[1] Kun jalqaba Wangeela Yesuus Kiristoos Ilma Rabbii ti.
[2] Kitaaba nabi Isaayyaas keeysatti “Kunoo, ergamaa kiyya kan karaa siif qopheeysu si dura niin erga!”
[3] “Sagaleen huffee gammoojjii keeysaa ni iyyiti; dhagayaa dhaggeeyfadhaa, Gooftichaaf karaa tolchaa tii, xurree inni irra deemuus diriirsaa!” kan jedhu barreeyfamee ti jira.
[4] Yohannis Cuuphaan huffee gammoojjii keeysatti mullatee ti, “Toowbadhaa tii cuuphamaa! Rabbi dilii teeysan isiniif oomfii godha” jechaa ti labse.
[5] Guutummaa kutaa Yihudaa keeysaa fi, kanneen magaalaa Yerusaaleem keeysa jiraatan hundinuu, lafa Yohannis Cuuphaan jirutti bahanii ti, dilii isaanii himachaa, laga Yordaanositti isaan ni cuuphamu turan.
[6] Yohannis uffata rifeensa gaalaa irraa dhawame uffatee, mudhii isaa tiis waraansillee teephaa tiin hidhate, awaannisaa fi deeyma daammuu ti nyaata ture.
[7] Inni niis, “Inni ana irra jabaatu, na booddee dhaan dhufaa ti jira; gad godhee haada kophee isaa ti illee hiikuuf ani nama gahuu miti.
[8] Ani bishaaniiniin isin cuuphe; inni ammoo Ruuhal Qudusiin isin cuupha” jedhee ti labse.
[9] Bara san Yesuus, Naazireet magaalaa Galiilaa irraa dhufee ti, Yohannis Yordaanos keeysatti isa cuuphe.
[10] Yesuus akkuma bishaan keeysaa ol baheen, Yohannis bantiiwwan samii banamanii, Ruuhal Qudusiis kan akka himiimitti isa irratti bu'u arke.
[11] Sagaleen takkaas samii irraa, “Ati Ilma kiyya jaalatamaa dha, akka gaarittiis sittiin gammade” jettee ti dubbatte.
[12] Ruuhaan hogguusuma Yesuus gara huffee gammoojjii keeysa achi deemsise.
[13] Yesuus huffee gammoojjii keeysa guyyaa afurtama bubbule, Sheeyxaanaaniis fitinamaa ti ture. Achittiis bineensa wajjiin ture, maleeykoonni Rabbii tiis isa ni kaadamu turan.
[14] Yohannis Cuuphaan mana hidhaatti eega galfame booddee, Yesuus, Wangeela Rabbii lallabaa ti gara kutaa Galiilaa dhufe.
[15] “Zamanni raawwatamee ti jira, Mootummaan Rabbii tiis dhihaattee ti jirtii, toowbadhaa Wangeelatti amanaa!” jedhe.
[16] Yesuus Garba Bishaan Galiilaa cinaa odoo dabraa jiruu, Simoonii fi Indiriiyaas obboleeysa Simoon, shabaka isaanii bishaanitti odoo darbanii ti arke; isaaniis kalluuna-qabduu dha turan.
[17] Yesuus ammoo, “Koottaa, na duukaa bu'aa! Aniis akka namoota walitti qabdaniin isin godha” isaaniin jedhe.
[18] Isaan hogguusuma shabakkan isaanii achumatti dhiisanii ti, isa duukaa bu'an.
[19] Yesuus hogguu xiqqo achi deemnaan, Yaaqoobii fi Yohannis ilmaan Zabdewos, doonii isaanii keeysa tattaa'anii, shabakkan isaanii odoo tottolfatanii ti arke.
[20] Inni hogguusuma isaan yaame; isaaniis abbaa isaanii Zabdewos, hojjatootaa wajjiin doonii keeysatti dhiisanii ti, Yesuus duukaa bu'an.
[21] Yesuusii fi barattoonni isaa magaalaa Qifirnaahom dhaqan; inni hogguusuma guyyaa Sanbataa mana sagadaa seenee ti barsiise.
[22] Yesuus akka warra barsiisota seeraatti odoo hin tahin, akka nama amrii qabutti waan isaan barsiiseef, namoonni isa caqasan barsiisa isaa hedduu dha ajaa'iban.
[23] Nama ruuhaa hamaa dhaan qabame tokko mana sagadaa isaanii keeysa ture, waytuma san iyyee,
[24] “Yaa Yesuus nama Naazireet, maaluma nu irraa barbaadda? Sa nu balleeysuuf dhuftee? Eenyu akka ati taate ani siin beekaa bar, yaa Qulqulluu Rabbii” jedheeni.
[25] Yesuus ammoo, “Cal jedhii, keeysaa bahi!” jedhee ti ruuhaa san oofe.
[26] Ruuhaan hamaan sun, namticha dhidhiitachiisee, sagalee guddaa dhaan iyyaa ti isa keeysaa bahe.
[27] Namoonni hundinuu ajaa'ibanii ti, “Maal wanti akkanaa? Barsiisa haaraya amrii qabu! Inni ruuhaanota hamoo illee ni ajaja, isaaniis isaaf ni ajajamu” jechaa ti walitti dudubbatan.
[28] Oduun isaa takkumatti naannawa kutaa Galiilaa hunda keeysa facaate.
[29] Akkuma mana sagadaatii bahaniin, Yesuus Yaaqoobii fi Yohannis wajjiin mana Simoonii fi Indiriiyaas dhaqe.
[30] Hogguus haati niitii Simoon, dhukkuba leeydaa tiin qabamtee, ni ciifti turte; hatattamumaan jarri waa'ee isii isatti himan.
[31] Yesuus itti dhihaatee ti, harka isii qabee ol isii kaase. Leeydaan suniis isii gadi dhiifte, isiiniis hogguusuma kaatee ti isaan kaadamte.
[32] Galgala san eega aduun lixxe booddee, warra dhukkubsatoo fi warra ruuhaa hamaan qabamaniis hundumaa gara isaa ti fidan.
[33] Namoonni magaalaa sanii hundinuu balbala duratti walitti qabaman.
[34] Yesuus dhukkubsattoota hedduu warra uzrii adda addaa tiin dhibamaa turan fayyisee, ruuhaanota hamoos hedduu dha baase; ruuhaanonni hamoon eenyu akka inni tahe waan beekaniif, inni ammoo waa takka illee dubbachuu isaaniif hin hayyamne.
[35] Barii ganama odoo ifni lafa hin gahin dura ka'ee, manaa gadi bahee ti, bakka namni hin jirree dhaqee, achitti kadhata godhe.
[36] Simoonii fi saahibban isaa warri wajjiin turan isa barbaacha faana bu'an.
[37] Hogguu isa arkaniis, “Namni hundinuu si barbaadaa ti jira” jedhaniin.
[38] Yesuus deebisee, “Achittiis akkaan lallabuuf itti fufnee gara mandaroota kanneen nutti dhihaatanii haa dheeynu! Aniis kanaaf jechaan dhufe” isaaniin jedhe.
[39] Inni deemee, manneen sagadaa (mukraaba) isaanii kanneen guutummaa kutaa Galiilaa keeysa jiran keeysatti lallabee, ruuhaanota hamoos namoota keeysaa baase.
[40] Nama dhukkuba coraa tiin gaddaafame tokkoo tu gara Yesuus dhufee, “Fedha kee yoo tahe, na fayyisuu ni dandeeysa” jedhee, jilbiifatee ti isa kadhate.
[41] Asi irratti Yesuus gara-laafinaan, hiixatee harkaan isa tuqee, “Niin fedhaa, fayyi!” isaan jedhe.
[42] Hogguusuma dhukkubni coraa isa irraa badee, namtichi fayyee ti qulqullaawe.
[43] Hogguusuma Yesuus, namticha dinniina cimaan if eeggachiisee ti geggeeyse.
[44] Ammaas dabalee “Waan tana nam tokkotti illee hin himinii! Ammoo deemii tii luba if ilaalchisi, namootaaf ragaa mirkanaa haa tahuu; ammaas akkuma Museen ajajetti, fayyuu kee tiif kannaa tee dhiheeysi!” jedhee ti isa gadi dhiise.
[45] Namtichi ammoo akkuma achii gadi baheen, oduu tana gadi naqee babballisuun waliin gahe. Sababa kanaan, Yesuus zaahiritti magaalaa seenuu dadhabee ti, diida baadiyyaa keeysa ture; haa tahu malee, namoonni bakkayyu irraa, gara isaa ni dhufu turan.