[1] Isaan Yerusaaleemitti hogguu dhihaatanii, Beetfaagee Gaara Ejersaa gahan booda, Yesuus barattoota lama ergee ti,
[2] “Ganda fuullee keeysan jiru san deemaa tii, akkuma achi geeysaniiniis, harree hidhamte takkaa fi ammaas nyagoo takkaas wajjiin agartuu; hiikaa tii naa fidaa!
[3] Namni yoo waa isiniin jedhe ammoo, ‘Gooftaa tu itti haajame, dafe tiis isaan ni deebisa’ jedhaa!” isaaniin jedhe.
[4] Kuniis wanni nabiyyichi jedhe akka raawwatamuuf tahe;
[5] Raajichi niis, “Intala Xiyoonitti himaa! Mootiin keeysan gadi if qabee, kunoo, inni harree irra, nyagoo harree irraas taa'ee ti siif dhufa” kan jedhuu dha.
[6] Barattoonni niis deemanii ti, akkuma Yesuus isaan ajaje san godhan.
[7] Harree fi nyagoo saniis waliin fidanii, huccuu isaanii tiis isaan irra kakkaayan; Yesuusiis irra taa'e.
[8] Ummata danuu san keeysaa harki caalaan, huccuu isaanii karaa irra afan; warri kaan ammoo dameelee baalaa qabdu muka irraa ciranii ti karaa irra ballisan.
[9] Ummanni danuun dura deemanii fi warri duukaa yaa'aniis, sagalee isaanii ol fuudhanii ti, “Hosaanaa Ilma Daawwidiif! Inni maqaa Gooytaa tiin dhufu galateeyfamaa dha; hosaanaa ol samii gubbatti” jedhan.
[10] Wayta inni Yerusaaleem seene, mandarichi ni rabbashame; namoonni niis, “Inni kun eenyu?” jedhan.
[11] Ummanni isaa wajjiin deemuus, “Kun nabiyyicha Yesuus, nama Naazireet kutaa Galiilaa ti” jedhanii ti deebisan.
[12] Yesuus Beeytal Maqdas ol seenee ti, warra Beeytal Maqdas keeysatti bitanii fi warra gurguran hundumaa gadi baase; gabatoota warra maallaqa sharafuu tii fi teeysuma warra himiimii gurguranii tiis kokombolchee ti,
[13] “‘Manni kiyya mana kadhataa jedhamee ti yaamama’ jedhamee barreeyfamee ti jira, isin ammoo holqa hattuu ti isa gootan” isaaniin jedhe.
[14] Warri jaamaanii fi warri naafni niis Beeytal Maqdas keeysatti isa bira dhufan; inni niis isaan ni fayyise.
[15] Luboonni warri angafoonninii fi barsiisonni seeraa, waan ajaa'ibaa kanneen inni gochaa turee fi ammaas joollee Beeytal Maqdas keeysatti sagalee isaanii ol fudhattee, “Hosaanaa Ilma Daawwidiif!” jedhan hogguu arkan ni aaran.
[16] As irratti isaan, “Waan jarri kanneen jechaa jiran dhageeysaa?” jedhaniin. Yesuusiis deebisee, “‘Eeyye, afaan daa'imman dhalattuu fi kanneen harma luugan irraa, hamdii illaa hin qabne baaftee ti jirta’ kan jedhu gonkumaa hin dubbifnee?” isaaniin jedhe.
[17] Tana booddee Yesuus isaan dhiisee, mandaricha keeysaa bahee, Bitaaniyaa dhaqee ti achi bule.
[18] Yesuus bariisaa ganama Yerusaaleemitti deebi'aa odoo jiruu ni beelawe.
[19] Muka habruu tokko karaa qarqaratti arkee bira dheeynaan, baala malee humaa ti irraa dhabe. Akkasitti muka saniin, “Kana booddee bara baraaf gonkumaa firiin si irraa hin arkamin!” jedheeni; habruun saniis, hogguusuma goggooyde.
[20] Barattoonni tana hogguu arkan ajaa'ibanii ti, “Akkamitti mukni habruu kun hogguusuma goggoge?” jedhan.
[21] Hogguusi Yesuus, “Ani dhugumaan isiniin jedha, amantii qabaattanii yoo gonkumaa mamuus baattan, waanuma muka habruu irratti godhame kana qofa hin gootan; ammoo gaaruma kanaanuu, ‘Ka'ii tii bahar keeysatti darbami!’ yoo jettan illee numa godhama jedhee ti deebiseefi.
[22] Amantuma qabaannaan, waanuma kadhataan gaafattan hundumaa ni fudhattu” isaaniin jedhe.
[23] Yesuus Beeytal Maqdas seenee odoo barsiisuu irra jiruu, luboonni angafoonninii fi manguddoon ummataa, isa bira dhufanii, “Amrii tamiin waan kanneen hundumaa goota? Amrii saniis eenyuu tu siif kanne?” jedhaniin.
[24] As irratti Yesuus, “Aniis ammaas waan takkaan isin gaafadha, isiniis yoo jawaaba isaa anaatti himtan, aniis amrii tamiin waan kanneen hundumaa akkaan godhu isinittiin hima.
[25] Cuuphaan Yohannis cuuphe eeysaa ajajamte? Rabbi biraahii moo, nama biraa ajajamte?” isaaniin jedhe. Isaaniis waliin dudubbatanii ti, “Rabbi biraahi yoo jenne, ‘Eegasuu maaliif dubbii isaa hin amaninaa?’ nuun jedha.
[26] ‘Nama biraahi’ akka hin jenne, ummanni danuun Yohannis nabiyyii tahuu isaa waan fudhataniif jecha, isaan sodaanna” jedhan.
[27] Kanaaf, “Nuti hin beeynu” jedhanii ti Yesuusiif deebisan; Yesuusiis, “Eegasuu aniis waan kanneen hundumaa amrii tamiin akkaan godhu isinitti hin himu” isaaniin jedhe.
[28] Yesuus ammaas, “Maal isinitti fakkaata? Namticha ilmaan lama qabu tokkoo tu ture; inni niis ilma isaa tokko bira dhaqee ti, ‘Yaa ilma koo, arra mee deemii tii oyruu inabaa keeysa hojjadhu!’ jedheeni.
[29] Ilmi isaa sun ammoo, ‘Ani hin dhaqu’ jedhee ti deebiseef; eegas booda ammoo sheenawee ti dhaqe.
[30] Namtichi eegas ammaas ilma isaa kaan bira dhaqee ti akkasuma jedheeni; inni ammoo, ‘Tole marhabbaa yaa abbaa koo!’ jedheeni, garuu hin dheeyne.
[31] Isaan lamaan san keeysaa, kam tu fedha abbaa isaa godhe?” jedheeni; jarri ammoo, “Kan duraa sani” jedhanii ti deebisan. Hogguus Yesuus, “Ani dhugumaan isinitti hima, warri qaraxxuunii fi ejjitoonni, isin dura Mootummaa Rabbii ni seenu.
[32] Hogguu Yohannis Cuuphaan dhufee, karaa qaceelummaa isin barsiisu, isin isa hin amanne; qaraxxoonninii fi ejjitoonni ammoo isa ni amanan. Isin erguma tana agartan booddee illee, toowbattanii isa hin amanne” isaaniin jedhe.
[33] Yesuus itti furee, “Fakkeenya biraa tokko dhagayaa! Abbaa lafaa kan mukkeen inabaa hedduu lafa isaa irra dhaabe tokkoo tu ture. Dallaya dhagaa naanneeysee ti itti ijaaree, boolla firii inabaa keeysatti cuunfaniis, dallayuma keeysatti qotee, siree irra taa'anii eeganiiniis itti ijaare. Warra hojii inabaa beekanitti kireeysee ti, imaltuu takka deeme.
[34] Wayti firiin inabaa itti bilchaatu geenyaan, firii mukkeen inabichaa irraa qooda isaa fudhachuuf jecha, hojjatoota isaa warra inabicha kireeyfatanitti erge.
[35] Warri inaba kireeyfatan ammoo, hojjatoota san qaqqabanii, tokko tumanii ti, kaan ajjeesan, isa kaaniis ammaas dhagaa dhaan rukutan.
[36] Abbaan inabaa ammaas hojjatoota biraa, kanneen warra duraa irra hodduu tahan isaanitti erge; isaan kanaas akkuma warra duraa san godhan.
[37] Namtichi hundumaa booddee, ‘Ilma kiyya ni kabaju’ jedhee ti, ilma isaa isaanitti erge.
[38] Warri inaba kireeyfataniis, ilma isaa san hogguu arkan, ‘Isa kana kan abbaa inabaa dhaaluu, koottaa ni ajjeefnaa, dhaalli niis keenya taha!’ waliin jedhan.
[39] Jarri akkasitti isa fuudhanii, oyruu inabaa keeysaa gadi isa baasanii ti ajjeesan.
[40] Wayta abbaan inabaa dhufu, warra kireeyfatan san akkam godhinna laata?” isaaniin jedhe.
[41] Isaan ammoo deebisanii, “Warra hoongoo san, du'a hiraariin isaan karraqee ti, inaba saniis namoota biraa warra kireeyfatanii, firii isaa irraa qooda isaa, wayta oomishaa kannuufitti dabarsee ti kannata” jedhan.
[42] As irratti Yesuus, “Isin Barreeyfama Qulqulluu keeysaa, ‘Dhagichi, najjaaroonni tuffatan, inni kan dhagaa mataa utubaa manaa qaceelchu tahe; kun dalgaa Gooytaa ti, ija teenya durattiis waanuma baasaa ti’ kan jedhu takkaa hin dubbifnee?
[43] “Eegasuu haaluma kanatti, Mootummaan Rabbii isin irraa fudhatamtee, ummata firii isii godhatutti akka kannamtu isinittiin hima.
[44] [Abbichi dhagaa kana irratti kufu ni caccapha, kan dhagichi irratti kufu ammoo ni daakama]” isaaniin jedhe.
[45] Luboonni warri angafoonninii fi Fariisonni, fakkiilee Yesuus dubbate kanneen hogguu dhagayan, akka inni waa'ee isaanii tiif jecha dubbate ni hubatan.
[46] As irratti, isa qabuuf yaalan, ammoo ummanni Yesuus nabiyyitti waan fudhateef jecha, isa qabuu ni sodaatan.