[1] Guyyaa jaha booddee, Yesuus Phexiroosii fi Yaaqoob, ammaas Yohannis obboleeysa Yaaqoob if jala fudhatee ti, gaara dheeraa tokko irra kophaatti isaan baase.
[2] Kunoo ijuma isaanii duratti bifti isaa jijjiiramtee ti, fuulli isaa akka aduutti ibse, uffanni isaa tiis akka ifaatti addaatee ti walaqqise.
[3] Ammaas kunoo achumatti, Musee fi Eliyaas isaan wajjiin haasawaa ti isaanitti mullatan.
[4] Phexiroos Yesuusiin, “Yaa Gooftaa! As turuun nuuf hedduu dha gaarii dhaa; fedha kee yoo tahe asitti gojoo sadih, takka siif, takka Museef, takkaas Eliyaasiif niin ijaara” jedheeni.
[5] Oduma inni tana dubbachaa jiruu, kunoo duumeeysi nuura if keeysaa qabu tokko isaan hagooge. Sagaleen takkaas duumeeysa san keeysaa, “Kun Ilma kiyya kaniin jaaladhu, kaniin hedduu itti gammadees; isuma dhaggeeyfadhaa!” jette.
[6] Barattoonni hogguu tana dhagayan, birratanii ti adda isaanii tiin lafatti gombifaman.
[7] Yesuus ammoo isaanitti dhihaatee ti harkaan isaan qabee ti, “Ka'aa, humaa hin sodaatinaa!” isaaniin jedhe.
[8] Isaan hogguu ol ilaalan, Yesuus malee, nama biraa tokko illee hin agarre.
[9] Isaan gaara san irraa gadi bu'aa odoo jiranii Yesuus, “Hanga Ilmi Namaa du'aa kaafamutti, mullata agartan kana nam tokkotti illee hin himinaa!” jedhee ti barattoota isaa ajaje.
[10] Kana booddee barattoonni, “Eegasuu barsiisonni seeraa, maaliif dura Eliyaas dhufuu tu irra jira jedhu?” jedhanii ti isa gaafatan.
[11] Yesuus ammaas, “Eliyaas waan hundumaa bakkatti deebisuuf dhufuun isaa beekamaa dha.
[12] Ani ammoo, Eliyaasuu duruun dhufeen isiniin jedha; ummanni taanaan, isa tahuu isaa tuu hin beeyne; ammaas waanuma fedhan isa irratti hojjatan. Ilmi Namaa tiis akkasumatti harka isaanitti dararamuuf deema” isaaniin jedhe.
[13] Hogguus barattoonni, Yesuus jecha kana, Yohannis Cuuphaa laalchisuun akka dubbatetti hubatan.
[14] Isaan dannaba ummataa sanitti hogguu deebi'an, namtichi tokko Yesuusitti dhihaatee ti, isa duratti jilbiiffatee ti,
[15] “Yaa Gooftaa, ilma kiyyaaf rahamati, kunoo dhukkuba gaggabsee kuffisuun qabamee, hedduu dhibamaa ti jira; ammumaa amma ibidda keeysatti, ammaas bishaan keeysattiis kuffisa.
[16] Ani barattoota keetitti illee isa fidee tiin ture; isaan ammoo fayyisuu hin dandeenye” jedheeni.
[17] Yesuus deebisee, “Isin yaa amanti-dhablee fi dhaloota jallaa, hanga yoomittiin isin bira jiraadha? Ammaas hanga yoomittiin isiniif obsa? Gurbaa asuma natti fidaa!” jedheeni.
[18] Yesuus ruuhaa hamaa san ni oofe, inni niis gurbaa keeysaa ni bahe; gurbichi niis hogguusuma fayye.
[19] Barattoonni eegas booda kophaatti Yesuus bira dhufanii, “Nuti maaliif ruuhaa hamaa san baasuu dadhabne?” jedhanii ti gaafatan.
[20] Yesuus deebisee ti, “Amanti-qaliil tahuu keeysaniifi! Ani dhugumaan isinitti hima, amantii hanga firii zanaabii takka geeysu silaa qabaattanii, gaara kanaan, asii ka'ii tii achi hiiqi, yoo jettaniin, gaarri niis asii ka'ee achi ni hiiqa; wannummaan isiniif hin dandayamne takka illeen hin jiraattu.
[21] [Kan akkanaa kun kadhataa fi soomanaan malee, gonkumaa hin baafamu” jedheeni.]
[22] Barattoonni Galiilaa keeysatti Yesuus biratti hogguu walitti qabamani Yesuus, “Ilmi Namaa harka namootaatti dabarfamee ni kannama.
[23] Isaaniis isa ni ajjeesu, inni ammoo guyyaa sadeeysaa du'aa ni kaafama” isaaniin jedhe; jechi kuniis barattoota hedduu dha naasise.
[24] Yesuusii fi barattoonni isaa hogguu Qifirnaahom dhufan, warri gibira Beeytal Maqdas guuran Phexiroos bira dhufanii ti, “Barsiisaan keeysan gibira Beeytal Maqdas hin kafaluu?” jedhanii ti gaafatan.
[25] Phexiroos deebisee, “Lakkii ni baasaa” jedheeni. Hogguu Phexiroos mana dhufe, Yesuus Phexiroosiin, “Maal sitti fakkaata yaa Simoon? Mootoonni addunyaa dhaa qaraxa yookiin gibira eenyu irraa fudhatu? Namoota isaanii irraahi moo, warra ambaa irraa fudhatu?” jedhee ti gaafate.
[26] Phexiroos deebisee, “Warra ambaa ti irraa hi fudhatu” jennaan, Yesuus ammaas, “Eegasuu ilmaan isaanii hin gaafataman kaa!
[27] Haa tahuu, akkuma nuti gufuu isaanitti hin taaneef, gara garba bishaanii dhaqii, hokkoo kalluunaan qaban bishaan keeysatti darbii tii, kalluuna dura qabdu afaan isaa gargar banii, maallaqa hanga qarshii lamaa takka arkatta. Maallaqa san fuudhii tii gibira kiyyaa fi kee tiifiis isaanitti kanni!” jedheeni.