[1] Yesuus ammaas, “Mootummaan samii dhaa akka nama araddaa oyruu qabuu tokkoo ti fakkaatti; namtichi niis hojjatoota mo'oyaan oyruu inabaa isaa hojjachiisu barbaacha ganama bariisaan ka'ee ti gadi bahe.
[2] Inni gatii mo'oya guyyaatti kannuuf hojjatoota wajjiin eega walii gale booddee, gara oyruu inabaa isaatti isaan erge.
[3] Ammaas toora za'aa sagalii waaree dura achi baanaan, warra biraa kanneen hojii malee magaalaa keeysa dhadhaabbatan arke.
[4] Jara saniiniis, ‘Isiniis gara oyruu inabaa dhaqaa, aniis waan haqaa isiniifiin kanna’ jedheeni.
[5] Jarri niis ni dhaqan; ammaas toora za'aa kudha-lamaa waaree, ammaas toora za'aa sadihii tiis waaree booda gadi bahee ti akkasuma godhe.
[6] Kunoo ammaas toora za'aa shaniittiis asrii gadi baanaan, warra biraatiis odoo dhadhaabbatanii ti arke. Isaaniiniis, ‘Maaliif guyyaa guutuu hojii malee addana dhadhaabbattu?’ jedheeni.
[7] Isaaniis deebisanii, ‘Namuma tokko kan mo'oyaan nu hojjachiisu waan dhabneefi’ jedhaniin; inni ammoo, ‘Isiniis akkasumatti gara oyruu inabaa dhaqaa!’ jedheeni.
[8] “Hogguu aduun dhiite, abbaan inabaa kaabboo isaa tiin, ‘Hojjatoota yaamii tii, warra booda dhufan irraa jalqabii hanga warra duraatti, mo'oya isaanii kakkafaliif!’ jedheeni.
[9] Warri toora za'aa shanii asrii hojii jalqaban dhufanii ti, adduma addaan mo'oya guyyaa tokkoo fudhatan.
[10] Warri duraa hogguu dhihaatan, horiin caalaan waan isaaniif kannamu itti fakkaate; isaaniis ammoo matuma matatti, mo'oyuma guyyaa tokkoo ti fudhatan.
[11] Akkuma fudhataniin abbaa inabaa irratti guunguman.
[12] ‘Warri booddee kun za'uma takka qofa hojjatan, ati ammoo, nu warra ba'aa hojichaa tii fi amajjii guyyaa dhaa baadhateen wajji wal isaan qixxeeysite’ isaan jedhan.
[13] Namtichi ammoo jara kanneen keeysaa tokkoon, ‘Yaa namtichana! Ani waa takka illee sitti hin balleeysine bar; ati mo'oya guyyaatti hojjachuuf anaa wajjiin wal hin taanee?
[14] Amma waan haqa kee tahe fudhadhuu tii deemi! Ani taanaan, namticha boodaa kanaafiis hammumaan siif kanne takkaan isaafiis kannuun fedha.
[15] Ani horii kiyya akkaan fedhe godhuuf mirga itti hin qabuu? Yookiin arjummaa tiyyatti hinaaftaa?’ jedheeni.
[16] Akkuma kanatti warri booddee dhaa dura, warri duraa tiis booddee ni tahu” jedhe.
[17] Yesuus Yerusaaleem dhaquuf ol deemaa odoo jiruu, karaa irratti barattoota kudha lamaan kophaatti achi baasetti,
[18] “Kunoo, gara Yerusaaleem ol bahuu keenya! Ilmi Namaa tiis, luboota warra angafootaatti, barsiisota seeraatti tiis dabarfamee ni kannama. Isaaniis du'a itti ni muru.
[19] Qomoo Israa'el warra hin tahinittiis kannamee, itti ni hanjamama, ni garafamaasi, ammaas ni fannifamaasi, guyyaa sadeeysaa dhaa ammaas du'aa ni kafama” isaaniin jedhe.
[20] Eegas booda haati ilmaan Zabdewos, ilmaan isii wajjiin Yesuus bira dhuftee, waa isa kadhachuuf isa duratti jilbiiffatte.
[21] Inni ammoo, “Maal barbaadda?” jedhee ti isii gaafate. Isiin deebiftee, “Ilmaan kiyya lamaan kun, mootummaa tee keeysatti tokko mirga kee tiin, kaaniis bitaa kee tiin akka taa'an naaf kanniif!” isaan jette.
[22] Yesuus ammoo deebisee, “Waan kadhattan hin beeytan! Isin, geebicha hiraar kaniin ani dhuguuf deemu, dhuguu ni dandeeysuu?” isaaniin jennaan, isaaniis, “Eeyye, ni dandeenya” jedhaniin.
[23] Inni niis deebisee, “Geeba kiyya isiniis dhuguuf teeysu, mirga kiyyaan yookiin bitaa kiyyaan taa'uu kannuun ammoo tiyyaa miti; bakkeen kanneen, kan warra Abbaa kiyyaan qopheeyfamee tiif tahu” isaaniin jedhe.
[24] Barattoonni warri kaan kurnan hogguu oduu tana dhagayan, obboleeyyan lamaan sanitti ni aaran.
[25] Yesuus ammoo ifitti isaan yaamee, “Warri saboota addunyaa tanaa bulchan, gooftummaa dhaan akka isaan cunqursan isinuu ni beeytu; hooggantoonni gurguddoon isaanii tiis amrii qaban isaan irratti agarsiisu.
[26] Isin jiddutti ammoo akkas tahuu hin qabu; isin keeysaa guddaa tahuu kan barbaadu, kaadamaa keeysan tahuu tu isa irra jira.
[27] Isin keeysaa mataa duraa tahuu kan barbaadu, gabricha keeysan tahuu tu isa irra jira.
[28] Akkanumatti, Ilmi Namaa tiis kaadamuufi malee, kaadamamuuf hin dhufne; lubbuu isaa tiis, gumaa namoota hedduu godhee kannuuf dhufe” jedheeni.
[29] Akkuma isaan Yerikoo dhaa bahaniin, ummanni dilli tokko Yesuus duukaa bu'an.
[30] Kunoo, namoonni jaamaan lama karaa cinaa tattaa'u turan; isaaniis Yesuus achiin dabraa akka jiru dhageenyaan, “Gooftaa, yaa Ilma Daawwid nu maari!” jechaa ti iyyan.
[31] Ummanni sun cal isaan jechisiisuuf isaan oofan. Isaan ammoo daranuu, “Gooftaa, yaa Ilma Daawwid nu maari!” jedhanii ti iyyan.
[32] Hogguus Yesuus dhaabbatee ti isaan yaamee, “Maal akkaan isiniif godhu barbaaddu?” isaaniin jedhe.
[33] Isaaniis, “Yaa Gooftaa, nuti arkuu dha barbaanna” jedhanii ti deebisaniifi.
[34] Yesuus, isaaniif nahee ija isaanii qaqqabnaan, hogguusuma agartuun isaaniif banamnaan, isuma duukaa dha bu'an.