[1] Hogguus barattoonni Yesuusitti dhihaatanii ti, “Mootummaa samii keeysatti kan hundumaa irra caalu eenyu?” jedhaniin.
[2] Hogguus inni mucaa tokko ifitti yaamee ti, isaan jidduu dhaabbachiisee,
[3] “Ani dhugumaan isinitti hima, deebitanii akka daa'immanii yoo tahuu baattan, mootummaa samitti gonkumaa hin galtan.
[4] Kanaaf jecha, namuma akka mucaa kanaatti mataa gadi qabatee tu, mootummaa samitti hundumaa irra kan caalu taha.
[5] Ammaas namnummaan mucaa akkasii tokko maqaa kiyyaan simatu ana simata” jedhe.
[6] Yesuus itti furee, “Abbaan fedhee huu ammoo, warra xixiqqaa kanneen anatti amanan keeysaa tokko gufachiisuu irra, dhagaan daakuu guddaan morma isaatti hidhamee tuujjii bahar keeysatti liqimsiifamuu tu isaaf irra wayyaa ture.
[7] Fitinamuu waan dhufuuf addunyaa tiif magan! Fitinaan dhufuun barbaachisaa dha; haa tahuu malee, namticha fitinaan isaan dhuftuuniif magan!
[8] “Harki kee yookiin miilli kee yoo si gufachiise, if irraa murii darbi; harka lama yookiin miila lama qabaattee, ibidda bara baraatti darbamuu kee tii mannaa, qaamni kee irratee, yookiin naafa taatee, jireenyatti galuu tu siif irra wayya.
[9] Ijji tee yoo si gufachiifte, if keeysaa baasii darbi; ija lachuu qabaattee, hunquuftuu jahannamitti darbamuu kee tii mannaa, ija takka qabaattee jireenyatti galuu tu siif irra wayyaa dha” jedhe.
[10] Yesuus ammaas itti furee, “Waarra xixiqqoo kanneen keeysaa tokko illee tuffachuu irraa if eegaa! Ani isinittiin hima, bar maleeykoonni isaanii samii keeysatti, fuula Abbaa kiyyaa kan samii keeysa jiruu, wayta hundumaa ni arkuu.
[11] [Ilmi Namaa tiis kan badee ture barbaaduu fi najaa baasuuf dhufe.]
[12] “Namtichi tokko, hoolota dhibba qabaatee tokko keeysaa duraa yoo bade, sagaltamii saglan gaaratti dhiisee, tokkicha bade san barbaacha hin deemuu? Maal isinitti fakkaata?
[13] Ani dhugumaan isinitti hima, hoolaa bade san yoo arkate, sagaltamii saglan warra hin badin san caalaa, inni tokkicha sanitti irra gammada.
[14] Haaluma kanatti, warra xixiqqoo kanneen keeysaa, tokko illeen baduun, fedha Abbaa keeysan kan samii irra jiruu tii miti” jedheeni.
[15] Yesuus itti furee, “Obboleeysi kee yoo sitti yakke, deemii tii kophatti balleeysaa isaa itti himi! Inni niis yoo si dhagaye, atiis obboleeysa kee deebifatte.
[16] Inni kan si hin dhageenye yoo tahe ammoo, dubbiin hundinuu ragaa lamaan yookiin sadihiin waan mirkaneeyfamtuuf jecha, nama biraa tokko yookiin lama ifii wajjiin fuudhii tii dhaqi.
[17] Isaaniis dhagayuu yoo dide, waldayatti himi; walduma illee dhagayuu nama didu yoo tahe ammoo, akka nama awaamaa, ammaas qaraxxuu tokkotti siif haa lakkaawamu.
[18] “Ani dhugumaan isinitti hima; wanni isin lafa irratti hiitan, samii irrattiis hidhamaa dha taha; wanni isin lafa irratti hiiytaniis, samii irrattiis hiikamaa dha taha.
[19] “Ammaas wanniniin isinitti himu; isin keeysaa namni lama, biyya addunyaa irratti, wal tahanii waanuma fedhe odoo kadhatanii, Abbaa kiyya kan samii irraa tiin isaaniif ni godhama.
[20] Bakkuma namni lama yookiin sadih maqaa kiyyaan itti walitti qabaman, aniis achumaan isaan jidduu jira” jedhe.
[21] Eegas booda Phexiroos, Yesuusitti dhihaatee ti, “Yaa Gooftaa, obboleeysi kiyya ammumaa amma yoo natti yakke, aniis hoggu meeqaan oomfii isaaf godha? Hanga hoggu torbaattiin oomfii godhaa fii?” jedhee ti gaafate.
[22] Yesuus deebisee, “Lakkii! Ani hanguma hoggu torbaatti siin hin jedhu, hanga torbaatamii bakka torbaatti malee” jedheeni.
[23] Yesuus itti furee ammaas, “Akkanumatti mootummaan samii tiis, mooticha hojjatoota isaa wajjiin hizaaba godhuu barbaadeetti fakkeeyfamti.
[24] Hogguu inni hizaaba godhuu jalqabe, namticha qarshii miliyoona hedduu irraa qabu tokko itti fidan.
[25] Namtichi waan kafalu dhabnaan, gooftichi isaa ammoo, isaa fi niitiin isaa, joolleen isaa tiis, ammaas wannummaan inni qabu hundinuu gurguramee deeyniin isaa akka kafalamtu ajaje.
[26] Hojjataan suniis jilba isaa irratti kufee ti, ‘Hundumaa siifiin kafalaa anumaaf obsi’ jedhee jabeeysee ti isa kadhate.
[27] Gooftichi niis isumaaf nahuu irraa kan ka'e, deeynii isa maaree, ammaas hidhaa baase ti gadi dhiise.
[28] “Hojjataan sun ammoo akkuma gadi baheen, hojjataa akka isaa kan inni hanga qarshii dhibba tokkoo irraa qabu tokko qunnamee, qabee hudhee ti, ‘Deeyniin si irraa qabu as kanni!’ jedheeni.
[29] Hojjataan san ammoo miila isaa jalatti kufee ti, ‘Deebisee tiin siif kafalaa, anumaaf obsi’ jedhee ti kadhate.
[30] Hojjataan abbaan deeynii san ammoo didee ti, hanga inni mugoota kafalee fixutti, deemee ti mana hidhaatti isa galchisiise.
[31] Hojjatoonni warri hafan kaan waan tahe kana arkanii, hedduu gaddanii deemanii ti, hundumaa gooftaa isaanitti gabaasan.
[32] Eegas gooftaan isaa hojjataa duraa san yaamsisee ti, ‘Ati yaa hojjataa hamaa! Ani deeynii si irra jirtu san hundumaa, waan ati ana kadhatteefiin si maare.
[33] Akkumaan ani siif rahamata godhetti, atiis hojjataa akka kee tii tiif rahamata godhuun si irra hin turree ree?’ jedheeni.
[34] Akkasitti gooftaan isaa aaraan, hanga inni deeynii irra jirtu hundumaa kafalutti, dabarsee ti warra waardiyyaa mana hidhaatti isa kanne.
[35] “Isiniis garaa guutuun obboleeyyan keeysaniif oomfii godhuu yoo baattan, Abbaan kiyya kan samii irraa tiis, akkasuma isin godhuuf taa'a” jedhe.