[1] Hogguu bariisaan lafa buute, luboonni angafoonninii fi manguddoon biyyaa hundinuu walitti qabamanii ti, Yesuus ajjeesuu irratti marihatan.
[2] Ammaas Yesuus hidhanii, geeysanii ti, Philaaxos bulchaa biyyaatti kannan.
[3] Yihudaan, namtichi dabarsee isa kanne, Yesuusitti faradamuu hogguu arke, sheenaan itti dhagayamtee ti, qarshii soddomman deebisee, luboota angafootaa fi manguddootatti fidee ti,
[4] “Ani dhiiga nama yakka hin qabnee dhangalaasuuf dabarsee kannuu kiyyaan yakkee tiin jira” isaaniin jedhe. Isaan ammoo, “Tun maal keenya? Kurshii tee ti!” jedhaniin.
[5] Hogguus Yihudaan, qarshii Beeytal Maqdas keeysatti darbee ti achii bahee, deemee ti if fannise.
[6] Luboonni angafoonni ammoo qarshii san fuudhanii, “Qarshii tun horii dhiigaa waan taheef jecha, horii kana horii Beeytal Maqdasitti dabaluun seeraa miti” jedhan.
[7] Akkasitti murtoo dhaan bakka qabrii warra alagaa taatu, namticha suphee hojjatu irraa lafa ittiin bitan.
[8] Kanaaf lafti sun hanga arraatti “Lafa dhiigaa” jedhamtee yaamamti.
[9] Akkasitti wanni nabi Ermiyaas, “Isaan qarshii soddomman gatii isaa, tan joollee Israa'eliin shallagamte san fuudhanii,
[10] akkuma Gooftichi ajajetti namticha suphee hojjatu san irraa, ittiin lafaan bituuf kannan” jedhee dubbate raawwatamte.
[11] Yesuus hogguu bulchaa biyyaa dura dhaabbate, bulchaan biyyaa, “Sihii mootichi ummata Yihudaa?” jedhee ti isa gaafate. Yesuus ammoo, “Akkuma atuu jette” jedhee ti deebiseefi.
[12] Kissii, luboonni angafoonninii fi manguddoon, isa irratti dhiheeysaniif, inni humaa jawaaba hin deebifne.
[13] Hogguus Philaaxos, “Waan isaan irratti si kasasan kana hundumaa hin dhageeysuu?” isaan jedhe.
[14] Yesuus ammoo, jawaaba tokko illee isaaf hin deebifne, waan isaan isa irratti dhiheeysan keeysaa takka illee fuu, hin jawaabne; tuniis bulchaa biyyichaa san hedduu dha ajaa'ibsifte.
[15] Bulchaan biyyaa, Ayyaana Bira Dabruu irratti, warra hidhaman keeysaa, namuma isaan, gadi nuuf dhiisi jedhan tokko, isaaniif hiikuu, aadaa godhatee ti ture.
[16] Namticha Barabbaas jedhamu, nama mujrima beekamaa tokkoo tu hidhaa ture.
[17] Hogguu ummanni walitti qabame Philaaxos, “Eenyu akkaan isiniif gadi dhiisu barbaaddu? Barabbaas moo yookiin Yesuus Kiristoos nama jedhamu?” isaaniin jedhe.
[18] Hinaaffaan dabarsanii akka isa kannan Philaaxos ni beeka ture.
[19] Tana malees, Philaaxos barcuma firdii irra taa'utti odoo jiruu, niitiin Philaaxos, “Nama qaceelaa san waa takka illee hin godhin! Ani halkan edaa manaamatti waa'ee isaa irratti hedduu cinqamee tiin ture” jettee ti dhaamsa itti ergite.
[20] Luboonni angafoonninii fi manguddoon ammoo, Barabbaas gadi dhiisii, Yesuus ajjeesi jedhanii, Philaaxos akka gaafatan ummata fudhachiisan.
[21] Bulchaan biyyaa ammaas, “Isaan lamaan keeysaa eenyu akkaan gadi isiniif dhiisu barbaaddu?” jedhee ti isaan gaafate. Isaaniis, “Barabbaas gadi nuuf dhiisi!” jedhaniin.
[22] Philaaxosiis, “Eegasuu Yesuus Kiristoos jedhamee isa moggaafame hoo, maal haa godhu?” jedhee ti isaan gaafate; hogguus isaan hundinuu, “Inni haa fannifamu!” jedhaniin.
[23] Philaaxos ammoo, “Maaliif? Maal balleeyse?” isaaniin jedhe; isaan ammaas daranuu, “Inni haa fannifamu!” jechaa ti iyyan.
[24] Akkastti Philaaxos, rabshaa kaka'utti jiru malee, waa takka illee faaydaa irraa dhabnaan, bishaan fudhatee ti, ummata san duratti harka isaa dhiqatee ti, “Ani kunoo dhiiga nama kanaa keeysa hin jiru, isinumaa tu itti gaafatama!” jedheeni.
[25] As irratti ummanni hundinuu bakka takkaa, “Dhiiyni isaa nuu fi joollee teenya irra haa tahu!” jedhanii ti deebisaniif.
[26] Philaaxos eegas Barabbaas gadi isaaniif dhiisee, Yesuus garafsiisee ti akka fannifamuuf dabarsee kanne.
[27] Hogguus loltoonni bulchaa biyyaa, Yesuus mooraa loltuutti naqanii ti, murna loltuu achi jiru hundumaa naannawa isaatti walitti qaban.
[28] Ammaas uffata isaa irraa baasanii ti, uffata jaanoo itti uwwisan.
[29] Gonfoo qoree tiis hojjatanii ti, mataa isaa irra kaayaniifi; ulee gobeensaa tiis harka mirgaa tiin qabachiisan. Isa durattiis jilbiiffatanii, “Akkam ree, yaa mootii ummata Yihudaa!” jedhanii ti itti hanjaman.
[30] Irratti tufan, ulee gobeensaa fuudhanii ti mataa isaa dhawan.
[31] Eega itti hanjaman booddee, uffata san irraa baasanii ti wayaa isaa deebisanii itti uwwisan; achiin booda fannisuuf geeysan.
[32] Odoo gadi bahaa jiranii, nama Qareenaa tokko kan Simoon jedhamu agarraan, fannoo Yesuus akka baadhatuuf isa dirqan.
[33] Bakka Golgootaa jedhamtu takka hogguu gahan; “Golgootaa” jechuun “Killiyyuu mataa” jechuu dha.
[34] Loltoonni achitti cunfaa inabaa tan hadhooytuun itti makamte akka dhuguuf kannaniif; inni ammoo dhamdhamee ti, dhuguu dide.
[35] Eega isa fannisan booda, hixaa darbatanii ti, uffata isaa addaan hiratan.
[36] Achiin booddee isaan achuma taa'anii ti isa toohatan.
[37] Barreeyfamni yakka inni ittiin kasasame mullisuus, “Kun Yesuus mooticha ummata Yihudaa ti” kan jedhu, mataa isaa gararreen kaayamee ti ture.
[38] Hogguus nama mujrimoota lama, tokko gara mirga isaa tiin, kaan ammoo gara bitaa isaa tiin isaa wajjiin fannifaman.
[39] Warri achiin karaa dabraniis mataa isaanii raasaa,
[40] “Ati kan Beeytal Maqdas jiysitee, guyyaa sadihitti ijaartu, Ilma Rabbii yoo taate, mee matuma kee tuu baasi! Fannoo irraa hiis gadi bu'i!” jedhanii ni arrabsu turan.
[41] Luboonni angafoonni, barsiisonni seeraa tii fi manguddooniis, wajjumaan akkasumatti itti hanjaman,
[42] “Inni warra biraa, najaa baasee ti jira, mataa isaa ammoo if baasuu hin dandayu. Inni mooticha Israa'el eega tahe, mee amma fannoo irraa gadi haa bu'uu nutiis isatti ni amannaa.
[43] Inni Rabbi irra if kaayee ti jiraa, yoo barbaade, mee Rabbi ammuma isa haa baasuu; inninuu, ‘Ani Ilma Rabbii ti’ jedhee ti jira” jedhan.
[44] Jarri mujrimoonni kanneen isaa wajjiin fannifaman illeen, akkasumatti isa ni arrabsu turan.
[45] Guyyaa waaree jalqabee hanga za'aa sadih waaree boodaatti, dukkanti lafa hunduma irra wal geeyse.
[46] Toora za'aa sadihitti waaree booda, Yesuus sagalee guddaa dhaan, “Elii, Elii lamaa sabaktanii?” jedhee ti yaammate; kuniis, “Rabbi koo, Rabbi koo maaliif na dhiifte?” jechuu dha.
[47] Warra achi dhadhaabbachaa turan keeysaa kanneen tana dhagayan, “Inni Eliyaas yaama” jedhan.
[48] Hogguusuma tokko isaan keeysaa fiigee, waan bishaan xuuxu takkatti kal guutee, gobeensatti kaayee ti, akka dhuguuf itti kanne.
[49] Warri kaan ammoo, “Mee itti dhiisi! Eliyaas isa baasuuf yoo dhufe laallaa!” jedhan.
[50] Yesuus ammaas sagalee guddoo dhaan iyyee ti ruuhii isaa kanne.
[51] Kunoo golgaan Beeytal Maqdas, olii hanga gaditti, bakka lamatti addaan baqaqe; dachiin ni sossoote, dhagaaggeen siibaan ni babbaqaqan.
[52] Qabroonni banamanii, warri qaceeloon dur du'an hedduun jasadaan ni kaafaman.
[53] Isaaniis qabroota keeysaa bahanii, du'aa ka'uu Yesuus booddee Yerusaaleem, magaalaa qulqulluu seenanii namoota heddutti mullatan.
[54] Abbaan dhibbaalaa tii fi kanneen isaa wajjiin Yesuus eegaa turan, sossooha lafaa tii fi waan wayta san tahe hundumaa hogguu arkan rifatanii, “Namtichi kun dhugumaan Ilma Rabbii ture” jedhan.
[55] Dubartoonni hedduun kanneen Galiilaa dhaa isa duukaa bu'anii isaas kaadaman, halaala dhaabbatanii ni daawwatu turan.
[56] Maariyaam Magdalaa, Maariyaam haati Yaaqoobii fi Yoseef, haati ilmaan Zabdewosiis isaan keeysa turan.
[57] Hogguu aduun dhiite, taajirtichi magaalaa Armaatiyaa tokko, kan Yoseef jedhamu, kan ifii fuu barattuu Yesuus turee tu dhufe.
[58] Inni Philaaxos bira dhaqee ti, reefka Yesuus kadhate; hogguus Philaaxos akka kannamuuf ni ajaje.
[59] Yoseef reefkicha fuudhee, wayaa hariiraan kafanee,
[60] qabrii haaraya ifiif jecha dhagaa keeysatti tolfate keeysa kaaye; ammaas dhagaa guddaa tokko, balbala qabrii irratti gangalchee ti biraa deeme.
[61] Maariyaam Magdalaa tii fi, Maariyaam taaniis, achuma fuullee qabrii dhaa tattaa'u turan.
[62] Guyyaan qophaawummaa dabree borumtii isaa, luboonni angafoonninii fi Fariisonni, Philaaxos biratti walitti qabamanii,
[63] “Yaa gooftaa! Namtichi malaan-nyaataan sun oduma lubbuu nuu jiruu, ‘Guyyaa sadih booda ani niin kaafama’ jechuu isaa ni yaadanna.
[64] Tanaaf jecha, qabrii san hanga guyyaa sadihii akka eegamtu, ajaji! Tun godhamuu baannaan ammoo, barattoonni isaa deemanii reefka isaa hatanii, ummataan, ‘Inni du'aa kaafamee ti jira’ jedhuun ni mala; gowwoomsuun boodaa tuniis, tanuma duraa irraa huu tan hammaatu taati” jedhaniin.
[65] Philaaxos hogguus “Kunoo waardiyyaa ni qabduu, deemaa tii akka feetanitti sirritti eeysisaa!” isaaniin jedhe.
[66] Akkasitti deemanii dhaqanii, dhagaa qabriin cufame sirritti jabeeysanii ti, waardiyyaas itti ramadan.