[1] Yesuus dubbii kanneen hundumaa eega raawwate booddee, barattoota isaa tiin akkana jedhe,
[2] “Guyyaa lama booddee Ayyaanni Bira Dabruu akka dhufu ni beeytu, Ilmi Namaa tiis akka fannifamuuf dabarfamee ti kannama” jedheeni.
[3] Eegana luboonni warri angafoonninii fi manguddoonni ummataa, galma guddaa Qayyaafaa, kan angafa lubootaa turetti walitti qabaman.
[4] Achitti akkaataa Yesuus heelaa dhaan qabanii ajjeesan irratti marihatan.
[5] Ammoo, “Ummata jiddutti rabshaan akka hin kaaneef, ayyaana irratti tana gochuun hin tahu” jedhan.
[6] Yesuus Bitaaniyaa mana Simoon, namticha baras dhawee san keeysa odoo jiruu,
[7] dubartiin takka axira hedduu qaalii tahe, bilqaaxatti qabattee ti Yesuus bira geeysee, akkuma inni maadditti taa'ee jirutti, mataa isaa irratti dhangalaafte.
[8] Barattoonni ammoo hogguu tana arkan dallananii ti, “Istiraafni kuni maaliifi?
[9] Axirri kun silaa horii guddatti gurguramee, miskiinaaf kannamuu ni dandaya ture” jedhan.
[10] Yesuus ammoo tana hubachuu dhaan, “Dubartii tana maaliif cinqitu? Isiin waan gaarii takka anaaf goote.
[11] Miskiinota wayta hundumaa if biraa qabdu, ana ammoo wayta hundumaa if biraa na hin qabdan.
[12] Isiin axira kana qaama kiyya irratti dhangalaasuun isii, awwaalchaaf na qopheeysuuf jecha goote.
[13] Ani dhugumaan isinitti hima, guutummaa addunyaa irratti, bakkuma Wangeelli itti lallabametti, wanti isiin goote tuniis seenaa isii tiif jecha ni himama” isaaniin jedhe.
[14] Hogguus kudha lamaan keeysaa tokko kan ture, Yihudaa nama Keriyot kan jedhamu, gara luboota warra angafootaa dhaqee ti,
[15] “Isa dabarsee yoon isinitti kanne, maal anaaf kannitu?” isaaniin jedhe; isaaniis qarshii soddoma lakkaawaniif.
[16] Yihudaaniis waytuma san irraa jalqabee, dabarsee isa kannuuf, carraa barbaadutti bobbahe.
[17] Guyyaa jalqabaa Ayyaana Qiinxaa Maattiraa ti irratti, barattoonni Yesuus bira dhufanii ti, “Hoolaa Bira Dabruu akka nyaattuuf, eeysatti akka siif qopheeysinu barbaadda?” jedhaniin.
[18] Inni niis deebisee ti, “Magaalaa kana seenaa tii gara namticha tokkoo dhaqaa, namtichaaniis, ‘Za'aan tiyya geeysee ti jirti, ani barattoota kiyyaa wajjiin, Ayyaana Bira Dabruu mana kee tittiin godha, siin jedha barsiisaan’ jedhaan!” isaaniin jedhe.
[19] Hogguus barattoonni niis, akkuma Yesuus isaan ajaje godhanii ti, Hiraata Bira Dabruu tiis ni qopheeysan.
[20] Wayta galgalaa, barattoota isaa kudha lamaanii wajjiin maadditti taa'e.
[21] Oduma nyaachaa jiranii ti Yesuus, “Dhugumaan isiniin jedha, isin keeysaa tokko dabarsee ti na kannuuf taa'a” jedhe.
[22] Isaaniis hedduu nahanii ti, tokko tokkoon faraqatti isaan, “Ana miti gaa Gooftaa! Wayi anaa?” jechuu jalqaban.
[23] Inni ammoo deebisee, “Isa kan anaa wajjiin qorii harka kaayee tu, dabarsee na kannuuf deema” jedheeni.
[24] “Ilmi Namaa illeen, akkuma isa laalchisuun barreeyfame sanitti du'uuf deema; ammoo namticha Ilmi Namaa harka isaa tiin dabarfamee kannamuu saniif magan! Namtichi sun odoo dhalachuu baatee irra wayyaaf ture” jedhe.
[25] Yihudaan kan dabarsee isa kannuuf deemuus deebisee, “Anaa namni sun, yaa barsiisaa?” jedheeni; Yesuus deebisee, “Akkuma atuu jette” isaan jedhe.
[26] Ammaas oduma nyaata irra jiranii ti, Yesuus biddeena fuudhee, eeybisee kukkutee, barattoota isaatti laatee ti, “Fudhadhaa nyaadhaa, kun jasada kiyyaa!” jedheeni.
[27] Geebaas fuudhee, eega galata galche booddee, isaaniif hogguu kannu, “Hundi keeysanuu kana keeysaa dhugaa!
[28] Kun dhiiga kiyya kan irbuu, kan oomfii dilii namoota hedduu tiif jecha dhangala'ee dha.
[29] Amma irraa jalqabee, hanga guyyaa gaafaan ani mootummaa Abbaa kiyyaa keeysatti, haaraya irraa isinii wajjiin dhugutti, deebi'ee firii inabaa irraa akkaan hin dhuyneen isinitti hima” jedheeni.
[30] Faarfannaa galataa eega faarfatan booda, yaa'anii ti Gaara Ejersaa irratti ol bahan.
[31] Eegas booda Yesuus, “Halkanuma edanaa kana, hundi keeysanuu ana irraa dheeysuuf teeysu, ‘Ani tiysituu niin dhawa, hoolonni bobbaa sanaa tiis ni bittimfamu’ jedhamee barreeyfamee ti jira.
[32] Eegaan du'aa kaafame booda ammoo, isin duraan gara Galiilaa deema” isaaniin jedhe.
[33] Phexiroos ammoo deebisee, “Isaan hundinuu yoo si irraa dheeysan illee, ani gonkumaa si irraa hin dheeysu” jedheeni.
[34] Yesuus hogguus, “Dhugumaan siin jedha, edanuma lukkuun odoo hin iyyin dura, ati hoggu sadih na ganta” isaan jedhe.
[35] Phexiroos ammaas, “Si wajjiin du'uun illeen yoo na barbaachise, ani gonkumaa si hin ganu” jedheeni; barattoonni hundi niis akkasuma jedhan.
[36] Yesuus hogguus barattoota isaa tiin wajjiin, bakka Getesemaanee jedhamtu takka dhaqee ti, barattoota isaa tiin, “Hangaan ani achi deemee kadhata godhuu, asuma tattaa'aa!” jedheeni.
[37] Phexiroosii fi ilmaan Zabdewos lamaan ifiin wajji fuudhee deemee ti, gadduu fi cinqamuu jalqabe.
[38] Hogguus, “Lubbuun tiyya hedduu dha gaddite, hanga du'aatti illee! Isin asitti hafaa tii, anaa wajjiiniis dammaqaa eegaa!” isaaniin jedhe.
[39] Ammaas waa xiqqo isaan irraa achi hiiqee ti, adda isaa tiin lafatti gombifamee, “Yaa Abbaa! Yoo waan dandayamu taate, geebni hiraar kun, ana irra haa dabruu; haa tahu malee, akka fedha kiyyaa hin tahinii, ammoo akkuma fedha kee tii haa tahu” jedhee ti kadhate.
[40] Ammaas barattoota bira dhufnaan, isaanii hirriibatti jiru arkee ti; Phexiroosiin, “Jarana, isin za'uma takkaaf illee, anaa wajjiin dammaquu hin dandeenyee?
[41] Fitinatti akka hin galleef dammaqaa tii kadhadhaa! Ruuhaan illeen qophee dha, foon namaa ammoo dadhabaa dha” jedheeni.
[42] Marraa lammeeysaa tiif ammaas achi hiiqee ti kadhate, “Yaa Abbaa! Geebni hiraar kun, ani isa dhugu malee, dabruu kan hin dandeenye yoo tahe, fedhummaan tee haa raawwatamtu” jedhe.
[43] Ammaas deebi'ee dhufnaan, hirribumatti isaani jiru arke; ijji isaanii tiis itti ulfaattee ti turte.
[44] Akkasumatti ammaas isaan dhiisee ti achi hiiqee, marraa sadeeysaaf, kadhatuma duraa san irra deebi'ee ti kadhate.
[45] Eegas gara barattootaa dhufee ti, “Amma illee raftanii boqochumatti jirtuu? Kunoo, waytiin geeysee ti jirti, Ilmi Namaa tiis, harka dilaawootaatti kannamuu isaa ti.
[46] Ka'aa tii haa yaanuu! Dabarsee na kannaan koo kunoo, dhufa irra jira” isaaniin jedhe.
[47] Oduma Yesuus tana dubbachaa jiruu, kunoo Yihudaan, warra kudha lamaan keeysaa tokko kan ture san tu dhufe; isaa wajjiis namoota hedduu, kanneen habalee fi jirma guurratanii, luboota angafootaa fi manguddoota biyyaa biraa ergamanii tu ture.
[48] Inni dabarsee Yesuus kannuuf deemu sun milikkitaaf, “Inniniin ani dhungadhu isaa tii, qabaa!” jaraan jedhee ti ture.
[49] Yihudaan dafee Yesuusitti dhufee ti, “Akkam jirta barsiisaa koo!” jedhee ti isa dhudhungate.
[50] Yesuus ammoo, “Saahiba koo, maaliif dhufte?” jedheeni; hogguus jarri as bahanii, harkaan Yesuus qacam godhanii ti qaban.
[51] Kunoo ammaas, warra Yesuusii wajjiin turan keeysaa tokko habalee isaa luqqifatee ti, gabricha angafa lubootaa rukutee, gurra isaa irraa mogole.
[52] Hogguus Yesuus, “Habalee tee galkaa isitti deebisi; warri habalee luqqifatan hundinuu habaleen dhabamu.
[53] Ani Abbaa kiyyatti kaniin iyyachuu hin dandeenye sitti fakkaatee? Inni ammuma maleeykoota, cibirraa kudha lama irra caalan illee anaaf ni erga turee bar!
[54] Akkas taanaan ammoo, wanni Barreeyfamni Qulqulluun akkas tahuu tu irra jira jedhanii dubbatan san, silaa akkamitti raawwatamuu turan?” jedheeni.
[55] Waytuma san Yesuus ummata danuu saniin, “Akka warra shiftaa qabuuf bahanitti, ana qabuuf habalee fi jirmaan yaatanii? Guyyuma guyyaan Beeytal Maqdas keeysa taa'ee barsiisaa tiin ture, isiniis ana hin qabne.
[56] Kun hundinuu tahuu isaa, barreeyfamni nabiyyootaa akka raawwatamaniif godhame” jedhe; hogguus barattoonni hundinuu isa dhiisanii ti irraa dheeysan.
[57] Eegas booda warri Yesuus qaban sun, bakka barsiisonni seeraa tii fi manguddoon, walitti qabamanii jiran, Qayyaafaa angafa lubootaa bira isa geeysan.
[58] Phexiroos ammoo hanga abaada mana angafa lubootaatti, irraa fagaatee ti Yesuus duukaa deeme; keeysa seenee tiis, waan tahuuf deemu laaluuf jecha waardiyyoota wajjiini taa'e.
[59] Luboonni warri angafoonninii fi guutummaan yaa'ii tiis, Yesuus ajjeesuuf jecha, ragaa dharaa isa irratti barbaadanii ti turan.
[60] Namoonni dharaan raga bahan hedduun dhihaatan illee, ammoo waan qabatamaa tahe hin arkanne. Gara boodaatti ammoo namoonni lama dhufanii ti,
[61] “Namtichi kun, ‘Ani Beeytal Maqdas Rabbii jiiysee, guyyaa sadih keeysatti deebisee ijaaruu niin dandaya jedhe’” jedhan.
[62] As irratti angafni lubootaa ka'ee, “Waan jarri kun si irratti ragaa bahan kanaaf jawaaba tokko illee hin qabduu?” jedheeni.
[63] Yesuus ammoo caluma jalaa jedhe. Angafni lubootaa ammaas, “Hadaraa Rabbii Jiraataa, ati Masiihicha, Ilma Rabbii yoo taate nutti himi!” jedheeni.
[64] Yesuus deebisee, “Akkuma atuu jettee dha; haa tahuu malee, Ilmi Namaa ammaan booda, harka mirgaa humna-qabeeysaa taa'ee, duumeeysa samii irraa tiin odoo dhufuu, arkuuf akka jiraattaniin isinitti hima” jedheeni.
[65] Hogguus angafni lubootaa aaree, uffata if irratti tarsaasee, “Inni kunoo Rabbi arrabsee ti jiraa, kanaa achi ragaa maaltu nu barbaachisa ree? Rabbi arrabsuu isaa, isinummaa nuu amma dhageeysanii ti jirtu.
[66] Firdiin teeysan maali?” jedheeni. Isaaniis, “Ajjeefamuu tu isa irra jira” jedhanii ti deebisaniifi.
[67] Hogguus fuula isaa irratti tufan, ittiiis ni hanjaman; warri kaaniis isa kakkabalanii ti,
[68] “Yaa Kiristoos, eenyuu tu Si dhawe? Mee nabiyyummaa tee tiin nutti himi!” jedhaniin.
[69] Hogguus Phexiroos, ala abaada keeysa taa'a ture; kaadamtuun takka isa bira dhuftee ti, “Atiis Yesuus nama Galiilaa sanii wajjiin turte!” jetteeni.
[70] Inni ammoo, isaanuma hunduma duratti, “Waanuma ati jettu tanaa huu, ani hin beeku” jedhee ti kaade.
[71] Hogguu inni barandaa karraa irratti gadi bahe, kaadamtuun biraa takka ammaas isa agartee ti, warra achi dhadhaabbachaa jiraniin, “Namtichi kun Yesuus nama Naazireet sanii wajjiin ture” jetteeni.
[72] Phexiroos ammaas, “Namticha kana ani hin beeku” jedhee ti kakate.
[73] Waa xiqqo booddee, warri achi dhadhaabbatan ol dhufanii ti Phexiroosiin, “Ati dhugumaan isaan keeysaa tokko, akkaataan ati itti haasoytuu huu, si irratti beeysisa” jedhaniin.
[74] Hogguus inni ammaas, “Namticha kanaa huu ani hin beeku” jedhee ti if abaaruu fi kakachutti ka'e; hogguma san lukkuun iyyite.
[75] Phexiroosiis hogguus jecha Yesuus, “Lukkuun odoo hin iyyin dura, ati hoggu sadih na kaadda” isaan jedhee ture san yaadatee ti; achi irraa gadi bahee nyaq-nyaq jedhee ti booye!