[1] Hogguu Yesuus roga gaaraa ti irraa gadi bu'e, ummanni hedduun isa duukaa dha bu'an.
[2] Kunoo namtichi dhukkuba coraa tiin gaddaafame tokko gara isaa dhufee ti, fuula isaa duratti jilbiiffatee, “Yaa Gooftaa! Fedhii kee yoo tahe, na fayyisuu ni dandeeysa” jedheeni.
[3] Yesuus harkaan isa tuqee ti, “Niin fedhaa, fayyi!” jedheeni; hogguusuma namtichi dhukkuba coraa kan isa qabe irraa fayyee ti qulqullaawe.
[4] Yesuus, “Akkana jettee waan kana nama tokkotti illee hin himin! Ammoo deemii luba if ilaalchisi, nama hundaa fuu ragaa mirkaneeysaa haa tahu; akka Museen ajajettiis fayyuu tee tiif kannaa tee dhiheeysi!” isaan jedhe.
[5] Akkuma Yesuus magaalaa Qifirnaahom seeneen, hoogganaan dhibbaa tokko isa kadhachaa ti itti dhihaatee,
[6] “Yaa Gooftaa, kaadamaan kiyya qaamni isaa laamshawee mana ciisee hedduu dibamaa ti jira” jedhe.
[7] Yesuus ammoo, “Ani dhufee tiin isa fayyisa” jedheeni.
[8] Abbaan dhibbaalaa sun ammoo deebisee, “Yaa Gooftaa! Wixina mana kiyyaa jala akka seentuuf ani nama gahuu mitii, ati qoowluma takka jedhii, kaadamaan kiyya ni fayya.
[9] Aniis kunoo amrii jala jiraadhee ammaas loltootaan ajajuus if jalaa niin qaba; isa tokkoon ‘Deemi!’ yoon jedhe ni deema, isa kaaniiniis ‘Koottu!’ yoon jedhe, ni dhufa; kaadamaa kiyyaan ‘Tana godhi’ yoon jedheen, akkasuma godha” jedhe.
[10] Yesuus tana hogguu dhagaye ajaa'ibee ti, warra isa duukaa yaa'aa jiraniin, “Dhugumaan isinitti hima, amantii akkanaa nama qabu tokko illee, Israa'el keeysatti hin agarre.
[11] Hedduun bahaa fi dhiha irraahiis dhufanii, mootummaa samii keeysatti Abrahaam, Yisihaaqii fi Yaaqoob wajjiin maadditti akka taa'uuf jiraataniin isinitti hima.
[12] Warri joollee mootummichaa tahuun isaan irra ture ammoo, dukkana alaatti, bakka booyichaa fi ilkaan qaruun jirutti ni darbamu” jedhe.
[13] Hogguus Yesuus hoogganaa dhibbaa saniin, “Deemi! Akkuma ati amantetti siif haa tahu” jedheeni; kaadamaan suniis za'uma sanitti fayye.
[14] Yesuus mana Phexiroos hogguu seene, haati niitii Phexiroos dhukkuba leeydaa tiin dhukkubsattee tan ciiftu arke.
[15] Inni harka isii qabannaan, leeydaan suniis isii gadi dhiifte; isiiniis kaatee ti isa kaadamte.
[16] Galgaluma san, warra ruuhaan hamoon keeysa ture hedduu dha gara isaa fidan; inni ammoo qoowlii takkaan ruuhaanota hamoo san baasee ti, ammaas dhukkubsataa hundaas fayyise.
[17] Kuniis nabi Isaayyaasiin, “Inni, da'iifummaa teenya nu irraa fuudhe, uzroota keenyaas ni baadhate” kan jedhame akka raawwatamuuf tahe.
[18] Yesuus ummata danuu naannoo isaa jiru hogguu arke, garba bishaanii gama akka ceehan barattoota isaa ajaje.
[19] Barsiisaan seeraa tokko ol dhihaatee ti isaan, “Yaa barsiisaa! Garuma ati deemtuun si duukaa deema” jedheeni.
[20] Yesuus ammoo, “Jeedalloon boolla qabdi, shimbirroon qilleensa irraa tiis goojoo qabu, Ilmi Namaa ammoo bakkuma mataa isaa kaayatuu hin qabu” jedheeni.
[21] Barattoota keeysaa kan biraa tokko, “Yaa Gooftaa! Dura deemee, abbaa kiyya akkaan awwaalu naaf hayyami!” isaan jedhe.
[22] Yesuus ammoo, “Warri du'oon du'aa isaanii haa awwaalanii, ati anuma duukaa bu'i!” jedheeni.
[23] Hogguu Yesuus doonii seene, barattoonni isaa tiis isaa wajjiin deeman.
[24] Kunoo, bubbeen jabduun bishaan irratti kaatee hanga wal-darbaan bishaanii doonicha irraan dhangala'utti gahe; Yesuus ammoo rafee ti ture.
[25] Barattoonni hogguus itti dhihaatanii isa dammaysanii ti, “Yaa Gooftaa, nuti dhumutti jirraa nu eewali!” jedhaniin.
[26] Inni ammoo deebisee, “Isin yaa warra amanti-qaliil, maaliif akkanatti sodaattan?” isaaniin jedhee ti; hogguusuma ka'ee, bubbee fi bishaan bahariis oofe; nagayni guddaaniis ni bu'e.
[27] As irratti namoonni birratanii ajaa'ibaa ti, “Kun namuma akkami? Bubbeenii fi bishaan illeen ni ajajamuuf” jedhan.
[28] Yesuus bishaan gama ceehee Gadaraa hogguu dhufe, namoonni ruuhaanonni hamoon keeysa turan lama qabroota keeysaa itti as bahan; jarreen kun akka malee finiinanii nama karaa san irra dabruu, sodaachisanii ti turan.
[29] Isaan kun kunoo iyyanii, “Maaluma nu irraa qabda, yaa Ilma Rabbii? Waytiin odoo hin gahin nu zaliiluuf dhuftee?” jedhaniin.
[30] Waa xiqqo isaan irraa achi fagaatee, bobbaa booyyee tu dheedaa ture.
[31] Ruuhaanonni hamoon sun, “Yoo kan nu baaftu taate, bobbaa booyyee sanitti akka seenu nu ergi!” jedhanii ti isa kadhatan.
[32] Inni niis “Deemaa!” isaaniin jennaan, jara keeysaa bahanii ti, booyyoottan sanitti galan; hogguusuma bobbaan booyyee sun hundinuu hallayyaa irraa baharitti gadi konkolaatanii ti bishaan keeysatti dhuman.
[33] Warri booyyee eeganiis dheeysanii ti, magaalaa seenanii waan tahe hundumaa, waan warra ruuhaanonni hamoon keeysa turan saniif tahees, adda babaasanii ti odeeysan.
[34] Hogguus mandarri sun guutumatti, Yesuus qunnamuuf gadi bahan; hogguu isa arkaniis naannoo isaanii gadi dhiisee akka irraa deemuuf isa kadhatan.