[1] Yesuus barattoota isaa kudha lamaaniif qaceelfama kannee eega raawwate booddee, mandaroota isaanii keeysatti barsiisuudhaa fi lallabuuf karaa isaa itti fure.
[2] Yohannis Cuuphaan odoo mana hidhaa keeysa jiruu, hojii Masiihichi hojjate hundumaa dhagayee ti, barattoota isaa tiin Yesuusitti dhaamsa ergee,
[3] “Inni dhufa jiru sihi moo? Yookiin kan biraa haa eeggannu?” jedheeni.
[4] Yesuus ammoo deebisee, “Waan dhageeysanii fi waan agartaniis deebi'aa tii Yohannisitti himaa!
[5] Jaaman ni arku, naafni ni deemu, dhukkuba coraa tiin warri gaddaafaman ni fayyu, dhegelaan ni dhagayu, du'aan ni ka'u, miskiinotaafiis oduun gammachuu ni lallabama.
[6] Namni mamee anatti hin gufanne, gammachuu akkam qaba!” isaaniin jedhe.
[7] Warri ergaman kuniis deebi'uuf karaa hogguu bu'an, Yesuus waa'ee Yohannis Cuuphaa namootatti dubbachuu jalqabe, “Maal laaluuf huffee gammoojjii dheeyxan? Gobeensa qilleensi raasuu?
[8] Eegasuu maal laaluuf baatan? Nama uffata hariiraa uffatee? Warri uffata hariiraa uffatan kunoo mana mootootaa keeysa jiru.
[9] Maaluma laaluuf baatan? Nabiyyii tokko laaluufii? Eeyyeen, isiniin jedha, nabiyyii irraa huu, kan caaluu dha.
[10] Barreeyfamni Qulqulluun, ‘Ani ergamaa kiyya, kan si dura deemee karaa siif qopheeysu, kunoo si duraan erga’ jedhee wanni dubbate isa kana ilaala.
[11] Dhugumaan isiniin jedha, namuma dubartii irraa dhalate keeysaa, Yohannis Cuuphaa irra kan caalu takkaa hin kaane; haa tahuu malee, mootummaa samii keeysatti, isa hundumaa irra xiqqaa tahee tu isa irra caala.
[12] Zamana Yohannis Cuuphaan barsiisuu jalqabe irraa hanga ammaatti, mootummaan samii dhaa hacuuccaan riqamaa ti jirti; warri abbaa irree tiis, humnaan harkatti galfatu.
[13] Nabiyyoonni hundinii fi seerri niis hanga bara Yohannis Cuuphaatti raajii dubbatanii ti jiru.
[14] Amantanii fudhachuuf fedha keeysan yoo tahe, Eliyaasummaan ni dhufa jedhame sunuu, Yohannisuma kana.
[15] Namni gurra dhagayu qabu haa dhaggeeyfatu.
[16] “Dhaloota ammaa kana ammoo maalittiin fakkeeysa? Inni akka joollee lafa magaalaa keeysa taa'anii hiriyoota isaanii tiin,
[17] ‘Ulullee isiniif afuufnaan, sirbuu dha diddan; faaruun lakkaawannee isin dhageeysifnaaniis booyuu dha diddan’ jedhanii wacanii ti.
[18] Yohannis hogguu dhufe, niis hin nyaatu, niis hin dhuguus ture; isaaniis, ‘Isa Sheeyxaanaa tu keeysa jira’ jedhaniin.
[19] Ilmi Namaa, nyaachaa ammaas dhugaa ti dhufe; isaan ammaas, ‘Kunoo, nama bololaa fi farshaanaa, saahiba warra qaraxxuu tii fi warra tuffatamoo ti’ jedhaniin. Haa tahu malee, hikmaan Rabbii hojii isii tiin sirrii tahuu raggaasifatte” jedhe.
[20] Hogguus Yesuus, mandaroota kanneen hojiin quduraa isaa harki caalu keeysatti dalagaman san, waan hin toowbatiniif jecha, isaan oofuu dha jalqabe.
[21] “Siif magan yaa Koraaziin, siif magan yaa Beetesayidaa! Hojiin quduraa Rabbii tan isin keeysatti godhamte, odoo Xiiroosii fi Sidoon keeysatti waan godhamte taatee, silaa qaata ummanni isaan keeysa jiraatu, uffata gaddaatii fi daaraa dhaan toowbachuu isaanii mullisanii turan.
[22] Kunoo, ani isinittiin hima, guyyaa firdii san, isin irra, Xiiroosii fi Sidooniif firdiin irra sablatti.
[23] Ati hoo yaa Qifirnaahom, hanga samitti ol kaafamuu dha barbaaddee? Hunquuftuu hoongaa hin qabnetti gadi darbamta; hojiin quduraa Rabbii tan si keeysatti godhamte, odoo Sidoon keeysatti godhamtee jirti tahee, silaa hanga arraatti jiraattee ti hafti turte.
[24] Kunoo, ani isinittiin hima, guyyaan firdii sun, isin irra Sodoomiif irra sablata” jedhe.
[25] Yesuus hogguus, “Yaa Abbaa, Gooytaa samii tii fi dachii, waan kanneen warra bebbeekoo fi aalimoota jalaa dhooysitee, wallaalotaaf waan mullifteef jecha, hamdiin siif galcha.
[26] Eeyye yaa Abbaa, kun gammachuu fedha kee tii ti.
[27] Abbaan kiyya waan hundumaa anatti kannee ti jira; Abbaa qofaa tu Ilma beeka malee, namni biraa tokko illeen isa hin beeku; Ilmaa fi ammaas warra Ilmi isaanitti isa mullisuuf fedhe qofaa tu Abbaa beeka malee, tokko illeen Abbaa hin beeku” jedhe.
[28] Yesuus itti furee, “Isin yaa warra bututtanii dadhabdan, kanneen ba'aa dhaan raramtan hundinuu, gama kiyya koottaa; aniis boqonnaa isiniifiin kanna.
[29] Harqoota kiyya if irra kaayaa, ana irraa hiis baradhaa; ani saaliha ammaas gara-laafoo dha; lubbuu teeysaniif boqonnaa ni arkattu.
[30] Harqoonni kiyya laafaa dha, ba'aan tiyyaas haffallii dha” jedhe.