[1] Yesuus hogguus, “Mootummaan samii shamarran kurnan warra faanusa isaanii fudhatanii, aruuzticha simachuuf bahaniin wal fakkaatti.
[2] Shamarran san keeysaa shan gowwoota turan, shan ammoo aaqiloota turan.
[3] Warri gowwoonni faanusuma isaanii ti fudhatan malee, gaazaa jala hin fudhanne.
[4] Warri aaqiloonni ammoo, faanusa isaanii wajjiin gaazaas qaruuratti jala fudhatan.
[5] Aruuztichi dhibooynaan, hundi isaanii tuu muganii ti rafan.
[6] “Halkan waarii keeysa ammoo gooti kaate, ‘Aruuztichi kunoo ti! Isa simachuuf bahaa!’ jedhame.
[7] Hogguus shamarran sun hundinuu ka'anii faanusa isaanii tottolfatan.
[8] Warri gowwoonni warra aaqilootaan, ‘Faanusni keenya dhaamuuf deema, gaaza keeysan irraa waa nuuf kannaa!’ isaaniin jedhan.
[9] Warri aaqiloonni ammoo deebisanii, ‘Nuu fi isiniifiis waan gahu nutti hin fakkaatuu, warra gurguru bira dhaqaa tii bitadhaa!’ jedhaniin.
[10] Hogguu isaan bitachuuf deeman, aruuztichi ni dhufe; warri qophaawaniis isaa wajjiin mana aruuzaa seenan, balbalti niis ni cufamte.
[11] Achiin booda shamarran warri hafan kaaniis dhufanii ti, ‘Yaa gooftaa, yaa gooftaa, hula nu irraa bani!’ jedhaniin.
[12] Inni ammoo deebisee, ‘Dhugumaan isiniin jedha, ani isin hin beeku’ jedheeni.
[13] Eegasuu, isin guyyicha yookiin za'aas hin beeytanii dammaqaa!” jedhe.
[14] Yesuus itti dabalee, “Mootummaan samii waan kanatti aanu fakkaatti; namtichi tokko imaltuu fagoo dhaquuf ka'ee ti, kaadamtoota isaa yaamee, horii isaa imaanaa itti kannate.
[15] Akkuma humna isaanii titti, tokkotti qarshii kuma shan, kaanitti qarshii kuma lama, kaaniifiis qarshii kuma tokko kannee ti deeme.
[16] Namtichi qarshii kuma shan fudhate, hogguusuma deemee ittiin naggadee ti, qarshii kuma shan faaydeyse.
[17] Inni qarshii kuma lama fudhatees ammaas, qarshii kuma lama faaydeeyse.
[18] Namtichi qarshii kuma tokko fudhate ammoo, deemee boolla qotee ti qarshii gooftaa isaa san awwaale.
[19] “Gooftaan kaadamtoota kanneenii tura dheeraa booddee deebi'ee ti dhufee, horii isaa jarreen irraa hizaabbate.
[20] Namtichi qarshii kuma shan fudhate, as bahee ti, qarshii biraa kuma shan fidee, ‘Yaa gooftaa, qarshii kuma shan anatti kannatte, kunoo ani ammoo qarshii kuma shan faaydeeyse’ jedheeni.
[21] Gooftaan isaa tiis, ‘Tolchite, yaa kaadamaa gaarii amanamaas; ati waan xiqqoo irratti amanamte, ani ammaas waan guddaa irrattiin si shuumaa; koottuu tii gammachuu gooftaa kee tii hirmaadhu!’ jedheeni.
[22] Namtichi qarshii kuma lama fudhatees as dhihaatee ti, ‘Yaa gooftaa, qarshii kuma lama anatti kannatte, kunoo ani ammoo qarshii kuma lama faaydeeyse’ jedheeni.
[23] Gooftaan isaa tiis, ‘Gaari goote, yaa kaadamaa gaarii amanamaas; ati waan xiqqoo irratti amanamte, ani ammoo waan guddaa irrattiin si shuumaa; koottuu tii gammachuu gooftaa kee tii hirmaadhu!’ jedheeni.
[24] “Namtichi qarshii kuma tokko fudhatees as dhihaatee ti, ‘Yaa gooftaa, ati nama rahamata hin qabne, bakka itti hin facaasinii kan haammattu, bakka itti hin azoorinii kan walitti qabattu, tahuu kee niin beeka.
[25] Tanaaf jechaan si sodaadhee, deemee qarshii tee awwaale; horiin kee tiis kunoo ti!’ jedheeni.
[26] Gooftaan isaa ammoo deebisee ti, ‘Ati yaa kaadamaa hamaa masluufa, bakkaan itti hin facaasinii akkaan haammadhu, bakkaan itti hin azoorinii akkaan walitti qabadhu, beeytee ti jirtaa mitii?
[27] Eegasuu ati qarshii tiyya dhalaan baankii keeysa anaaf kaayuu tu si irra ture; aniis silaa waytaan deebi'ee dhufu faaydaa wajjiiniin haqa kiyya fudhadhaan ture.
[28] Akkana waan taheef, qarshii kuma tokkicha san harkaa fuudhaa tii, kan qarshii kuma kudhan qabuuf kannaa!
[29] Nama qabuuf itti dabalamee ti kannamaaf, qabeenyi isaa tiis akkaan guddaa dha taha; nama waa hin qabne ammoo, hammuma silaa qabu illeen irraa fudhatama.
[30] Kaadamaa faaydaa hin qabne kana dukkana alaatti bakka booyichinii fi ilkaan qaruun jirutti darbaa!’ jedhe” isaaniin jedhe.
[31] Yesuus ammaas, “Wayta Ilmi Namaa ulfina isaa tiin, maleeykoota hundumaan wajjiin dhufu, hogguus inni arshii ulfinaa irra ni taa'a.
[32] Saboonni addunyaa hundi niis, fuula isaa duratti walitti ni qabamu; akkuma tiysituun hoolota re'oota irraa gargar baasutti, inni niis namoota gargar ni baasa.
[33] Hoolota gara harka mirga isaa, re'oota gara harka bitaa isaa ni dhaaba.
[34] Eegas booda mootichi warra gama mirga isaa jiraniin, ‘Isin yaa eeybifamoo Abbaa kiyyaa koottaa tii, mootummaa uumamuu addunyaa irraa jalqabdee isiniif qopheeyfamte dhaalaa!
[35] Beelawee tiin ture, nyaata anaaf kannitan; dheebodhee tiin ture, na obaaftan; keeysummadhee tiin, isin ol na galchitan.
[36] Daaree tiin ture, daara na baaftan; dhukkubsadhee tiin ture, na gaafattan; hidhamee tiin ture dhuftanii na ilaaltan’ jedheeni.
[37] “Eegas warri qaceeloon, ‘Yaa Gooftaa! Yoom beelawuu kee arkinee, si nyaachifne? Yookiin yoom dheebochuu kee arkinee, si obaafne?
[38] Yoom keeysummooytee arkinee si ol galchine? Yookiin yoom daartee si arkinee, daara si baafne?
[39] Yoomiis dhukkubsattee, yookiin hidhamtee, gara kee dhufnee si ilaalle?’ jedhaniin.
[40] Mootichi niis deebisee, ‘Ani dhugumaan isinitti hima, obboleeyyan kiyya warra hundumaa irra xixiqqoo tahan kanneen keeysaa, tokkoof wanni isin gootan, akka waan anaaf gootanitti lakkaawama’ isaaniin jedhe.
[41] “Tana booddee, mootichi warra gama bitaa isaa jiraniin, ‘Isin yaa warra abaaramoota, na irraa fagaadhaa tii, ibidda bara baraa kan Sheeyxaanaa fi maleeykota isaa tiif qopheeyfame keeysa seenaa!
[42] Ani beelawee tiin ture, isin nyaata anaaf hin kannine; dheebodhee tiin ture, isin dheebuu ana hin baafne.
[43] Keeysummadhee tiin ture, isin ol na hin galchine; daaree tiin ture, isin daara ana hin baafne; dhukkubsadhee ture, hidhamee tureesi, isin ana hin gaafanne’ jedhaani.
[44] “Isaaniis deebisanii, ‘Yaa Gooftaa! Yoom beelooytee, dheebottee, keeysumooytee, daartee, dhukkubsattee, yookiin hidhamtee si arkinee, si tajaajiluu dhabne ree?’ jedhanii ti gaafatu.
[45] Hogguus mootichi deebisee, ‘Ani dhugumaan isinitti hima, warra hundumaa irra xixiqqoo kanneen keeysaa namni tokkoof hin godhin, akka waan anaaf hin godhinitti lakkaawama’ isaaniin jedhe.
[46] Akkasitti jarreen kanneen, gara iqaabaa abaditti yaa'u, warri qaceeloon ammoo gara jireenya bara baraa ti seenu” jedhe.