[1] Yesuus ummata danuu hogguu arke, roga gaaraa gubbatti ol bahee ti gadi taa'e. Barattoonni isaa tiis gara isaatti walitti qabaman.
[2] Inni niis akkana jechaa ti isaan barsiisuu jalqabe.
[3] “Ruuhaan miskiina warri tahan eeybifamoo dha, mootummaan samii dhaa tan isaanii ti.
[4] Warri garaan booyan eeybifamoo dha, isaan ni sabbarsiifamu.
[5] Warri ija-laafoon eeybifamoo dha, isaan addunyaa dhaa ni dhaalu.
[6] Warri waan qaceelaaf beelawanii dheebotaniif eeybifamoo dha, isaan quufuuf taa'u.
[7] Warri namaaf rahamata qaban eeybifamoo dha, isaan rahamata ni arkatu.
[8] Warri qalbiin keeysi xaliilaa eeybifamoo dha, isaan Rabbi ni arku.
[9] Warri araara nagayaa buusan eeybifamoo dha, isaan joollee Rabbii ti jedhamu.
[10] Warri qaceelummaa Rabbii tiif jecha reebaman eeybifamoo dha, mootummaan samii tan isaanii ti.
[11] “Anaaf jecha wayta namoonni isin arrabsanii, isiniis arihatan, kijibaaniis waan hamaa hundumaa isin irrattiis dubbatan, isin eeybifamoo dha!
[12] Isaan nabiyyoota warra isin duraa tiis akkasumatti reebaa turan; eegasuu gammadaa tii ililchaa, samii irrattiis sawaabni keeysan guddaa dha taha” isaaniin jedhe.
[13] Yesuus itti furuu dhaan, “Isin soogidda lafaa ti, soogiddi ammoo dhama isaa yoo if keeysaa dhabe, maaliin deebi'ee soogiddaawa ree? Kanaa achi darbamee namoonni miilaan irra deemuuf malee, faaydaa biraa hin qabu.
[14] Isin ifa addunyaa irraa ti; mandarri tulluu gubbaa irra jiru, dhokachuu hin dandayu.
[15] Nam tokko illeen ibsaa qabsiisee taguuga jala hin kaahu, madabaa ibsaa irra kaaya malee; ibsaaniis warra mana keeysa jiran hundumaaf ni ibsa.
[16] Namoonni hojii keeysan gaarii arkanii, Abbaa keeysan isa samii irraa tiif ulfina akka kannaniif, ifni keeysan akkuma kanatti namoota duratti haa ifu!” jedheeni.
[17] Yesuus ammaas itti fufee, “Seeraa fi barsiisa nabiyyootaa diiguuf waaniin dhufe isinitti hin fakkaatin, ani isaan raawwachuufiin dhufe malee, diiguuf hin dhufne.
[18] Ani dhugumaan isinitti hima, hanga samii fi lafti dhabamanitti seericha keeysaa qubeen xiqqoon takka yookiin qafxiin xiqqoon qalimaa takka illeenuu, odoo wanti hundinuu hin raawwatamin hin badan.
[19] Nam tokko illeen yoo eemaroota hundumaa irra xiqqaatan keeysaa tokko diigee, namoonni biraa tiis, akkas akka godhan barsiisu, mootummaa samii keeysatti kan hundumaa irra xiqqaatu jedhama; namni eemaroota kanneen eegee barsiisu ammoo, mootummaa samii keeysatti guddaa dha jedhama.
[20] Ani isinittiin hima, qaceelummaan keeysan qaceelummaa warra barsiisota seeraa tii fi Fariisotaa irra caaluu yoo baate, gonkumaa mootummaa samii dhaa hin seentan” isaaniin jedhe.
[21] Yesuus itti furee, “‘Hin ajjeesin! Nama nama ajjeese firdii tu isa eeggata’ jedhamee warra duritti akka himame dhageeysan.
[22] Ani ammoo isinittiin hima, eenyu illeen obboleeysa isaatti yoo aare, firdii tu isa eeggata; ammaas obboleeysa isaa tiin ‘Gowwaa’ kan jedhe yaa'ii ol'aanaa biyyaa duratti firdii itti godhama; obboleeysa isaa tiin ‘Faayda-malii’ yoo jedhe, ibidda jahannam tu firdii itti godhama.
[23] “Kannaa aarsaa dhiheeysuuf bakka aarsaatti yoo fidde, bakkuma sanattiis akka obboleeysi kee sitti muufate yoo yaadatte,
[24] kannaa aarsaa tee achuma bakka aarsaa duratti dhiisii tii deemii, obboleeysa kee dura araarfadhu; achiin booddee deebi'ii kannaa aarsaa tee dhiheeysi!
[25] “Nama si kasasee gara mana firdiitti wajjiin deemaa jirtuun wajji, dafii tii karuma irratti wal tahi; yookaan namtichi si kasase sun abbaa firditti si kanna, abbaan firdii tiis dabarsee ti, waardiyyaa mana hidhaatti si kanna, mana hidhaattiis ni darbamta.
[26] Dhugumaan sitti hima, waan si irra jiru hundumaa, hanga saantiima dhumaatti kafaltee hanga fixxutti, gonkumaa achii hin baatu” jedhe.
[27] Yesuus, “‘Hin ejjin! Zinaa hin godhin!’ jedhamee himamuu dhageeysan.
[28] Ani ammoo isinittiin hima, namni ija kajeellaa tiin dhalaa takka laale, qalbii isaa keeysatti duruun akka isiin wajjiin zinaa godheen isinitti hima.
[29] Ijji tee tan mirgaa akka dilii hojjattu yoo si goote, isii if keeysaa baasii tii darbi; guutummaan qaama kee tii jahannamitti darbamuu mannaa, dhagna qaama kee tii keeysaa takka dhabuu tu siif irra wayyaa dha.
[30] Harki kee kan mirgaa akka dilii hojjattu yoo si godhe, isa if irraa murii tii darbi; guutummaan qaama kee tii jahannamitti galuu mannaa, dhagna qaama kee tii keeysaa tokko dhabuu tu siif irra wayyaa dha” jedhe.
[31] Yesuus ammaas itti furee, “‘Namni niitii isaa hiiku, xalayaa hiikkaa tan ittiin isii hiiku haa kannuufii’ jedhamee ti jira.
[32] Ani ammoo isinittiin hima, yoo isiin ejjite malee, namni niitii isaa hiiku ejjituu dha isii godha; namni dhalaa hiikamte fuudhuus zina godha” jedhe.
[33] Yesuus, “‘Wa'ada kee hin caphsin! Qodhaa Gooytaaf kakattees bakkaan gahi!’ jedhamee warra duritti akka himame dhageeysan.
[34] Ani ammoo isinittiin hima, inumaa tuu hin kakatinaa! Samiiniis hin kakatinaa, isiin arshii Rabbii ti.
[35] Lafaaniis hin kakatinaa, isiiniis ejjata miila isaa ti; Yerusaaleemiiniis hin kakatinaa, isiiniis magaalaa mooticha guddichaa ti.
[36] Mataa kee tiiniis hin kakatin, ati kan rifeensa tokko addeeysuus yookiin gurraachomsuus hin dandeenye.
[37] Dubbiin teeysan eeyyeen, eeyye haa taatu, mitiiniis miti haa taatu! Wanni kan irraa hafe, isa hamaa irraa dhufa” jedhe.
[38] Yesuus itti furuu dhaan, “‘Bakka ijaa, ijuma; bakka ilkaanii tiis ilkaanuma haa kannamu!’ akka jedhame dhageeysan.
[39] Ani ammoo isinittiin hima, nama hamaa dhaan hin morkinaa! Ammoo namticha mallaa tee tan mirgaa si kabaleeef, ammaas tan gara kaanii tiis garagalchiif!
[40] Namtichi tokko si kasasee, qamisa kee fudhachuu yoo barbaade, kootuma kee tuu dhiisiif.
[41] Namticha kiilo metrii takka akka deemtuuf si dirqeef, kiilo metrii lamaa huu isaa wajjiin deemi!
[42] Nama si kadhatuuf kanni, nama waa si irraa liqeeyfachuu barbaaduttiis duyda itti hin galin!” jedhe.
[43] Yesuus ammaas, “‘Fira kee jaaladhuu, adawwii tee jibbi!’ akka jedhame dhageeysan.
[44] Ani ammoo isinittiin hima, Abbaa keeysan kan samii irraa tiif joollee akka taataniif, adawwoota keeysan jaaladhaa, warra isin arihataniifiis kadhadhaa!
[45] Abbaan keeysan kunoo aduu isaa warra hamoo fi warra gaggaariifiis ni baasa, rooba isaa tiis warra qaceelotaa fi warra hamoofiis ni roobsa.
[46] Warruma isin jaalatan qofa yoo jaalattan, zajaa maali qabdu ree? Warri gibira guuru illeen akkana numa godhuu mitii ree?
[47] Obboleeyyanuma keeysan qofa, waara nagaya gaafatu yoo taatan, warra kaan caalaa maal waa gootan? Ummanni saba Israa'el hin tahinuu, akkana numa godhuu mitii ree?
[48] Kanaaf Abbaan keeysan inni samii irraa, illaa dhaan malee akkuma tahetti, isiniis warra illaa hin qabne tahaa!” jedhe.