[1] Wayta san Yesuus guyyaa Sanbataa, ooyruu qamadii takka keeysa dabre; barattoonni isaa ammoo beelawanii waan turaniif, ashiita midhaanii ciratanii nyaachutti ka'an.
[2] Warri Fariisotaa tana arkanii ti Yesuusiin, “Barattoonni kee waan seerri guyyaa Sanbataa godhuu hin haamne gochaa ti jiruu, ilaali!” jedhaniin.
[3] Inni ammoo deebisee, “Daawwid wayta beelawe, namoota isaa wajjiin turan wajji, waan godhe isin hin dubbifnee?
[4] Inni mana Rabbii seenee ti, biddeena ilaalchaa Rabbii tiif dhihaate nyaate; biddeenni kun luboota qofaaf malee, isaa fi warra isaa wajjiin turaniif, seeraan kan dhoorkamee dha.
[5] Yookiin luboonni guyyuma Sanbataa Beeytal Maqdas keeysatti seera Sanbataa cabsanii kudha-malii akka turan, seera keeysatti hin dubbifnee ree?
[6] Beeytal Maqdas irra kan caalu tokko, akka as jiruun, isinitti hima.
[7] Ammoo, ‘Ani rahamataan barbaada malee, aarsaa miti’ jechuun maal jechuu akka tahe odoo hubattanii, warra yakka hin qabnetti yakka hin murtan turtan.
[8] Ilmi Namaa Sanbataaf illee Gooftaa dha” isaaniin jedhe.
[9] Achii hiis dabree Yesuus mana sagadaa isaanii ti seene.
[10] Kunoo, namticha harki isaa tokko naafa tahee tu achi ture; hogguus sababa ittiin isa kasan arkachuuf jecha, “Guyyaa Sanbataa nama fayyisuun seeraa?” jedhanii ti isa gaafatan.
[11] Inni ammoo, “Isin keeysaa namni hoolaa tokko qabu, hoolaan isaa tiis guyyaa Sanbataa boolla keeysatti yoo kufe, qabee achi keeysaa kan hin baafne eenyu?
[12] Namni ammoo hammam takka, hoolaa irra gatii caalu qaba? Eegasuu guyyaa Sanbataa, waan gaarii hojjachuu seerri ni hayyama” isaaniin jedhe.
[13] Eegasii namtichaan, “Harka kee diriirsi!” jedhe; namtichi niis ni diriirse, harki isaa deebi'ee ti akkuma isa kaanii fayyaa tahe.
[14] Warri Fariisotaa ammoo gadi bahanii ti, akkaataa itti isa balleeysan irratti wal marihatan.
[15] Yesuus tana hubatee ti bakka sanii irraa jalaa malate; namni danuuniis isa duukaa dha deeman, inni niis isaan hundumaa ni fayyise.
[16] Ammaas namootatti waa'ee isaa akka hin odeeysine cimsee ti isaan ajaje.
[17] Kuniis wanni nabi Isaayyaasiin dubbatame raawwachuuf tahe.
[18] Saniis, “Kunoo kaadamaa kiyya inniniin ani filadhe, jaalatamaa kiyya, kan lubbuun tiyya itti na gammadde; Ruuhaa kiyya isa irra niin kaaya, inni saboota hundumaaf firdii haqaa ni labsa.
[19] Inni namaan hin lolu, hin iyyuus, namni tokko illeen karaa irratti qooqa isaa hin dhagayu.
[20] Firdiin haqaa akka moohattu hanga godhutti, inni gobeensa cafaqamaa illee hin caphsu, jibrii liph-lipha aartuus hin dhaamsu;
[21] saboonni hundinuu maqaa isaa ti abdatu” waan jedhee dha.
[22] Hogguus namticha ruuhaan hamaan keeysa jiru, jaamaa, didaa tokko Yesuusitti fidan; inni niis namticha jaamaa fi didaa ture fayyisee, akka arkuu fi akka dubbatu godhe.
[23] Hogguus namoonni hundinuu birratanii ajaa'ibanii, “Kun ilma Daawwid tahinnaa laata?” jedhan.
[24] Fariisonni hogguu tana dhagayan ammoo, “Namtichi kun Bi'el Zebuul, alaquma ruuhaanota hamoo qofaani, ruuhaanota hamoo baasa” jedhan.
[25] Yesuus ammoo yaada isaanii beekee ti akkana isaaniin jedhe, “Mootummaan feete takka illeenuu, yoo ifii gargar caphxe, baduu isii ti; mandarri tokko yookiin haaskaan tokko, ifiif wal irratti ka'ee yoo gargar caphe, dhaabbachuu hin dandayu.
[26] Sheeyxaanni niis Sheeyxaana yoo baase ifii fuu, gargar hiramee ti jiraa, eegasuu mootummaan isaa akkamitti dhaabbachuu dandeeysi ree?
[27] Ani yoon humna Bi'el Zebuuliin ruuhaanota hamoo baase, joolleen teeysan ammoo humna eenyuu tiin isa baasu? Akkas taanaan, joolluma teeysanii tu daanyoota isin irratti taha.
[28] Ani ammoo Ruuhaa Rabbii tiin ruuhaanota hamoo kaniin baasu yoon tahe, Mootummaan Rabbii isin bira geeysee ti jirti.
[29] “Yookiin namticha jabaa duraan dursee yoo hidhe malee, akkamitti namni mana nama jabaa tokkoo seenee meeshaa isaa saamuu dandaya ree? Eega isa hidhe ammoo, mirkaniin mana isaa saamuu ni dandaya.
[30] Kan anaan wajji hin dhaabbatin, mormituu kiyya, akkasumatti ammaas namni anaan wajji walitti hin qabin, ni bittimsa.
[31] Kanaaf jechaan ani isinitti hima, diliin takka illeenuu, arrabsooniis namaaf oomfii ni godhamu; Ruuhal Qudus arrabsuun ammoo oomfii hin qabu.
[32] Eenyu illeen Ilma Namaa tiin mormee waa isa irratti yoo dubbate, oomfii ni arkata; eenyu illeen Ruuhal Qudusiin mormee isa irratti hamaa yoo dubbate ammoo, addunyaa irrattii fi aakiraattiis oomfii hin arkatuun” isaaniin jedhe.
[33] Yesuus itti furee, “Muka gaarii yoo qabaattan, firiin isaa tiis gaarii dha taati; yookiin muka hamaa yoo qabaattaniis, firiin isaa tiis hamtuu dha taati; mukni firii isaa tiin beekama.
[34] Isin yaa ilmaan buutii! Ifiif hamoo taatanii, mee akkamitti waan gaarii dubbachuu dandeeysu? Waanuma garaa namaa keeysa guutee balaqu, afaan dubbata.
[35] Namni gaariin gaarummaa garaa isaa keeysaa, waan gaarii dha baasa; namni hamaaniis hammeenya garaa isaa keeysaa, waan hamaa dha baasa.
[36] Ani isinittiin hima, namoonni dubbii if-dhabatti afaan isaanii keeysaa baate hundumaaf itti gaafatamu, guyyaa firdiittiis jawaaba irratti deebisuuf taa'u.
[37] Dubbii tee tiin siif firdi godhama, dubbuma tee tiiniis sitti firdi godhama” jedhe.
[38] Hogguus barsiisota seeraa tii fi Fariisota keeysaa jarri hammi tokko Yesuusiin, “Yaa barsiisaa, milikkita akka nu agarsiiftu barbaanna” jedhaniin.
[39] Inni ammoo deebisee, “Dhaloonni hamaanii fi amanti-gantoonni milikkita barbaadu; ammoo milikkituma nabi Yoonaas malee kan biraa tokko illeen hin kannamuuf.
[40] Akkuma Yoonaas garaa kalluuna guddaa keeysa guyyaa sadihii fi halkan sadih turetti, Ilmi Namaa tiis akkasumatti guyyaa sadihii fi halku sadih garaa lafaa keeysa turuuf taa'a.
[41] Warri Nanawee, guyyaa firdii dhaa, dhaloota kanaan wajjiin ka'anii dhihaatanii, yakkaas itti ni muru. Isaan lallaba Yoonaas dhagayanii, waan toowbatanii jiraniifi; amma ammoo, kunoo kan Yoonaas irra caalu tokko as jira.
[42] Mootittiin kibbaa guyyaa firdii dhaa, dhaloota ammaa kanaan wajjiin kaatee, yakkaas itti murti. Isiin hikmaa Solomoon dhaggeeyfachuuf jecha, fagoo xarafa lafaa irraa dhuftee waan jirtuufi; amma ammoo, kunoo kan Solomoon irra caalu tokko as jira” jedhe.
[43] Yesuus ammaas, “Ruuhaan hamaan nama keeysaa hogguu bahu, bakka itti haara baafatu barbaacha lafa bishaan hin jirre keeysa deddeema; ammoo waa takka illee hin arkatu.
[44] Kana booddee, ‘Manuma kiyya kaniin keeysaa bahettiin deebi'ee gala’ jedha. Hogguu deebi'ee dhufuus, mana duwwaa haramee qopheeyfame arkata.
[45] Eegasii deemee ti, ruuhaanota biraa torba, kanneen isa irra hammaatan fidee ti dhufa; isaaniis manatti galanii ti keeysa taa'u. Haalli jireenya namticha sanii kan boodaa kun, kanuma duraa irraa huu hamaa dha taha; hireen dhaloota hamaa kanaa tiis akkasuma taha” jedhe.
[46] Yesuus namootatti dubbachuu irra odoo jiruu, kunoo haati isaa tii fi, obboleeyyan isaa tiis isaan wajjiin haasawuuf dhufanii, ala dhadhaabbatanii ti turan.
[47] [Hogguus namtichi tokko, “Kunoo! Haati tee tii fi obboleeyyan kee ala dhaabbatanii ti jiru, si wajjiin haasawuu dha barbaaduus” isaan jedhe].
[48] Yesuus ammoo deebisee namticha isatti himeen, “Haati tiyya eenyu? Obboleeyyan kiyyaas eenyufaa dha?” jedhe.
[49] Harka isaa tiis gara barattoota isaatitti qabee, “Kunoo haati tiyyaa fi obboleeyyan kiyyaas warruma as jiran kana!
[50] Fedhii Abbaa kiyyaa kan samii irraa, namuma godhuu tu, obboleeysa kiyya, obboleeytii tiyya, haadha tiyyaasi” jedhe.