[1] Fariisonninii fi Saduqoonni, Yesuus fitinuuf jecha dhufanii ti, akka inni milikkita samii irraa isaan agarsiisu gaafatan.
[2] Inni ammoo deebisee, “[Wayta galgalaa, ‘Samiin diimattee ti jirtii, kanaaf jecha boru roobni hin roobu’.
[3] Borumtii ganama ammoo, ‘Samiin diimattee duumeeysi irra kaayee ti jiraa, kanaaf jecha arra ni rooba’ jettu. Bifa samii laaltanii waan tahuuf deemu himuu ni beeytan, milikkita waqtaa ammoo hubachuu hin dandeeysan.]
[4] Dhaloonni hamaan gantoonni, milikkita barbaadu; ammoo milikkituma Yoonaas malee, milikkinni biraa isaaniif hin kannamu” isaaniin jedhe. Kana booddee achumatti isaan dhiisee ti biraa deeme.
[5] Barattoonni wayta bishaan gama ceehan, biddeena tokko illee fudhachuu irraanfatanii ti turan.
[6] Yesuus ammoo, “Hubadhaa! Rushii Fariisotaa tii fi Saduuqotaa irraa if eeggaa!” isaaniin jedhe.
[7] Hogguus isaan, “Waani nuti biddeena hin fidiniif akkana jedha” jedhanii ti walitti dudubbatan.
[8] Yesuus ammoo tana hubachuu dhaan, “Isin yaa warra amanti-qaliil! Maaliif waanuma biddeena qabaachuu dhabuu keeysan irratti dudubbattan?
[9] Isin ammuma illee hin hubannee? Biddeenni shanan namoota kuma shaniif kannamanii, ammaas hambaa safii meeqa akka walitti qabdaniis hin yaadattanii?
[10] Yookiin biddeena torban namoota kuma afuriif kannaman irraa, hambaa safii meeqa walitti qabdan?
[11] Ani waa'ee biddeenaa isinitti dubbachuu dhabuu kiyya akkamitti hubachuu dadhabdan? Ammoo kunoo, rushii Fariisotaa tii fi Saduuqotaa irraa if eeggadhaan jedha” isaaniin jedhe.
[12] Eegana isaan, rushii biddeenaa irraa if eeggadhaaf odoo hin tahin, barsiisa Fariisotaa tii fi Saduuqotaa irraa, if eeggadhaa jechuun isaa, isaaniif gale.
[13] Yesuus, naannoo magaalaa Qiisaariyaa Filiphoos hogguu dhaqe, “Namoonni, Ilma Namaa tiin eenyu jedhu?” jedhee ti barattoota isaa gaafate.
[14] Isaaniis deebisanii, “Hangi tokko, Yohannis Cuuphaa dha jedhu, kaan Eliyaasi, kaaniis Ermiyaasi yookiin nabiyyoota keeysaa tokko jedhu” jedhaniin.
[15] Yesuus ammaas, “Isin hoo, eenyu anaan jettu?” jedhee ti isaan gaafate.
[16] Hogguus Simoon Phexiroos, “Ati Masiihicha! Ilma Rabbii Jiraataa ti” jedhee ti deebiseefi.
[17] As irratti Yesuus, “Yaa Simoon, ilma Yoonaa, ati eeybifamaa dha! Abbaa kiyya kan samii irra jiruu tu, tana sitti mullise malee, yaaduma dhiigaa fi jasada namoomaa irraa sitti mullifamee miti.
[18] Aniis, Phexiroos jedhee tiin si moggaasa. Ammaas dhagaa siibaa kana irrattiin, waldaya tiyya ijaara, karreen jahannamiis isii injifachuu hin dandayan.
[19] Maftoota mootummaa samii tiis siifiin kanna; wanti ati lafa irratti hiite, samii irrattiis hidhamaa dha taha; wanti ati lafa irratti hiiytees, samii irratti hiikamaa dha taha” jedheeni.
[20] Hogguus, Masiihicha tahuu isaa, akkana jedhanii nam tokkotti illee akka hin himne, barattoota isaa dinniine.
[21] Wayta san irraa jalqabee ti Yesuus, Yerusaaleem dhaquun akka isa irra jiruu fi, ammaas manguddoota harkatti, luboota angafoota harkattiis, barsiisota seeraa tiiniis hedduu dararamuun, ajjeefamuun, guyyaa sadeeysaa irrattiis du'aa kaafamuun akka isa irra jiru, barattoota isaatti mullisuu dha eegale.
[22] Phexiroos ammoo moggatti achi isa baasee ti, “Rabbi nutti hin godhin! Yaa Gooftaa, tun gonkumaa si irra hin gahin!” jedhee ti isa oofutti ka'e.
[23] Inni ammoo garagalee ti Phexiroosiin, “Na duubatti deebi'i, ati yaa Sheeyxaana! Gufuu dha anatti taate; ati yaada namaa malee, kan Rabbii hin qabdu!” jedheeni.
[24] Hogguus, Yesuus barattoota isaa tiin, “Namni tokko illeen ana duukaa bu'uu yoo barbaade, if kaadee, fannoo isaa tiis baadhatee, ana duukaa haa bu'uu!
[25] Namni lubbuu isaa jiraachisuu barbaadu, isumaa huu ni dhaba; namni anaaf jecha lubbuu isaa dhabu ammoo, isii ni arkata.
[26] Namni tokko, guutummaa lafa addunyaa arkatee, ammoo lubbuu isaa yoo dhabe, faaydaan isaa maali? Yookiin namni fidaa lubbuu isaa tiif maaluma kanna?
[27] Ilmi Namaa ulfina Abbaa isaa tiin, maleeykoota isaa tiin wajji dhufuuf taa'a; hogguus matuma-matatti, akkuma hojii isaatitti, namaaf ajrii isaa ni kanna.
[28] Dhugumaan isiniin jedha, namoota as dhadhaabbatan kanneen keeysaa, odoo du'a hin dhamdhamin, Ilmi Namaa mootummaa isaa tiin wayta dhufu, warri arkuuf taa'u ni jiru” jedhe.