[1] Yesuus barattoota isaa kudha lamaan ifitti yaamee, ruuhaanota najisa akka baasaniif, dhukkubaa fi dhibdee hundaas akka fayyisaniif amrii isaaniif kanne.
[2] Maqaan ergamoota kudha lamaanii kanatti aanee ti jira; inni duraa Simoon isa Phexiroos jedhamee moggaafame, Indiriiyaas obboleeysa Phexiroos, Yaaqoob ilma Zabdewos, Yohannis obboleeysa Yaaqoob;
[3] Filiphoos, Bartolomewos, Toomaas, Maatewos kan qaraxa fuudhu, Yaaqoob ilma Alfewos, Taadewos;
[4] Simoon kan “Hinaafticha” jedhamee beekamee fi Yihudaa Keriyot kan Yesuus dabarsee kanne.
[5] Isaan kudha lamaan kanaan Yesuus, “Ummata saba Israa'el warra hin tahin keeysa bakka takka illee hin deeminaa, magaalaa warra Samaariyaa tokko illees hin seeninaa!” jedhee erge.
[6] “Achii mannaa, gara hoolota mana Israa'el irraa badanii deemaa!
[7] Hogguu dheeyxaniis, ‘Mootummaan samii dhihaattee ti jirti’ jedhaa labsaa!
[8] Warra dhukkubsatoo fayyisaa, warra du'an kaasaa, warra dhukkuba coraa tiin gaddaafaman fayyisaa, ruuhaanota hamoos baasaa; bilaashitti arkattanii, bilaashumatti kannaa!
[9] Ziqeeya, meeta yookiin suldii sibiila diimaa sabbata keeysanitti guduunfattanii hin yaa'inaa.
[10] Karaa deemtaniifiis qandii, yookiin qamisa lama, yookiin kophee fi ulees hin fudhatinaa; hojjataan waan isa barbaachisu arkachuun irra jira.
[11] Magaalaa yookiin ganduma fedhe illee wayta seentan, nama isin qeebaluun male barbaadaa, hanga bakka sanii deemtanitti isa bira turaa!
[12] Mana hogguu seentaniis nagaya dhiheeysaa!
[13] Warri sun kan kanaan male yoo tahe, nagayni keeysan irratti haa bu'u, warra hin malleef yoo tahe ammoo, nagayni keeysan isiniif haa deebi'u.
[14] Ammaas abbummaan fedhee huu, yoo isin simachuu dhaa baate, yookiin dubbii teeysaniis dhagayuu baate, mana sanii, yookiin mandaricha sanii hogguu baatan, dhukkee miila keeysan irraa achitti dhadhawadhaa!
[15] Ani dhugumaan isinitti hima, guyyaa firdiitti, warra magaalaa kanaa irra, warra Sodoomii fi Gomoraa tiif firdiin irra sablachuuf teeysi” jedhe.
[16] Yesuus itti dabalee ammas, “Ani kunoo, akka hoolotaattiin yayyii jiddutti isin erguuf deemaa; eegasuu isin, akka bofaatti shaaxira, akka himiimii tiis nassaba tahaa!
[17] Namoota irraa if eeggadhaa! Yaa'itti dabarsanii isin ni kannu, manneen sagadaa isaanii keeysattiis isin ni garafu.
[18] Isaanii fi ammaas warra saba Israa'el hin tahiniif ragaa akka tahuuf, anaaf jecha, isaan warra bulchaa biyyaa tii fi fuula mootootaa durattiis isin ni dhiheeysu.
[19] Hogguu dabarsanii isin kannaniis, isin akkaataa itti dubbattanii fi yookiin jawaaba maal deebifna jettanii itti hin cinqaminaa; waan dubbachuun isin irra jiru, za'uma sanitti isiniif kannama.
[20] Ruuhaa Abbaa keeysanii tu isin keeysaan dubbata malee, isinii miti warri dubbattan.
[21] “Obboleeysi obboleeysa, abbaaniis ilma du'aaf dabarsanii ni kannu; joolleeniis haawwan isaanii irratti ni aaqawu, isaan ni ajjeesisuus.
[22] Maqaa kiyyaaf jecha, hundumaa biratti ni jibbamtu; namni hanga dhumaatti rakkina dandayee obsu ammoo najaa dha baha.
[23] Magaalaa tokko keeysaa yoo isin arihatan, magaalaa kaanitti baqadhaa! Dhugumaan isinitti hima, dhufa Ilmi Namaa duratti, mandaroota Israa'el hundumaa keeysatti, barsiiftanii waliin hin geeysan.
[24] “Barataan tokko barsiisaa isaa ti irraa olii miti, hojjataaniis nama isa hojjachiifatu irraa olii miti.
[25] Barataan akka barsiisaa isaa tahuun, hojjataaniis akka hojjachiisaa isaa tahuun ni gaha; abbaa manaa tiin ‘Bi'el Zebuul’ jedhanii eega yaaman, eegasuu miseensa haaskaa isaa tiin hammam caalchisanii maqaa hamaa itti haa moggaasu ree!” jedhe.
[26] Yesuus ammaas, “Eegasuu isaan hin sodaatinaa! Wanni hagoogamee jiru hundinuu zaahiritti mul'ifama; wanni dhooysatti eegamaa jiruus kan odoo hin beekamne hafu hin jiru.
[27] Waaniin ani dukkana keeysatti isinitti himu, isin ifa guyyaa keeysatti dubbadhaa, waan gurratti isinitti hasaasamees, tuuttoo manaa gubbaa irraa labsaa.
[28] Warra jasada namaa malee, lubbuu ajjeesuu hin dandeenye hin sodaatinaa! Isaanii mannaa, Rabbi kan lubbuu fi jasadaas waliin jahannamitti dirgim godhuu dandayu sodaadhaa!
[29] Shimbirroon biicuun lama toora saantiima tokkootti gurguramuu mitii? Takka illeen isaanii tuu ammoo, fedhii Abbaa keeysanii tiin maleetti, lafa hin bu'an.
[30] Isin taanaan kunoo, rifeensi mataa keeysanii hundi illeen lakkaawamaa dha.
[31] Isin eegasuu shimbirroota danuu irra waan caaltaniif jecha hin sodaatinaa!” jedheeni.
[32] Itti furee tiis Yesuus, “Eenyu illeen namoota duratti anatti amanuu dhaan ragaa yoo bahe, aniis Abbaa kiyya kan samii irra jiru duratti ragaa niin bahaaf.
[33] Ammoo, eenyu illeen namoota duratti yoo na gane, aniis Abbaa kiyya kan samii irra jiru duratti isa niin gana” jedhe.
[34] Yesuus ammaas, “Addunyaa irratti nagaya fiduuf waaniin dhufe isinitti hin fakkaatin; nagaya fiduuf hin dhufne, habalee fiduufiin dhufe malee.
[35] Ani nama tokko abbaa isaa tiin wajji, intalaas haadha isii tiin wajji, niitii gurbaa, soddaa isii tiin wajji wal afaan garagalchuufiin dhufe.
[36] Adawwiin nama tokkoo miseensootuma haaskaa isaa ti tahu.
[37] Namni, abbaa isaa yookiin haadha isaa ana irra caalchisee jaalatu, kan anaan maluu miti; namni, ilma isaa yookiin intala isaa ana irra caalchisee jaalatuus, kan anaan maluu miti.
[38] Namni, fannoo isaa fudhee baadhatee ana duukaa hin buune, kan anaan maluu miti.
[39] Namticha lubbuu isaa tiyfachuu barbaadu duraa baddi; kan anaaf jecha lubbuu isaa kannu ammoo, isii ni arkata” jedhe.
[40] Yesuus ammaas, “Namni isin simu ana simuu isaa ti, namni ana simuus isa ana erge simuu isaa ti.
[41] Namni, nabiyyii tokko nabiyyii tahuu isaa tiif jecha sime, ajrii nabiyyii tokkoo ni arkata; namni, nama qaceelaa tokko qaceelaa tahuu isaa tiif jecha simees, ajrii nama qaceelaa tokkoo ni arkata.
[42] Dhugumaan isinitti hima, eenyu illeen isaan xixiqqoo kannen keeysaa tokkoof, inni barattuu kiyya waan taheef jecha, bishaan qabbanaawaa dheenguma takka kan kanneef, zajaa isaa hin dhabu” jedhe.