutaa sanii hunda wal geeyse.
[27] Yesuus achii ka'ee odoo dabruu, namoonni jaamaan lama isa duukaa deemaa ti, “Yaa Ilma Daawwid nu maari!” jechaa iyyu turan.
[28] Hogguu inni mana ol seene, namoonni jaamoonni sun isatti dhihaatan; hogguus Yesuus, “Tana godhuu akkaan dandayu ni amantanii?” isaaniin jennaan, isaaniis, “Eeyye yaa Gooftaa” jedhaniin.
[29] Kana booddee ija isaanii tuqee ti, “Kunoo, akkuma amantii teeysanii isiniif haa taatu!” jedheeni.
[30] Hogguus ijji isaanii ni banaman; Yesuus ammoo, “Akkana jettanii, namni tokko illeen tana akka hin dhageenye” jedhee, jabeeysee ti isaan dinniine.
[31] Isaan ammoo achii deemanii ti, oduu gurra isaa, naannawa san hunda waliin gahan.
[32] Hogguu isaan achii bahan jarreen tokko nama didaa, kan ruuhaan hamaan keeysa jiru tokko gara Yesuus fidan.
[33] Ruuhaan hamaan suniis eega isa keeysaa baafame, namtichi didaa ture ni dubbate. Namoonni niis baaseeyfachaa, “Wanni akkasii tun Israa'el keeysatti gokumaa hin arkamne” jedhan.
[34] Fariisonni ammoo, “Humna alaqaa ruuhaanota hamoo tiin, ruuhaanota hamoo baasa” jedhan.
[35] Yesuus mandaroota hundumaa fi gandeen keeysa naannawaa, manneen sagadaa isaanii keeysatti barsiisaa, ammaas Wangeela Mootummaa Rabbii labsaa, uzrii fi dhibdee hundumaa irraa fayyisaa ti ture.
[36] Inni ummata danuu, kanneen akka hoolota tiysituu hin qabnetti bututanii, gatamanii hadiyyooman hogguu arke isaaniif nahe.
[37] Hogguus barattoota isaa tiin, “Oomishni hedduu bal'aa dha, hojjatoonni ammoo muraasa.
[38] Eegasuu, hojjatoota oomisha isaatti akka erguuf, Gooftaa oomishichaa kadhadhaa!” jedhe.